ଝାରସୁଗୁଡା ଅଫିସ,୧୩।୬- ଗତ କିଛି ମାସ ପୂର୍ବରୁ ଅଶ୍ଳୀଳ ଭିଡିଓ ଭାଇରାଲକୁ ନେଇ ରାଜ୍ୟରେ ତୁମ୍ବିତୋଫାନ ହୋଇଥିଲା। ପରିସ୍ଥିତି ଏପରି ହେଲା ଯେ, ଶେଷରେ ପୋଲିସ ମହାନିର୍ଦ୍ଦେଶକ ଡା. ରାଜେନ୍ଦ୍ର ପ୍ରଶାଦ ଶର୍ମା ସମସ୍ତ ଜିଲା ଏସ୍ପିଙ୍କୁ ଭିଡିଓ ଭାଇରାଲ ରୋକିବା ଏବଂ ତ୍ୱରିତ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶନାମା ଜାରି କଲେ। କିନ୍ତୁ ଭିଡିଓ ଭାଇରାଲ କ୍ରମାଗତ ଜାରି ରହିଲା। ବର୍ତ୍ତମାନ ଝାରସୁଗୁଡା ସହରାଞ୍ଚଳର ଜଣେ ଛାତ୍ରୀଙ୍କ ଭିଡିଓ ଭାଇରାଲ ହୋଇଛି। ଏହି ଘଟଣା ସହରରେ ଚାଞ୍ଚଲ୍ୟ ସୃଷ୍ଟି କରିଥିବା ବେଳେ ପୋଲିସ କାର୍ଯ୍ୟାନୁଷ୍ଠାନ ସ୍ବରୂପ ଅଭିଯୁକ୍ତଙ୍କୁ ଗିରଫ କରାଯାଇଛି। ଅଭିଯୁକ୍ତ ଜଣକ ହେଲେ କୋଲାବିରା ଥାନା ସମାସିଂହାର ସତ୍ୟନାରାୟଣ ପଟେଲ(୨୮)। ଅଭିଯୁକ୍ତଙ୍କଠାରୁ ମୋବାଇଲ ଫୋନ୍ ଜବତ କରି ବୁଧବାର କୋର୍ଟ ଚାଲାଣ କରାଯାଇଛି ବୋଲି ଆଇଟି ସେଲ୍ ଇନସ୍ପେକ୍ଟର ସୂଚିସ୍ମିତା ମହାନ୍ତି ସୂଚନା ଦେଇଛନ୍ତି।
ପୋଲିସ ସୂଚନା ମୁତାବକ, ପିଡୀତା ପଢୁଥିବା କଲେଜରେ ଅଭିଯୁକ୍ତ ସତ୍ୟନାରାୟଣଙ୍କ ଭାଣିଜି ମଧ୍ୟ ପଢୁଥିଲେ। ଅନେକ ସମୟରେ ସତ୍ୟନାରାୟଣ ଭାଣିଜିକୁ କଲେଜ ନେବା ଆଣିବା କରନ୍ତି। ଏହି ସମୟରେ ଅଭିଯୁକ୍ତ ସତ୍ୟନାରାୟଣ ଏବଂ ପିଡୀତାଙ୍କ ପରିଚୟ ହୋଇଥିଲା। ଅଭିଯୁକ୍ତ ବିବାହିତ ହୋଇଥିଲେ ମଧ୍ୟ ଛାତ୍ରୀଙ୍କୁ ବିବାହ ପ୍ରତିଶ୍ରୁତି ଦେଇଥିଲେ। ଏହି ପ୍ରତିଶ୍ରୁତି ବଳରେ ସେ ଛାତ୍ରୀଙ୍କ ସହ ଶାରୀରିକ ସମ୍ପର୍କ ରକ୍ଷା କରି ତାଙ୍କ ଭିଡିଓ ଏବଂ ଫଟୋ ଉତ୍ତୋଳନ କରିଥିଲେ। ସତ୍ୟନାରାୟଣ ବିବାହିତ ବୋଲି ଛାତ୍ରୀ ଜଣକ ଜାଣିବା ପରେ ସେ ତାଙ୍କଠାରୁ ସମ୍ପର୍କ ଛିନ୍ନ କରିଥିଲେ। ଫଳରେ ଅଭିଯୁକ୍ତ ସତ୍ୟନାରାୟଣ ପ୍ରତିଶୋଧ ନେବାକୁ ନେଇ ନିଜର କେତେକ ସହଯୋଗୀଙ୍କ ଜରିଆରେ ଭିଡିଓ ଭାଇରାଲ କରିଥିଲେ। ଛାତ୍ରୀଙ୍କ ପରିବାର ଏ ନେଇ ବିଟିଏମ୍ ଫାଣ୍ଡିରେ ଏତଲା ଦେବାପରେ ଏକ ଆଇଟି ଅପରାଧ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରାଯାଇଛି। ବୁଧବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
