କାକଟପୁର, ୨୭।୩(ଡି.ଏନ୍.ଏ.): ମା’ ମଙ୍ଗଳାଙ୍କ ପ୍ରସିଦ୍ଧ ଝାମୁଯାତ୍ରାକୁ ନେଇ ଚଳଚଞ୍ଚଳ କାକଟପୁର। ଆଜି ଚୈତ୍ର ମାସର ୪ର୍ଥ ମଙ୍ଗଳବାର ହୋଇଥିବାରୁ ମା’ଙ୍କ ଅପୂର୍ବ ଦର୍ଶନ ପାଇଁ ଭକ୍ତଙ୍କ ପ୍ରବଳ ଭିଡ ପରିଲକ୍ଷିତ ହୋଇଛି। ରାତିରେ କାଳିକା ନୃତ୍ୟ ଅନୁଷ୍ଠିତ ହେବ। ପରମ୍ପରାନୁଯାୟୀ ଜଣେ ଖମାରୋଇ ସେବକ ୩ୟ, ୪ର୍ଥ, ୫ମ ମଙ୍ଗଳବାର ବିଳମ୍ବିତ ରାତିରେ ନିଜକୁ କାଳୀ ବେଶରେ ସଜ୍ଜିତ କରିଥାନ୍ତି। ମା’ଙ୍କ ପାଖକୁ ଯାଇ ଆଜ୍ଞାମାଳ ଗ୍ରହଣ କରିବା ପରେ ଅନ୍ୟସେବକଙ୍କ ଘଣ୍ଟ ବାଦ୍ୟର ତାଳେତାଳେ ସେ ମନ୍ଦିରବେଢ଼ା, ସେବକ ସାହି ଦାଣ୍ଡରେ କାଳିକା ନୃତ୍ୟ ପରିବେଷଣ କରିଥାନ୍ତି। କାଳିକା ନୃତ୍ୟ ପରିବେଷଣ କରୁଥିବା ସେବକଜଣଙ୍କ ଚୈତ୍ର ଓ ବୈଶାଖ ମାସସାରା ନିଷ୍ଠାରେ ରହି ହବିଷ୍ୟାନ୍ନ ଗ୍ରହଣ କରିଥାନ୍ତି। କାଳିକା ନୃତ୍ୟ ମଙ୍ଗଳା ମନ୍ଦିରର ଏକ ଅନନ୍ୟ ଆକର୍ଷଣ ହୋଇ ଆସୁଥିବା ପ୍ରାଚୀ ଗବେଷକ ତ୍ରିଲୋଚନ ମିଶ୍ର କହିଛନ୍ତି। ପ୍ରକାଶ ଯେ, ମା’ଙ୍କୁ ଆଦିମାତା କୁହାଯାଇଥାଏ। ଦୁର୍ଗା ଓ କାଳୀ ତାଙ୍କ ଅନନ୍ୟ ରୂପ ବୋଲି ମଧ୍ୟ ପୁରାଣରେ ବର୍ଣ୍ଣନା କରାଯାଇଛି। ଏହାକୁ ଦର୍ଶାଇବାକୁ ମଙ୍ଗଳାଙ୍କ ମନ୍ଦିର ପରିସରରେ ଚୈତ୍ର ମାସର ତୃତୀୟ, ଚତୁର୍ଥ ଓ ବୈଶାଖ ମାସର ପ୍ରଥମ ମଙ୍ଗଳବାର ରାତିରେ କାଳିକା ନୃତ୍ୟ ଅନୁଷ୍ଠିତ ହୋଇଥାଏ ବୋଲି ମା’ଙ୍କ ସେବକ ତଥା ଲେଖକ ରଘୁନାଥ ପଣ୍ଡା ‘ମା’ ମଙ୍ଗଳା’ ପୁସ୍ତକରେ ଦର୍ଶାଇଛନ୍ତି।
