ବେଜିଂ,୧୦।୭: ଭାରତ-ଚାଇନା ସମ୍ପର୍କରେ ଏବେ ନୂଆ ମୋଡ ଆସିଛି। ଶତ୍ରୁତାକୁ ଭୁଲି ଚାଇନା ଏବେ ଭାରତଠାରୁ ଆଣ୍ଟି କ୍ୟାନସର ଡ୍ରଗ୍ ବା କର୍କଟ ନିରୋଧୀ ଔଷଧ କିଣିବାକୁ ନିଷ୍ପତ୍ତି ନେଇଛି। ଫଳରେ ଚାଇନାର କ୍ୟାନସର ରୋଗୀ ଆଶ୍ୱସ୍ତି ଅନୁଭବ କରିଛନ୍ତି। କିଛିଦିନ ପୂର୍ବେ ଭାରତରୁ କ୍ୟାନସର ରୋଗ ପାଇଁ ଉଦ୍ଦିଷ୍ଟ ଯେଉଁସବୁ ଔଷଧ ଉପରେ ଚାଇନା ପ୍ରତିବନ୍ଧକ ଲଗାଇଥିଲା ଏବେ ତାହାକୁ ହଟାଇ ଦେଇଛି। ଏହା ସମ୍ଭବ ହୋଇପାରିଛି ଫିଲ୍ମ ‘ଡାଇଙ୍ଗ ଟୁ ସର୍ଭାଇବ୍’ର ରିଲିଜ୍ ପରେ। ଏହି ଚାଇନିଜ୍ ଫିଲ୍ମଟି ଏକ ସତ୍ୟ ଘଟଣା ଉପରେ ଆଧାରିତ। ଏଥିରେ ଲ୍ୟୁକୋମିଆ(ରକ୍ତ କର୍କଟ) ରୋଗରେ ପୀଡିତ ଜଣେ ରୋଗୀଙ୍କୁ ଭାରତରୁ କ୍ୟାନସର ନିରୋଧୀ ଔଷଧ ବେଆଇନ ଭାବେ ମଗାଇ ଚିକିତ୍ସା କରାଯାଉଛି। ଏହା ଦେଖିବା ପରେ ଚାଇନା ସରକାର ଭାରତରୁ ଆଣ୍ଟି କ୍ୟାନସର ଡ୍ରଗ୍ସ ମଗାଇବା ନେଇ ଲଗାଇଥିବା ପ୍ରତିବନ୍ଧକକୁ ସୋମବାର ହଟାଇ ଦେଇଛନ୍ତି।
