ବାରଙ୍ଗ,୧୧।୭(ଡି.ଏନ୍.ଏ.)-ବାରଙ୍ଗ ଥାନା ଅଧୀନ ଗୋଡ଼ିସାହିରେ ରହୁଥିବା ଶିକ୍ଷକ ସୁଧାକର ମିଶ୍ରଙ୍କ ଘରୁ ସୋମବାର ଅପରାହ୍ନରେ ଚୋରି ହୋଇଥିବା ନେଇ ଗୋଡ଼ିସାହି ଫାଣ୍ଡିରେ ଅଭିଯୋଗ ହୋଇଛି। ଅଭିଯୋଗ ପାଇ ପୋଲିସ ମଙ୍ଗଳବାର ଘଟଣାର ତଦନ୍ତ ଆରମ୍ଭ କରିଥିଲେ ହେଁ ଦୁର୍ବୃତ୍ତଙ୍କ ପତ୍ତା ପାଇପାରିନାହିଁ। ସୂଚନା ମୁତାବକ, ସୋମବାର ଅପରାହ୍ନ ପ୍ରାୟ ୪ଟାରେ ସୁଧାକରଙ୍କ ଘରେ କେହି ସଦସ୍ୟ ନ ଥିଲେ। ଏହି ସୁଯୋଗରେ ଦୁର୍ବୃତ୍ତମାନେ ଘରର ତାଲା ଭାଙ୍ଗି ଭିତରେ ପଶି ସୁନା ଅଳଙ୍କାର ସହ ନଗଦ ୨୫ହଜାର ଟଙ୍କା ଚୋରି କରି ନେଇଥିଲେ। ସନ୍ଧ୍ୟାରେ ସୁଧାକର ଫେରିବା ପରେ ଘରର ତାଲା ଭଙ୍ଗାଯାଇଥିବା ଏବଂ ଘରୁ ଚୋରି ହୋଇଥିବା ଦେଖି ଫାଣ୍ଡିରେ ଅଭିଯୋଗ କରିଥିଲେ।
