ସମ୍ପାଦକୀୟ |

ସଂସାର ମୋହ

ସଂସାର ମୋହ
ବୈକୁଣ୍ଠନାଥ ମିଶ୍ର/ ଲକ୍ଷ୍ମୀ ଯାହା ଉପରେ ପ୍ରସନ୍ନ ହୁଅନ୍ତି ତାଙ୍କ ଧନଭଣ୍ଡାରକୁ ପରିପୂର୍ଣ୍ଣ କରିଦିଅନ୍ତି। ଧନ ମୋହରେ ଅନ୍ଧ ହୋଇ ସେ ଭୁଲିଯାଏ ତା’ର ବିଷାଦଭରା ଅତୀତ ଜୀବନକୁ। ଏ ସମ୍ବନ୍ଧରେ ଏକ କାହାଣୀ ପ୍ରାସଙ୍ଗିକ ମନେହୁଏ। ତେଲଲୁଣର ଅଭାବୀ ସଂସାରରେ ଜଞ୍ଜାଳ ଜାଲର ଶକ୍ତ ରଜ୍ଜୁକୁ ଛିନ୍ନ କରିବାରେ ଅସମର୍ଥ ହୋଇ ଦିନେ ସଂସାର ତ୍ୟାଗ କରିବାର ଅଭୀପ୍ସା ପୋଷଣ କଲା ଗାଉଁଲି ଯୁବକ ନରି ଓରଫ ନରୋତ୍ତମ ଦାସ। ନିଶାର୍ଦ୍ଧରେ ସମସ୍ତଙ୍କ ଅଗୋଚରରେ ଘରୁ ଗୋଡ଼ କାଢିଲା ନରି। ନିଜର ପିନ୍ଧାଲୁଗା ବ୍ୟତୀତ ଅନ୍ୟ କିଛି ହେଲେ ଦ୍ରବ୍ୟ ସେ ଘରୁ ଆଣି ନ ଥିଲା। ଘରଠାରୁ ଅନେକ ଦୂର ଗଲାପରେ ନରି ଆସି ଏକ ଆଶ୍ରମରେ ପହଞ୍ଚିଲା। ଆଶ୍ରମର ସକଳ ନିୟମକାନୁନ ମାନି ନିଜକୁ ବେଶ୍‌ ସହଜ ଭାବେ ଖାପଖୁଆଇ ନେଲା ନରି। ତା’ର ସୁମିଷ୍ଟ ବଚନ, ମାର୍ଜିତ ବ୍ୟବହାର ଓ ସଚ୍ଚୋଟପଣରେ ଆଶ୍ରମର ଅନ୍ତେବାସୀମାନଙ୍କ ମଧ୍ୟରେ ନରି ପ୍ରତି ସମ୍ମାନ ବୃଦ୍ଧି ପାଇଲା। ଆଜିକାଲି ସେ ବାବା ନରୋତ୍ତମ ଭାବେ ବେଶ୍‌ ଜଣାଶୁଣା ହେଲାଣି। ଦିନେ ଆଶ୍ରମର ମୁଖ୍ୟ ସନ୍ଥ ବାବା ଉପେନ୍ଦ୍ରନାଥ ନରିକୁ ନିକଟକୁ ଡାକି କହିଲେ, ବାବା ନରୋତ୍ତମ ତୁମେ ତ ସବୁ ବିଷୟରେ ପାରଙ୍ଗମ ହୋଇଗଲଣି। ଆଶ୍ରମର ପୂଜାପାଠ ତୁମକୁ ଜ୍ଞାତ ଅଛି। ଅଧିକନ୍ତୁ ଆଶ୍ରମର ସମସ୍ତ ଅନ୍ତେବାସୀ ତୁମକୁ ଭକ୍ତି ଓ ସମ୍ମାନ କରନ୍ତି। ଆଜିଠାରୁ ତୁମେ ଏ ଆଶ୍ରମର ସମ୍ପୂର୍ଣ୍ଣଭାର ବହନ କର। ମୁଁ ମୋର ମୂଳ ଆଶ୍ରମକୁ ଫେରିଯାଉଛି। କେବେ ସୁବିଧା ହେଲେ ପୁଣି ଆସିବି। ଏହା କହି ବାବା ଉପେନ୍ଦ୍ରନାଥ ସେ ଆଶ୍ରମ ତ୍ୟାଗ କରି ଚାଲିଗଲେ। କିଛିଦିନ ଭଲରେ କଟିଗଲା। କିନ୍ତୁ ବାରମ୍ବାର ଏକ ସମସ୍ୟା ଦେଖାଦେଲା ଯାହା ବାବା ନରୋତ୍ତମଙ୍କୁ ବିବ୍ରତ କରିପକାଇଲା। ଆଶ୍ରମରେ ମୂଷାମାନଙ୍କର ଉପଦ୍ରବ ବଢିଗଲା। ମୂଷାମାନେ ବାବାଙ୍କ କୌପିନକୁ ଟିକି ଟିକି କରି କାଟି ପକାଇଲେ। ବାବା ଆଉ କେତେ କୌପିନ କିଣିବେ? ଗ୍ରାମ ମୁଖିଆଙ୍କ ଆଗରେ ବାବା ଏକଥା ପ୍ରକାଶ କରନ୍ତେ ଗାଁମୁଖିଆ ତତ୍‌କ୍ଷଣାତ୍‌ କହିଲେ, ଏଇକଥା! ଆପଣ ଗୋଟିଏ ବିଲେଇ ରଖନ୍ତୁ। ସେ ମୂଷାମାନଙ୍କୁ ନିପାତ କରିଦେବ। ବାବାଙ୍କ ମନକୁ କଥାଟା ପାଇଲା। ସେ ବିଲେଇଟିଏ ରଖିଲେ। ବିଲେଇ ସିନା ମୂଷାମାନଙ୍କୁ ନିଃଶେଷ କରିଦେଲା, ହେଲେ କିଛିଦିନ ପରେ ଖାଦ୍ୟାଭାବରୁ ବିଲେଇଟି ମୃତ ପ୍ରାୟ ହେଲା। ଗାଁମୁଖିଆଙ୍କୁ ପଚାରନ୍ତେ ସେ କହିଲେ ବାବା ଆପଣ ଗାଈଟିଏ ରଖନ୍ତୁ। ଗାଈ କ୍ଷୀର ବିଲେଇ ଖାଇବ ଓ ଆପଣ ମଧ୍ୟ ଖାଇବେ। ବାବାଙ୍କର ତ ଆଉ ଧନର ଅଭାବ ନାହିଁ। ସେ ତତ୍‌କ୍ଷଣାତ୍‌ ଦୁଧିଆଳି ଗାଈଟିଏ କିଣିଲେ। ବେଶ୍‌ କିଛିଦିନ ସୁଖରେ ବିତିଲା ପରେ ସେବାଯତ୍ନ ଓ ଚାରଣ ଅଭାବରୁ ଗାଈ ଓ ବାଛୁରୀ ଦୁହେଁ କଙ୍କାଳସାର ହେଲେ, ଯାହା ବାବାଙ୍କର ଚିନ୍ତା ଉଦ୍ରେକ କଲା। ଗାଁମୁଖିଆ ଏ ସମସ୍ୟା ଶୁଣି ପରାମର୍ଶ ଦେଲେ, ବାବା ଆପଣ ଚାକରଟିଏ ରଖନ୍ତୁ। ଚାକରଟି ଗାଈ ଓ ବାଛୁରୀଙ୍କ ଯତ୍ନ ନେବ। ବାବା ତାହା ହିଁ କଲେ। ମାତ୍ର ମାସ ପୂରିଲା ବେଳକୁ ଚାକର ଯେତେବେଳେ ଦରମା ମାଗିଲା, ବାବାଙ୍କର ବୁଦ୍ଧି ହଜିଗଲା। ସେ ପୁଣି ଗ୍ରାମମୁଖିଆଙ୍କ ପରାମର୍ଶ ଲୋଡିଲେ। ଗାଁମୁଖିଆ ତାଙ୍କୁ ପରାମର୍ଶ ଦେଇ କହିଲେ, ଆଶ୍ରମର ତ ଭଲ ଜମି ଦଶଏକର ଅଛି। ଆପଣ ସେ ଜମିତକ ଭାଗଚାଷୀକୁ ନ ଦେଇ ହାତରେ ଚାଷ କରନ୍ତୁ। ମୂଲିଆ ଚାକରଙ୍କୁ କାମ ମିଳିବ। ଆପଣଙ୍କ ହାତକୁ ବେଶ୍‌ ଦି’ପଇସା ଆସିବା ସହ ମୂଲିଆ ଚାକର ମଧ୍ୟ ଦରମା ନେବେ। ବାବା ନରୋତ୍ତମଙ୍କୁ କଥାଟି ବେଶ୍‌ ରୁଚିଲା ଏବଂ ସେ ତାହା ହିଁ କଲେ। ଦିନ କେତେଟାରେ ବାବା ନରୋତ୍ତମଙ୍କର ଆର୍ଥିକ ଉନ୍ନତି ଘଟିଲା। ସେ ବର୍ତ୍ତମାନ ଜଣେ ଧନୀ, ମାନୀ, ଗୁଣୀ ଓ ମର୍ଯ୍ୟାଦାସମ୍ପନ୍ନ ବ୍ୟକ୍ତି। ଦିନେ ବାବା ନରୋତ୍ତମ ଚିନ୍ତାକଲେ, ମୋର ଧନରତ୍ନ, ଚାକର, ପୂଜାରୀ କେଉଁଥିରେ ତ ଅଭାବ ନାହିଁ। କିନ୍ତୁ ଏ ସବୁ ପ୍ରାଚୁର୍ଯ୍ୟ ଭିତରେ ଗୃହିଣୀଟିଏ ଥିଲେ ମୋର ଅଭାବବୋଧ ଦୂର ହୁଅନ୍ତା। ସତକୁ ସତ ଆଶ୍ରମର ଏକ ଶିଷ୍ୟାଙ୍କୁ ବିବାହ କରି ବାବା ନରୋତ୍ତମ ଏକ ପକ୍କା ସଂସାରୀ ବନିଗଲେ। ସ୍ତ୍ରୀପିଲାଙ୍କ ଜଞ୍ଜାଳ ମଧ୍ୟରେ ରହି ବାବା ନରୋତ୍ତମ ଈଶ୍ୱର ସେବା ସମ୍ପୂର୍ଣ୍ଣ ଭୁଲିଗଲେ। ଦିନେ ବାବା ଉପେନ୍ଦ୍ରନାଥ ମହାରାଜ ଆଶ୍ରମକୁ ଆସି ଦେଖିଲାବେଳକୁ ଆଶ୍ରମଟି ଆଉ ଆଶ୍ରମ ହୋଇ ନାହିଁ କି ନରୋତ୍ତମ ଆଉ ବାବା ହୋଇ ନାହାନ୍ତି। ଭଜନକୀର୍ତ୍ତନ ବଦଳରେ ଛୋଟ ଛୋଟ ପିଲାମାନଙ୍କର ହସକାନ୍ଦରେ ଆଶ୍ରମ ବାତାବରଣ ଉଛୁଳି ପଡୁଛି। ଏହା ସମ୍ପୂର୍ଣ୍ଣ ଏକ ଗୃହସ୍ଥର ଜଞ୍ଜାଳମୟ ସଂସାର। ବାବା ନରୋତ୍ତମକୁ ଡାକି କହିଲେ ଯେ ସଂସାରୀ ସେ ସବୁବେଳେ ସଂସାରୀ। ସାମାନ୍ୟ କୌପିନକୁ ମୂଷା କାଟିଦେବାକୁ ସୂତ୍ର କରି ତୁମେ ସଂସାରୀ ବନିଯାଇଛ। ଏ ଆଶ୍ରମ ଜୀବନରେ ତୁମର ପ୍ରୟୋଜନ ନାହିଁ। ଭବାନୀପାଟଣା ସଦରମହକୁମାଠାରୁ ଷାଠିଏ କିଲୋମିଟର ଦୂର ଥୁଆମୂଳ ରାମପୁର ବ୍ଲକ୍‌ର ଅଖ୍ୟାତ ପଲ୍ଲୀ ମେଲଘରାର ଦରିଦ୍ର ଆଦିବାସୀ ଦାନ ମାଝି ପତ୍ନୀ ଅମାଙ୍ଗର ଶବକୁ କାନ୍ଧରେ ବୋହି ଦୀର୍ଘପଥ ଅତିକ୍ରମ କରୁଥିବାର ହୃଦୟବିଦାରକ ଦୃଶ୍ୟ ସାରା ବିଶ୍ୱରେ ଚହଳ ପକାଇଥିଲା। ପ୍ରାଣପ୍ରିୟା ପତ୍ନୀର ନିଜ ଗାଁ ମଶାଣିରେ ଶବ ସଂସ୍କାର କରିବାର ଅନ୍ତିମ ଇଚ୍ଛାକୁ ସମ୍ମାନ ଜଣାଇ ଦାନ ସେଦିନ ପୁରୁଷ ସମାଜ ପ୍ରତି ଥିଲା ଅନନ୍ୟ ଉଦାହରଣ। ବିଶ୍ୱର କୋଣ ଅନୁକୋଣରୁ କେବଳ ସମବେଦନାର ସୁଅ ଛୁଟି ନ ଥିଲା, ବରଂ ତା’ ପାଦତଳେ ଅଜାଡି ହୋଇପଡିଥିଲା ସକଳ ଐଶ୍ୱର୍ଯ୍ୟର ସମ୍ଭାର। ସରକାରୀ, ବେସରକାରୀ ସାହାଯ୍ୟରାଶିରେ ତା’ ଶୂନ୍ୟଥାଳ ପୂର୍ଣ୍ଣ ହୋଇଗଲା। ଦେଶ ଭିତରୁ ତ ଅନେକ ମିଳିଲା। ଦେଶ ବାହାରୁ ମଧ୍ୟ ଅନୁକମ୍ପାମୂଳକ ଆର୍ଥିକ ରାଶି ତାକୁ ପ୍ରାପ୍ତ ହେଲା। ବାହାରିନ୍‌ ପ୍ରଧାନମନ୍ତ୍ରୀ ଦାନ କଲେ ଦଶଲକ୍ଷ ଟଙ୍କା। ଗଣମାଧ୍ୟମ ସୂତ୍ରରୁ ପ୍ରାପ୍ତ ତତ୍କାଳୀନ ଖବର ଅନୁସାରେ ଦାନ ପାଇଁ ଦାନର ପରିମାଣ ଥିଲା ପଚାଶଲକ୍ଷରୁ ଊର୍ଦ୍ଧ୍ୱ। ଯିଏ ଦିନେ ଥିଲା ଦରିଦ୍ରତମ, ସେ ଆଜି ଏତେ ଧନର ମାଲିକ। ଦିନେ ସାଇକେଲଟିଏ ଚଢିବାକୁ ସକ୍ଷମ ନ ଥିବା ଦାନ ଆଜି ହୋଣ୍ଡାସାଇନି ଭଳି ଦାମୀ ମୋଟରସାଇକେଲ ବ୍ୟବହାର କରୁଛି। ସାଧାରଣ ଲୁଙ୍ଗି ଖଣ୍ଡେ ପିନ୍ଧୁଥିବା ଦାନ ଆଜି ଆଧୁନିକ ଜିନ୍‌ସ ପ୍ୟାଣ୍ଟ ଓ ଟି-ଶାର୍ଟ ପରିଧାନ କରୁଛି। ନୂଆଁଣିଆ ଖପର ଘର ଉଭେଇଯାଇ ତା’ ସ୍ଥାନରେ ପକ୍କା ଛାତଘରଟିଏ ଠିଆ ହେଲାଣି। ପରଘରେ ମୂଲ ଲାଗୁଥିବା ଦାନ ଆଜି ନିଜେ କେତେ ମୂଲିଆଙ୍କୁ କାମ ଯୋଗାଇଦେଇଛି। ଏସବୁର ପରବର୍ତ୍ତୀ ଆବଶ୍ୟକତା ପୂରଣ କରିବାରେ ଦାନ ଆଦୌ କାର୍ପଣ୍ୟ କରିନାହିଁ। ଦ୍ୱିତୀୟ ବିବାହ କରି ଅମାଙ୍ଗର ଅଭାବ ପୂରଣ କରିଛି। ଦାନ ମଧ୍ୟ ଅନ୍ୟମାନଙ୍କୁ କିଛି ପ୍ରେରଣା ଯୋଗାଇଛି। ସମସ୍ତ ସୁବିଧା ଉପଲବ୍ଧ ଥାଇ ମଧ୍ୟ କିଏ ମା’ ଶବକୁ ସାଇକେଲରେ ବୋହିଛି ତ କିଏ ପିତୃଶବକୁ ଖଟିଆରେ ବୋହିଛି। ଉଦ୍ଦେଶ୍ୟ ତାଙ୍କ ପ୍ରତି ଅନ୍ୟମାନଙ୍କର ଦୃଷ୍ଟିପଡୁ ଓ ଦାନ ପରି ତାଙ୍କ ଭାଗ୍ୟ ଖୋଲିଯାଉ। କିନ୍ତୁ କବିସୂର୍ଯ୍ୟଙ୍କ ବାଣୀ ଅନୁସାରେ ଯାହାକୁ ଯାହା କରିଛି ଦଇବ- ତହୁଁ ନିକି ସେ ଅନ୍ୟଥା ହୋଇବ, ଜଗତେ କେବଳ, ଜନେ ହସିବେ- ଏହି ତହୁଁ ଫଳ। ଦାନର ଅବସ୍ଥାନ୍ତର ଘଟିଛି- ଏହା ତ ଖୁବ୍‌ ଭଲ କଥା। ଅମାଙ୍ଗ ସହ ଦାମ୍ପତ୍ୟ ଜୀବନ ଅତି ସୁଖକର ଥିଲା। ଶାସ୍ତ୍ର କହେ- ”ଦ୍ୱୟୋଃ ଧୀରିନ୍ଦ୍ରିୟଂ ହୃଦ୍ୟଂ ଦ୍ୱୟୋଃ ପ୍ରାଣଶରୀରୟୋଃ। ଉଭୟୋରାତ୍ମାନୌ ଚେତୌ ପ୍ରେମବ୍ରତ ସମନ୍ବୟଃ।ା“ ଦୁଇଟି ଶରୀର ଦୁଇଟି ମନ, ଦୁଇଟି ହୃଦୟ, ଦୁଇଟି ପ୍ରାଣ ଓ ଦୁଇଟି ଆତ୍ମାର ମିଳନ ହେଉଛି ପ୍ରେମବ୍ରତ ବା ବିବାହ। ଅମାଙ୍ଗ ଜୀବିତାବସ୍ଥାରେ ଯାହା ଦେଇ ନ ଥିଲା, ମୃତ୍ୟୁ ପରେ କାହିଁ କେତେ ଗୁଣ ଅଜାଡି ଦେଲା। ଯାହାକୁ ସେ ଏତେ ଭଲ ପାଉଥିଲା ଦିନ କେତେଟାରେ ତା’ ସ୍ମୃତିକୁ ପୋଛିଦେଇ ଆଉ ଜଣଙ୍କର ହାତ ଧରିନେଲା। ଅମାଙ୍ଗ ଥାଇ ଦାନର ବିୟୋଗ ଘଟିଥିଲେ ଅମାଙ୍ଗ କ’ଣ ଏତେ ନିଷ୍ଠୁର ହୋଇପାରିଥାନ୍ତା? ଦାନ ଆଜି ସବୁ ପାଇଛି, ହେଲେ ମା’ ଶବ ପଛେ ପଛେ ଚାଲୁଥିବା ଓ ନୟନାଶ୍ରୁରେ ବନ୍ୟା ସୃଷ୍ଟି କରିଥିବା ମା’ଛେଉଣ୍ଡ ଝିଅଟି କ’ଣ ପାଇଲା? ଦାନ ପ୍ରତି ନୁହେଁ, ବରଂ ତା’ ପ୍ରତି ଥିଲା ଅଜସ୍ର ସହାନୁଭୂତି। ଅମାଙ୍ଗର ପ୍ରତିମୂର୍ତ୍ତିଟିଏ ନିର୍ମାଣ କରି ତାକୁ ଦେବୀ ସଜାଇଥିଲେ ଦାନର ଗରିମା ବଢିଥାନ୍ତା। ଝିଅର ମଧ୍ୟ ମାତୃବିୟୋଗଜନିତ ଦୁଃଖ ଉପଶମ ହୋଇଥାନ୍ତା। ଦାନ ଆଜି ପୂର୍ବବର୍ଣ୍ଣିତ ନରୋତ୍ତମ ସାଜିଛି। ସଂସାର ମୋହ ଉଭୟଙ୍କଠାରେ ଲେପି ହୋଇଯାଇଛି। (ସିଦ୍ଧଳ, ଜଗତ୍‌ସିଂହପୁର, ମୋ-୯୯୩୭୪୫୦୫୪୦)
All Right Reserved By

ସମ୍ପାଦକୀୟ |

୫ ଫଳ

୫ ଫଳ

ସମ୍ପାଦକୀୟ/ ତଥାଗତ ସତପଥୀ

ନିକଟରେ ଶେଷ ହୋଇଥିବା ନିର୍ବାଚନ କୌଣସି ସାଧାରଣ ନିର୍ବାଚନ ନ ଥିଲା ଏବଂ ଏହାର ଫଳାଫଳରୁ ଯେଉଁ ସୂଚନା ମିଳୁଛି, ତାକୁ ମଧ୍ୟ ଉପେକ୍ଷା କରାଯାଇ ନ ପାରେ। କେବଳ ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ରେ ୬୫ ଲୋକ ସଭା ଆସନ ଥିବାରୁ ଏହା ଭବିଷ୍ୟତ ପାଇଁ ଭାବିବାର ଖୋରାକ ଯୋଗାଉଛି। ଗୋଟିଏ ବଡ଼କଥା ହେଉଛି, ଏହି ରାଜ୍ୟଗୁଡ଼ିକରୁ ୨୦୧୪ ନିର୍ବାଚନରେ କଂଗ୍ରେସ ମାତ୍ର ୩ଟି ଲୋକ ସଭା ଆସନ ଜିତିଥିଲା। ଆଗକୁ ସାଧାରଣ ନିର୍ବାଚନ ଆଉ ମାତ୍ର କେଇ ମାସ ବାକି ଥିବାବେଳେ ଏହି ଫଳାଫଳରୁ ଜଣାପଡ଼ୁଛି, ସରକାରଙ୍କର ଧନୀ-ସପକ୍ଷବାଦୀ ମନୋଭାବ ଓ ଧନୀ-ସପକ୍ଷବାଦୀ ନୀତି ନିର୍ଦ୍ଧାରଣ କରିବାର ମାନସିକତାକୁ ଜନତା ଗ୍ରହଣ କରୁନାହାନ୍ତି। ଏଥର ମଧ୍ୟପ୍ରଦେଶ ଓ ଛତିଶଗଡ଼ର ଗ୍ରାମାଞ୍ଚଳ ଲୋକ ଭାଜପା ପ୍ରତି...

ଅସ୍ପୃଶ୍ୟତା, ଲକ୍ଷ୍ମୀପୁରାଣ ଓ ବଳରାମ

ଅସ୍ପୃଶ୍ୟତା, ଲକ୍ଷ୍ମୀପୁରାଣ ଓ ବଳରାମ

ନାରାୟଣ ପଣ୍ଡା 

ଉତ୍କଳ ପଞ୍ଚସଖାଙ୍କ ମହାପାତ୍ର, ଖୁଣ୍ଟିଆ, ମହାନ୍ତି, ଦାସ ଓ ମୁନି ଇତ୍ୟାଦି ସଂଜ୍ଞା ଥିଲା। ସେମାନେ କିନ୍ତୁ ସମସ୍ତେ ନିଜକୁ ଶୂଦ୍ର ବୋଲି ପରିଚିତ କରାଇଛନ୍ତି। ସନ୍ଥ ଅଚ୍ୟୁତାନନ୍ଦଙ୍କ ଉଦୟ କାହାଣୀ ଗ୍ରନ୍ଥରେ ପଞ୍ଚସଖାମାନଙ୍କର ଜାତି ପ୍ରସଙ୍ଗରେ କୁହାଯାଇଛି, ସେମାନେ ସତ୍ୟଯୁଗରେ ବ୍ରାହ୍ମଣ, ତ୍ରେତୟାରେ କ୍ଷତ୍ରିୟ, ଦ୍ୱାପରରେ ବୈଶ୍ୟ ଓ କଳିଯୁଗରେ ଶୂଦ୍ର। ଭକ୍ତି ଧର୍ମର ବର୍ଣ୍ଣ ହେଉଛି ଶୂଦ୍ର ବର୍ଣ୍ଣ। ସେମାନଙ୍କର ସ୍ବଭାବ ମିଷ୍ଟ, ବିନୟୀ ଓ ସରଳ। ଶୂଦ୍ର ନିଜର ନିର୍ଲିପ୍ତ ସେବା ଦ୍ୱାରା ଈଶ୍ୱର ସାନ୍ନିଧ୍ୟ ଓ ଚତୁର୍ବର୍ଗ ଫଳପ୍ରାପ୍ତ ହୋଇଥାଏ। ପଞ୍ଚଦଶ ଶତାବ୍ଦୀରେ ଜନ୍ମିତ ଉତ୍କଳର ପଞ୍ଚସଖା- ବଳରାମ ଦାସ ୧୪୮୨, ଯଶୋବନ୍ତ ଦାସ ୧୪୮୨, ଅଚ୍ୟୁତାନନ୍ଦ ଦାସ ୧୪୮୫, ଶିଶୁ ଅନନ୍ତ ୧୪୮୫ ଓ ଜଗନ୍ନାଥ ଦାସ ୧୪୯୦- ସାହିତ୍ୟ ଓ ସମାଜ ସଂସ୍କାର କ୍ଷେତ୍ରରେ ତାଙ୍କର ଅମଳିନ ସ୍ବାକ୍ଷର ରଖି...

ଅସୁରକ୍ଷିତ ଆଶ୍ରମ ଗୃହ

ଅସୁରକ୍ଷିତ ଆଶ୍ରମ ଗୃହ

ପ୍ରୀତିଛନ୍ଦା ଧଳ

ନିକଟରେ ହଇଚଇ ସୃଷ୍ଟି କରିଛି ବେଲ୍‌ଟିକିରି ସେଲ୍‌ଟର ହୋମ୍‌ କାରନାମା। ‘ହାପି ଆଣ୍ଡ ହୋଲି ହୋମ୍‌’ ନାମକ ଆଶ୍ରମରେ ନାବାଳିକାମାନଙ୍କୁ ଯୌନ ନିର୍ଯାତନାର କଥା ଶୁଣି ସାଧାରଣ ଜନତାଙ୍କ ଲୋମ ଟାଙ୍କୁରି ଉଠୁଛି। କେତେ ଅସୁରକ୍ଷିତ ଆମର ଆଶ୍ରମ ଉଭୟ ଝିଅ ଓ ପୁଅମାନଙ୍କ ପାଇଁ ଏବେ ଏଠାରେ ଏକ ବଡ଼ ପ୍ରଶ୍ନ। ପ୍ରକୃତରେ ଦେଖିବାକୁ ଗଲେ ଲାଜ ଲାଗେ ଯେ ଏତେସବୁ ହୋଇଥାଏ ଆଶ୍ରମ ଗୃହରେ କିନ୍ତୁ ଆମର ପ୍ରଶାସନ ପାଖରେ କିଛି ଖବର ନ ଥାଏ। ଏହାର ଉତ୍ତର କିଏ ଦେବ ଏବଂ ଏହାର ଗୁରୁଦାୟିତ୍ୱ କାହାର? ...

ଏଇ ଭାରତରେ

ଏଇ ଭାରତରେ

ଭାରତର ବିଭିନ୍ନ ପ୍ରାନ୍ତରେ ଭିନ୍ନ ଭିନ୍ନ ପରମ୍ପରା ରହିଛି। ଏହାକୁ ସ୍ଥାନୀୟ ଲୋକେ ମାନି ଚଳିଥାଆନ୍ତି। ପରମ୍ପରାକୁ ଅମାନ୍ୟ କଲେ ଅମଙ୍ଗଳ ହୁଏ ବୋଲି ଲୋକମାନେ ବିଶ୍ୱାସ କରନ୍ତି। ତେଣୁ ସେଠାରେ ପ୍ରଥା-ପରମ୍ପରାକୁ ମାନି ଲୋକେ ଜୀବନଯାପନ କରନ୍ତି। ମଧ୍ୟପ୍ରଦେଶ ଓ ଛତିଶଗଡରେ ଏପରି ଏକ ନିଆରା ପରମ୍ପରା ରହିଛି ଯାହା ଅବିଶ୍ୱାସ ଲାଗିଲେ ମଧ୍ୟ ସତ। ଏହି ଦୁଇ ରାଜ୍ୟରେ ବାସ କରୁଥିବା ଗୋଣ୍ଡ ଜନଜାତିର ଲୋକମାନେ ଏହି ଅଜବ ପରମ୍ପରାକୁ ମାନିଥାଆନ୍ତି। ଉକ୍ତ ଜନଜାତିରେ ବିବାହ ପୂର୍ବରୁ ବରକୁ ରକ୍ତପାନ କରିବାକୁ ପଡିଥାଏ। ଏଥିପାଇଁ ବରକୁ ଘୁଷୁରି ମାରିବାକୁ ଦିଆଯାଏ। ପରେ ବ...

ସମ୍ପାଦକୀୟ/ଆସ୍ଥା ତୁଟୁଛି

ସମ୍ପାଦକୀୟ/ଆସ୍ଥା ତୁଟୁଛି

ସାଧାରଣ ନିର୍ବାଚନ ପ୍ରାୟ ୫ ମାସ ଥିବାବେଳେ ଏବେଠାରୁ ରାଜନୈତିକ ବାତାବରଣ ସରଗରମ ହେବାରେ ଲାଗିଲାଣି। କେନ୍ଦ୍ରର ନରେନ୍ଦ୍ର ମୋଦିଙ୍କ ସରକାରକୁ ଟକ୍କରଦେବା ଲାଗି ବିରୋଧୀ ଦଳଗୁଡ଼ିକ ଡିସେମ୍ବର ୧୦ରେ ନୂଆଦିଲ୍ଲୀଠାରେ ଏକତ୍ରିତ ହୋଇଛନ୍ତି। ବିଜୁ ଜନତା ଦଳ (ବିଜେଡି), ସମାଜବାଦୀ ପାର୍ଟି(ଏସ୍‌ପି) ଏବଂ ବହୁଜନ ସମାଜ ପାର୍ଟି (ବିଏସ୍‌ପି)କୁ ଛାଡ଼ିଦେଲେ ଟିଡିପି ମୁଖ୍ୟ ଏନ୍‌. ଚନ୍ଦ୍ରାବାବୁ ନାଇଡୁଙ୍କ ନେତୃତ୍ୱରେ ଅନ୍ୟାନ୍ୟ ବିରୋଧୀ ଦଳଗୁଡ଼ିକ ଶୀତକାଳୀନ ଅଧିବେଶନର ଅବ୍ୟବହିତ ପୂର୍ବରୁ ଗୋଟିଏ ମଞ୍ଚରେ ଏକାଠି ହୋଇଛନ୍ତି। ଏଭଳି ସମୟରେ ରାଷ୍ଟ୍ରୀୟ ଲୋକ ସମତା ପାର୍ଟି (ଆର୍‌ଏଲ୍‌ଏସ୍‌ପି) ସଭାପତି ଉପେନ୍ଦ୍ର କୁଶ୍‌ଓ୍ବାହା ମୋଦି ସରକାରଙ୍କ ମନ୍ତ୍ରିମଣ୍ଡଳରୁ ଇସ୍ତଫା ଦେବା ଭାଜପା ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ମୋଦି ସରକାର ତାଙ୍କୁ ଧୋକାଦେବା ସହ ଜନସାଧାରଣଙ୍କ ଆକାଂକ୍ଷା ପୂରଣ କରିବାରେ ଅସମର୍ଥ ହେବାରୁ ଇସ୍ତଫା...

 ଆଜିର ଯୁବବର୍ଗ କ୍ରୋଧିତ କାହଁକି

ଆଜିର ଯୁବବର୍ଗ କ୍ରୋଧିତ କାହଁକି

ସହଦେବ ସାହୁ

ଭାରତ ଏକ ପ୍ରାଚୀନ ସଭ୍ୟତା କିନ୍ତୁ ଏକ ଯୁବରାଷ୍ଟ୍ର। ଚାଇନା ବି ଏକ ପ୍ରାଚୀନ ସଭ୍ୟତା, କିନ୍ତୁ ସେଠାକାର କମ୍ୟୁନିଷ୍ଟ ସରକାର ପରିବାର ନିୟନ୍ତ୍ରଣ କଡ଼ାକଡ଼ି ଲାଗୁ କରିଥିବାରୁ ତାହାର ଜନସଂଖ୍ୟାରେ ବୃଦ୍ଧଙ୍କ ସଂଖ୍ୟା କାଳକ୍ରମେ ବଢ଼ିଚାଲିଲା। ଚାଇନାରେ କାମିକା ଲୋକ (୨୦ରୁ ୫୦ ବର୍ଷ)ଙ୍କ ସଂଖ୍ୟା କମିବାରେ ଲାଗିଛି। ୨୦୧୨ରେ ଦେଶରେ କାମକରିପାରିବା ଲୋକଙ୍କ ସଂଖ୍ୟା ୩୦ ଲକ୍ଷ କମିଯିବା ଦେଖି ଚାଇନା ସରକାର ଚିନ୍ତିତ ହୋଇପଡ଼ିଲେ। ଏ ଦୃଷ୍ଟିରୁ ଭାରତ ଉତ୍ତମ ସ୍ଥିତିରେ ଅଛି ବୋଲି ବିଲାତର ପ୍ରସିଦ୍ଧ ପତ୍ରିକା ‘ଦି ଇକୋ...

ଦେଶ, ରାଜନୀତି ଓ ଆଜିର ଶିକ୍ଷା

ଦେଶ, ରାଜନୀତି ଓ ଆଜିର ଶିକ୍ଷା


ଡ. ଶରତ ଚନ୍ଦ୍ର ରଥ

ଦେଶର ଅଛି ଅର୍ଥ ସମସ୍ୟା। ଅତୀତରେ ସମସ୍ୟା ଥିଲା ଆଜି ମଧ୍ୟ ଅଛି। ପ୍ରଥମେ ସମସ୍ୟାଗୁଡ଼ିକର ତାଲିକା କରିବା ଦରକାର। ତା’ପରେ ସମାଧାନର ସୂତ୍ର ବିଷୟରେ ଚିନ୍ତା, ଆଲୋଚନା ଓ ପଦକ୍ଷେପ ଗ୍ରହଣର ବ୍ୟବସ୍ଥା। ଯେହେତୁ ଆଜିକାଲି ସମସ୍ତ କ୍ଷମତା ରାଜନେତାମାନଙ୍କ ହାତରେ ଠୁଳ, ସେମାନଙ୍କର ଏସବୁ ସର୍ବାଦୌ କରଣୀୟ। ସେମାନଙ୍କୁ ବୁଦ୍ଧିଜୀବୀମାନେ ସହଯୋଗ କରିପାରନ୍ତି।...

ଏଇ ଭାରତରେ

ଏଇ ଭାରତରେ

ସବୁ ମାତାପିତା ପରିଣତ ବୟସରେ ପୁତ୍ର  ସନ୍ତାନର ମୁହଁ ଦେଖି ଖୁସି ହୁଅନ୍ତି। କିନ୍ତୁ ଯେଉଁ ମାତାପିତା ଏହି ସୁଖରୁ ବଞ୍ଚତ୍ତ ସେମାନେ ଦୁଃଖ ଅନୁଭବ କରନ୍ତି। ଏହି ପରିସ୍ଥିତିର ସାମ୍‌ନା କରିଛନ୍ତି ୬୨ବର୍ଷର ଜଣେ ମହିଳା। ଗୁଜରାଟର ସୁରତ ନଗରୀରେ ବାସ କରୁଥିବା ମଧୁବେନ ଗେହଲଟ୍‌ ନାମ୍ନୀ ଏହି ମହିଳା ୬୨ବର୍ଷ ...

ପିଲାଙ୍କ ବସ୍ତାନି ବୋଝ

ପିଲାଙ୍କ ବସ୍ତାନି ବୋଝ

ପିଲାଙ୍କ ସ୍କୁଲ ବ୍ୟାଗ୍‌ ନିଜ ଓଜନଠାରୁ ଅଧିକ ହୋଇଯାଉଥିବାରୁ ନିକଟରେ ସୁପ୍ରିମକୋର୍ଟ ଉଦ୍‌ବେଗ ପ୍ରକାଶ କରିଛନ୍ତି। ନୂଆକରି ସ୍କୁଲ ଯାଉଥିବା ପ୍ରଥମ ଓ ଦ୍ୱିତୀୟ ଶ୍ରେଣୀର ଛାତ୍ରୀଛାତ୍ରଙ୍କୁ ଅତ୍ୟଧିକ ହୋମ୍‌ୱାର୍କ ଦେଇ ଚାପଗ୍ରସ୍ତ କରାଯାଉଛି। ତେଣୁ ଏ ଦିଗରେ ନ୍ୟାୟାଳୟଙ୍କ ନିର୍ଦ୍ଦେଶନାମା ପରେ କେନ୍ଦ୍ର ସରକାର ତପତ୍ର ହୋଇଛନ୍ତି। ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଖୁବ୍‌ଶୀଘ୍ର ଏ ନେଇ ନିୟମାବଳୀ ପ୍ରସ୍ତୁତ କରିବା ପାଇଁ ସରକାରଙ୍କ ନିର୍ଦ୍ଦେଶ ରହିଛି।

ମିଛୁଆ ବନ ବିଭାଗ

ମିଛୁଆ ବନ ବିଭାଗ

ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟରେ ମହାବଳ ବାଘ ‘ମହାବୀର’ ମୃତ୍ୟୁ ଘଟଣା ଜାତୀୟ ସ୍ତରରେ ଆଲୋଡ଼ନ ସୃଷ୍ଟି କରିଥିଲା। ନଭେମ୍ବର ୧୪ରେ ତା’ ମୃତଦେହ ମିଳିବା ପରେ ଶବ ବ୍ୟବଚ୍ଛେଦ କରାଯାଇଥିଲା। 

ଭୂଲୁଣ୍ଠିତ ମାନବାଧିକାର

ଭୂଲୁଣ୍ଠିତ ମାନବାଧିକାର

ଆଜି ତମାମ ବିଶ୍ୱରେ ୭୦ତମ ମାନବାଧିକାର ଦିବସ ପାଳନ ହେଉଛି। ୧୯୪୮ ଡିସେମ୍ବର ୧୦ ତାରିଖ ଆଜିର ଦିନରେ ଜାତିସଂଘ ବିଶ୍ୱବାସୀଙ୍କ କଲ୍ୟାଣ ନିମନ୍ତେ ଅର୍ପଣ କରିଥିଲା ଐତିହାସିକ ସାର୍ବଜନୀନ ବିଶ୍ୱ ମାନବାଧିକାର ଘୋଷଣାପତ୍ର। 

ବାକ୍‌ ସ୍ବାଧୀନତା

ବାକ୍‌ ସ୍ବାଧୀନତା

ଆକାର ପଟେଲ

ଆକ୍ରମଣାତ୍ମକ ବକ୍ତବ୍ୟକୁ ନେଇ ପ୍ରତିକ୍ରିୟାହୀନ ରହୁଥିବା ଦେଶଗୁଡ଼ିକ ପ୍ରାୟତଃ ଉନ୍ନତି କରିବାର ସମ୍ଭାବନା ଅଧିକ ଥାଏ। ପ୍ରତିବର୍ଷ ମାନବ ସ୍ବାଧୀନତା ସୂଚକାଙ୍କ (ହ୍ୟୁମାନ୍‌ ଫ୍ରିଡମ୍‌ ଇଣ୍ଡେକ୍ସ)ର ଆକଳନ କରୁଥିବା କାଟୋ ଇନ୍‌ଷ୍ଟିଚ୍ୟୁଟ୍‌ ଏ ଦିଗରେ ସବୁଠୁ ମୁକ୍ତ ବା ସ୍ବାଧୀନ ଦେଶରୂପେ ସ୍ବିଜରଲାଣ୍ଡ, ନ୍ୟୁଜିଲାଣ୍ଡ, ଫିନ୍‌ଲାଣ୍ଡ, ନର୍‌ଓ୍ବେ, ଡେନ୍‌ମାର୍କ, ନେଦରଲାଣ୍ଡ ଓ ଇଂଲଣ୍ଡକୁ ବିବେଚନା କରିଛି।