Dharitri News
ରାଜ୍ୟ |

ପ୍ରଚାର ପାଇଁ ସଜବାଜ

ପ୍ରଚାର ପାଇଁ ସଜବାଜ ଭୁବନେଶ୍ୱର,୮।୨(ବ୍ୟୁରୋ)- ଫେବୃୟାରୀ ୨୪ରେ ହେବାକୁ ଥିବା ବିଜେପୁର ଉପନିର୍ବାଚନ ପାଇଁ ପ୍ରାର୍ଥତ୍ପତ୍ର ଦାଖଲ ଶେଷ ହୋଇଛି। ଯାଞ୍ଚ ମଧ୍ୟ ବୁଧବାର ସରିଛି। ଏବେ ସବୁଦଳ ପ୍ରଚାର ପାଇଁ ଅଣ୍ଟା ଭିଡିଲେଣି। ରାଜ୍ୟ ରାଜନୀତି କୁନ୍ଦୁଲି ଓ ମହାନଦୀ ପ୍ରସଙ୍ଗକୁ ନେଇ ଜୋର ଧରିଛି। ମାତ୍ର ବିଜେପୁରରେ ସ୍ଥାନୀୟ ସମସ୍ୟାକୁ ନେଇ ଦଳଗୁଡିକ ପ୍ରଚାରକୁ ଓହ୍ଲାଇବେ ବୋଲି କୁହାଯାଉଛି। ଧାନର ସର୍ବନିମ୍ନ ସହାୟକ ମୂଲ୍ୟ(ଏମ୍‌ଏସ୍‌ପି) ବୃଦ୍ଧି ନେଇ ବିଜେଡି କେନ୍ଦ୍ରକୁ ସମାଲୋଚନା କରିଆସିଛି। ତେଣୁ ଦଳ ଏମ୍‌ଏସ୍‌ପି ପ୍ରସଙ୍ଗକୁ ମୁଖ୍ୟ ନିର୍ବାଚନୀ ପ୍ରସଙ୍ଗ କରିପାରେ। ରାଜ୍ୟ ସରକାର ଧାନର ଏମ୍‌ଏସ୍‌ପି କୁଇଣ୍ଟାଲ ପିଛା ୨୯୩୦ ଟଙ୍କା ଦାବି କରିଥିବା ବେଳେ ସ୍ଥାନୀୟ ଚାଷୀ ଉପାୟ ଶୂନ୍ୟ ହୋଇ ୮୦୦ଟଙ୍କାରେ ବିକୁଥିବା ଜଣାପଡିଛି। ଏହା ମଧ୍ୟ ରାଜନୈତିକ ଦଳ ଗୁଡିକର ନିର୍ବାଚନୀ ପ୍ରସଙ୍ଗ ହେବ ବୋଲି ରାଜନୈତିକ ମହଲ ବିଶ୍ୱାସ କରୁଛି। ପ୍ରକାଶ ଯେ, ବିଧାୟକ ସୁବଳ ସାହୁଙ୍କ ମୃତ୍ୟୁ ପରେ ବିଜେପୁର ବିଧାନସଭା ଆସନ ଉପନିର୍ବାଚନ ନିଶ୍ଚିତ ଜାଣିବା ପରେ ଗତବର୍ଷ ଅକ୍ଟୋବର ପରଠାରୁ ପ୍ରାୟ ସବୁ ଦଳ ନିଜ ପ୍ରସ୍ତୁତି ଆରମ୍ଭ କରିଥିଲେ। ଏବେ ଚୂଡାନ୍ତ ରୂପ ଦେବା ପାଇଁ ପ୍ରୟାସ କରାଯାଉଛି। ମଙ୍ଗଳବାର ନବୀନ ନିବାସରେ ହୋଇଥିବା ଏକ ମିଶ୍ରଣ ପର୍ବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳୀୟ ପ୍ରାର୍ଥୀଙ୍କ ସକାଶେ ବିଜେପୁର ପ୍ରଚାରରେ ଯିବେ ବୋଲି ଘୋଷଣା କରିଛନ୍ତି । ଏହା ବିଜେଡି କର୍ମୀଙ୍କୁ ଉଲ୍ଲସିତ କରିଛି। ମୁଖ୍ୟମନ୍ତ୍ରୀ ଗାଇସିଲଟ୍‌ ଏବଂ ବରପାଲିରେ ୧୯ ତାରିଖରେ ଏବଂ ବିଜେପୁରରେ ୨୧ରେ ପ୍ରଚାର କରିବେ ବୋଲି ଜଣାପଡିଛି। ମୁଖ୍ୟମନ୍ତ୍ରୀଙ୍କ ଗସ୍ତ ପୂର୍ବରୁ ଦଳର ଛାମୁଆ ସଙ୍ଗଠକମାନେ ସେଠାରେ ଡେରା ପକାଇଛନ୍ତି। ତୃଣମୂଳସ୍ତରୀୟ କର୍ମୀ ସମ୍ମିଳନୀ ସରିଗଲେ ମୁଖ୍ୟମନ୍ତ୍ରୀ ପ୍ରଚାରକୁ ଆସିବେ। ସେହିପରି ୨ ଡଜନରୁ ଅଧିକ ଷ୍ଟାର କ୍ୟାମ୍ପନରଙ୍କୁ ନେଇ ବିଜେଡି ତାଲିକା ପ୍ରସ୍ତୁତ କରୁଛି। ଦିନେ ଦୁଇଦିନ ମଧ୍ୟରେ ଏହି ତାଲିକା ପ୍ରକାଶ ପାଇବ । ବିଜେଡି ପରି ଭାଜପା ମଧ୍ୟ ପ୍ରଚାର ପାଇଁ ପାଗ ଭିଡିଲାଣି। ମହାନଦୀ ପ୍ରସଙ୍ଗରେ ରାଜନୈତିକ ସମାଲୋଚନା ଦୃଷ୍ଟିରୁ ଭାଜପା ଅଡୁଆରେ ଥିଲେ ମଧ୍ୟ ପଡୋଶୀ ଛତିଶଗଡ଼ ରାଜ୍ୟର ମୁଖ୍ୟମନ୍ତ୍ରୀ ରମଣ ସିଂଙ୍କୁ ପ୍ରଚାରକୁ ଆଣିବ। ହେଲେ ରମଣଙ୍କୁ ସ୍ଥାନୀୟ ମହଲରେ ନାପସନ୍ଦ କରାଯାଇପାରେ ବୋଲି ରାଜନୈତିକ ସମୀକ୍ଷକ ମତ ଦେଇଛନ୍ତି। ଏତଦ୍‌ ବ୍ୟତୀତ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ, ରାଧାମୋହନ ସିଂ, ରାମକ୍ରିପାଲ ଯାଦବ ଏବଂ ସନ୍ତୋଷ ଗଙ୍ଗୱାର ପ୍ରମୁଖ ବିଜେପୁରକୁ ଆସି ଦଳୀୟ ପ୍ରାର୍ଥୀଙ୍କ ସପକ୍ଷରେ ପ୍ରଚାର କରିବେ ବୋଲି କୁହାଯାଉଛି। ଭାଜପା ଏକାଧିକ କେନ୍ଦ୍ରମନ୍ତ୍ରୀଙ୍କୁ ପ୍ରଚାରକୁ ଆଣୁଥିବାରୁ ବିଜେଡି ଏହାର ସମାଲୋଚନା କରିଛି। ଦଳର ମୁଖପାତ୍ର ଅମର ଶତପଥୀ କହିଛନ୍ତି ଯେ, ନବୀନବାବୁଙ୍କ ପ୍ରତି ଜନସମର୍ଥନ ରହିଛି। ଯେଉଁମାନେ ଡରିଯାଇଛନ୍ତି , ସେମାନେ ତାଙ୍କୁ ମୁକାବିଲା କରିବା ପାଇଁ ଏକାଧିକ ନେତା ଆଣୁଛନ୍ତି। ଲୋକେ କିନ୍ତୁ ଠିକ ପ୍ରାର୍ଥୀଙ୍କୁ ଭୋଟ ଦେବେ ବୋଲି ଅମର କହିଛନ୍ତି। କଂଗ୍ରେସ ମଧ୍ୟ ରମଣ ସିଂଙ୍କୁ ପ୍ରଚାରକୁ ଅଣାଯିବା ଯୋଜନାର ସମାଲୋଚନା କରିଛି। ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା କହିଛନ୍ତି ଯେ, ରମଣଙ୍କ ଭ୍ରମଣ କଷ୍ଟଦାୟକ ହେବ। ଉପରମୁଣ୍ଡରେ ନିର୍ମାଣ ବନ୍ଦ ନ କରି ପ୍ରଚାରକୁ ଆସିବା ହାସ୍ୟାସ୍ପଦ। ଓଡ଼ିଶାର ଜଳକୁ ଅଟକାଇ ଓଡ଼ିଆଙ୍କୁ ଭୋଟ ମାଗିବା ଅଭିନୟ ଚଳିବ ନାହିଁ ବୋଲି ସେ କହିଛନ୍ତି।

ରାଜ୍ୟ |

୬ ଦାବି ମାନିଲେ ସରକାର: ଓଡ଼ିଶା ସ୍କୁଲ କଲେଜ ଶିକ୍ଷକ ମିଳିତ ମଞ୍ଚର ଆନ୍ଦୋଳନ ସ୍ଥଗିତ

୬ ଦାବି ମାନିଲେ ସରକାର: ଓଡ଼ିଶା ସ୍କୁଲ କଲେଜ ଶିକ୍ଷକ ମିଳିତ ମଞ୍ଚର ଆନ୍ଦୋଳନ ସ୍ଥଗିତ

ଭୁବନେଶ୍ୱର,୧୮।୨ (ବ୍ୟୁରୋ): ଆଉ ୮ଦିନ ପରେ ରାଜ୍ୟରେ ମାଟ୍ରିକ୍‌ ପରୀକ୍ଷା ଆରମ୍ଭ। ପରୀକ୍ଷାକୁ ଦୃଷ୍ଟିରେ ରଖି ସରକାର ଶିକ୍ଷକଙ୍କ ପାଖରେ ନରମିଛନ୍ତି। ଏପରିକି, ରବିବାର ସଚିବାଳୟ ଛୁଟି ଥିଲେ ମଧ୍ୟ ଶିକ୍ଷକଙ୍କ ସହିତ ଆଲୋଚନା ପାଇଁ ଖୋଲାଯାଇଥିଲା। ସକାଳ ୮ଟାରେ ଉଚ୍ଚଶିକ୍ଷା ମନ୍ତ୍ରୀ ଅନନ୍ତ ଦାସ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ବଦ୍ରିନାରାୟଣ ପାତ୍ର, ଉଚ୍ଚଶିକ୍ଷା ସଚିବ ଜି.ଭି.ଭି ଶର୍ମା ଏବଂ ବିଦ୍ୟାଳୟ ଓ ଗଣଶିକ୍ଷା ପ୍ରମୁଖ ସଚିବ ପି.କେ ମହାପାତ୍ର ସଚିବାଳୟ ଆସିଥିଲେ। ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚର ୭ ଦଫା ଦାବିପତ୍ର ଉପରେ ସରକାର ଆଲୋଚନା କରି ୭ଦଫା ଦାବି ମଧ୍ୟରୁ ୬ଟି ଦାବିକୁ ପୂରଣ କରିବା ପାଇଁ ପ୍ରତିନିଧି ଦଳଙ୍କୁ ପ୍ରତିଶ୍ରୁତି ଦେଇଛନ୍ତି। ପ୍ରତିଶ୍ରୁତି ପାଇବା ପରେ ମିଳିତ ମଞ୍ଚ ମାର୍ଚ୍ଚ ୮ ତାରିଖ ପର୍ଯ୍ୟନ୍ତ ଆନ୍ଦୋଳନକୁ ସାମୟିକ ଭାବେ ସ୍ଥଗିତ ରଖିଛନ୍ତି ବୋଲି ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ମିଳିତ ମଞ୍ଚର ଆବାହକ ପବିତ୍ର ମହାଲା କହିଛନ୍ତି। ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ବଦ୍ରିନାରାୟଣ ପାତ୍ର କହିଛନ୍ତି ଯେ, ଶିକ୍ଷକଙ୍କ ଦାବିକୁ ସରକାର ବିଚାର କରୁଛନ୍ତି।

ବିମାନରେ ବାର୍ଡ ହିଟ୍‌ : ବର୍ତ୍ତିଲେ ୧୯୧ଯାତ୍ରୀ

ବିମାନରେ ବାର୍ଡ ହିଟ୍‌ : ବର୍ତ୍ତିଲେ ୧୯୧ଯାତ୍ରୀ

ଭୁବନେଶ୍ୱର, ୧୮।୨(ବ୍ୟୁରୋ)- ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ରବିବାର ଏକ ଇଣ୍ଡିଗୋ ବିମାନ ବାର୍ଡହିଟ୍‌ର ସମ୍ମୁଖୀନ ହୋଇଛି। ଫଳରେ ବିମାନଟି ଦୁର୍ଘଟଣାରୁ ଅଳ୍ପକେ ବର୍ତ୍ତିଯାଇଛି। ରବିବାର ସନ୍ଧ୍ୟା ୬ଟା ୨୯ରେ ଭୁବନେଶ୍ୱରରୁ ଦିଲ୍ଲୀ ଯିବା ପାଇଁ ଇଣ୍ଡିଗୋ ବିମାନ ୬ଇ୩୧୪ ଏୟାରବସ୍‌ ୩୨୦ ପ୍ରସ୍ତୁତ ହୋଇଥିଲା। ଏଥିରେ ୧୯୧ ଯାତ୍ରୀ ଥିଲେ। ଉଡ଼ାଣ ପୂର୍ବରୁ ବିମାନଟି ରନ୍‌ଓ୍ବେରେ ଚାଲୁଥିବାବେଳେ ସେଥିରେ ଏକ ପକ୍ଷୀ ମାଡ଼ ହୋଇ ରନ୍‌ଓ୍ବେରେ ପଡ଼ିଥିଲା।

କ୍ରମବର୍ଦ୍ଧିଷ୍ଣୁ ଶିଳ୍ପାୟନ ପ୍ରଭାବ: ସଙ୍କୁଚିତ ହେଉଛି ହେନ୍ତାଳ ବଣ

କ୍ରମବର୍ଦ୍ଧିଷ୍ଣୁ ଶିଳ୍ପାୟନ ପ୍ରଭାବ: ସଙ୍କୁଚିତ ହେଉଛି ହେନ୍ତାଳ ବଣ

ପାରାଦୀପ,୧୮ା୨(ସ୍ବ.ପ୍ର): ଉପକୂଳର ସୁରକ୍ଷା କବଚ ହେଉଛି ପ୍ରାକୃତିକ ସବୁଜିମାରେ ପୂର୍ଣ୍ଣ ହେନ୍ତାଳ ବଣ। ତେବେ କ୍ରମବର୍ଦ୍ଧିଷ୍ଣୁ ଶିଳ୍ପାୟନ ପ୍ରଭାବରେ ପାରାଦୀପରେ ଥିବା ଏହି ହେନ୍ତାଳବଣ ଏବେ ସଙ୍କୁଚିତ ହେବାରେ ଲାଗିଛି। ଏକଦା ମହାନଦୀ ମୁହାଣ ଓ ଜଟାଧାର ମୁହାଣ ମଧ୍ୟସ୍ଥଳରେ ଏହି ହେନ୍ତାଳବଣ ଭୁରପୁର ଥିଲା। ଏବେ ଅଠରବାଙ୍କୀରୁ ନେହେରୁ ବଙ୍ଗଳା ପର୍ଯ୍ୟନ୍ତ ଥିବା କାଉଡିଆ ନଦୀ ପାର୍ଶ୍ୱରେ ସେହି ହେନ୍ତାଳ ବଣ କିଛିକାଂଶରେ ସୁରକ୍ଷିତ ଅଛି। ସମ୍ପ୍ରତି ବନ୍ଦର ସମ୍ପ୍ରସାରଣ ପାଇଁ ଏହି ଜଙ୍ଗଲ ଲୀନ ହେବାକୁଯାଉଛି।

ବରଯାତ୍ରୀ ଗାଡ଼ି ଦୁର୍ଘଟଣା: ବର ବାପା, ମାମୁଁ ମୃତ, ବର ସମେତ ୫ଜଣ ଗୁରୁତର

ବରଯାତ୍ରୀ ଗାଡ଼ି ଦୁର୍ଘଟଣା: ବର ବାପା, ମାମୁଁ ମୃତ, ବର ସମେତ ୫ଜଣ ଗୁରୁତର

ଭବାନୀପାଟଣା, ୧୮।୨ (ଡି.ଏନ୍‌.ଏ.)-କଳାହାଣ୍ଡି ଜିଲା ଭବାନୀପାଟଣାରୁ ୧୪ କି.ମି. ଦୂର କର୍ଲାପଡା ଅଭୟାରଣ୍ୟ ଖଇରମାଲ ଗ୍ରାମ ନିକଟରେ ରବିବାର ଭୋର ଏକ ବରଯାତ୍ରୀ ଗାଡ଼ି ଦୁର୍ଘଟଣାଗ୍ରସ୍ତ ହୋଇଛି। ଗାଡ଼ିଟି ଛତିଶଗଡ଼ ରାୟପୁରରୁ ଭବାନୀପାଟଣା ସହରର ଅର୍କାବାହାଲିପଡାକୁ ଆସୁଥିଲା। ଗାଡ଼ିରେ ବସିଥିବା ବର ବାପା, ମାମୁଁଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ଗାଡ଼ି ଡ୍ରାଇଭର ଓ ବର ସମେତ ୫ଜଣ ଗୁରୁତର ଆହତ ହୋଇଛନ୍ତ। ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।

ମାର୍ଚ୍ଚ ୯ ଯାଏ ମିଳିତ ଶିକ୍ଷକ ମଞ୍ଚର ଆନ୍ଦୋଳନ ସ୍ଥଗିତ

ମାର୍ଚ୍ଚ ୯ ଯାଏ ମିଳିତ ଶିକ୍ଷକ ମଞ୍ଚର ଆନ୍ଦୋଳନ ସ୍ଥଗିତ

ଭୁବନେଶ୍ୱର, ୧୮।୨(ବ୍ୟୁରୋ): ଦଶଦିନ ଧରି ୭ ଦଫା ଦାବିନେଇ ଓଡ଼ିଶା ସ୍କୁଲ, କଲେଜ ଶିକ୍ଷକ ଓ କର୍ମଚାରୀ ମିଳିତ ମଞ୍ଚ ଆନ୍ଦୋଳନକୁ ଓହ୍ଲାଇଥିଲା। ରବିବାର ସରକାରଙ୍କଠାରୁ ୬ଟି ଦାବି ପୂରଣ କରାଯିବାର ପ୍ରତିଶ୍ରୁତି ମିଳିବା ପରେ ମାର୍ଚ୍ଚ ୯ ତାରିଖ ପର୍ଯ୍ୟନ୍ତ ଆନ୍ଦୋଳନକୁ ସାମୂହିକ ଭାବେ ସ୍ଥଗିତ ରଖିବା ପାଇଁ ମିଳିତ ଶିକ୍ଷକ ମଞ୍ଚ ନିଷ୍ପତ୍ତି ନେଇଛି।

ବାଇକ୍‌ ଉପରେ ଚଢ଼ିଗଲା ଟୁରିଷ୍ଟ ବସ୍‌, ଯୁବକ ମୃତ

ବାଇକ୍‌ ଉପରେ ଚଢ଼ିଗଲା ଟୁରିଷ୍ଟ ବସ୍‌, ଯୁବକ ମୃତ

ପୁରୀ ଅଫିସ/ବ୍ରହ୍ମଗିରି, ୧୮।୨(ଡି.ଏନ୍‌.ଏ.): ପୁରୀ-ବ୍ରହ୍ମଗିରି ଜାତୀୟ ରାଜପଥରେ ରବିବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଟୁରିଷ୍ଟ ବସ୍‌ ବାଇକ୍‌ ଉପରେ ଚଢ଼ିଯିବାରୁ ଘଟଣାସ୍ଥଳରେ ବାଇକ୍‌ ଚାଳକଙ୍କ ମୃତ୍ୟୁ ଘଟିଛି। ମୃତକ ହେଲେ ବାସେଳିସାହି ଥାନା ଅଧୀନ ହାତୀକୁଞ୍ଜ ଲେନ୍‌ର ଦେବାଶିଷ ମହାପାତ୍ର(୩୦)।

କୁନ୍ଦୁଲୀ ଗଣବଳାତ୍କାର ମାମଲା: ଆନ୍ଦୋଳନ କରିବ କଂଗ୍ରେସ

କୁନ୍ଦୁଲୀ ଗଣବଳାତ୍କାର ମାମଲା: ଆନ୍ଦୋଳନ କରିବ କଂଗ୍ରେସ

ଭୁବନେଶ୍ୱର, ୧୮।୨(ବ୍ୟୁରୋ): କୁନ୍ଦୁଲି ଗଣବଳାତ୍କାର ମାମଲାରେ ପୀଡିତାଙ୍କୁ ନ୍ୟାୟ ଦେବାପାଇଁ କଂଗ୍ରେସ ଆନ୍ଦୋଳନ ଜାରି ରଖିବ । କଂଗ୍ରେସ ଭବନଠାରେ ରବିବାର ଆୟୋଜିତ ଖବରଦାତା ସମ୍ମିଳନୀରେ ଦଳର ଏସ୍‌ସି ମୋର୍ଚ୍ଚା ଅଧ୍ୟକ୍ଷ ତଥା ବିଧାୟକ କୃଷ୍ଣଚନ୍ଦ୍ର ଶଗରିଆ ଏହି ସୂଚନା ଦେଇଛନ୍ତି।

ଚିଟ୍‌ଫଣ୍ଡ ମାମଲା: ୩୦ ସଂସ୍ଥାକୁ ନୋଟିସ

କଟକ ଅଫିସ, ୧୭।୨- ଚିଟ୍‌ଫଣ୍ଡ ମାମଲାରେ ଶନିବାର ଜଷ୍ଟିସ୍‌ ମଦନମୋହନ ଦାସ ତଦନ୍ତ କମିଶନ ୩୦ଟି ସଂସ୍ଥାକୁ କ୍ଷୂଦ୍ର ଜମାକାରୀଙ୍କ ସମ୍ପର୍କରେ ପକ୍ଷ ରଖିବା ପାଇଁ ନୋଟିସ ଜାରି କରିଛନ୍ତି। ଉକ୍ତ ସଂସ୍ଥାଗୁଡିକର ପାଖାପାଖି ୩୦ହଜାରରୁ ଊର୍ଦ୍ଧ୍ୱ କ୍ଷୂଦ୍ର ଜମାକାରୀଙ୍କୁ ଚିହ୍ନଟ କରାଯାଇଛି। ଚିହ୍ନଟ ହୋଇଥିବା କ୍ଷୁଦ୍ର ଜମାକାରୀଙ୍କ ମଧ୍ୟରେ ଗ୍ରୀନ୍‌ ରେ’ ଇଣ୍ଟରନ୍ୟାଶନାଲ ପ୍ରାଇଭେଟ ଲିମିଟେଡ୍‌, ଆଇକୋର୍‌ ସର୍ଭିସ ଭଳି ଅନେକ ସଂସ୍ଥା ରହିଛି। ସୂଚନା ଥାଉକି, କମିଶନ ତାଙ୍କର ତଦନ୍ତ ଜାରି ରଖିଛନ୍ତି। ଇତି ମଧ୍ୟରେ ରାଜ୍ୟ ସରକାରଙ୍କୁ ୪ଟି ରିପୋର୍ଟ ପ୍ରଦାନ କରିଛନ୍ତି। ୫ମ ପର୍ଯ୍ୟାୟ ସତ୍ୟପାଠ ଯାଞ୍ଚ କରାଯାଇ କ୍ଷୂଦ୍ର ଜମାକାରୀ(୧୦ହଜାର ଟଙ୍କାରୁ କମ) ଚିହ୍ନଟ ପ୍ରକ୍ରିୟା ଜାରି ରହିଛି।

ନବମ ଶ୍ରେଣୀ ଧନ୍ଦାମୂଳକ ପରୀକ୍ଷା ମାର୍ଚ୍ଚ ୭ରେ: ଅନ୍‌ଲାଇନ୍‌ରେ ଆଡ୍‌ମିଟ୍‌ କାର୍ଡ

ନବମ ଶ୍ରେଣୀ ଧନ୍ଦାମୂଳକ ପରୀକ୍ଷା ମାର୍ଚ୍ଚ ୭ରେ: ଅନ୍‌ଲାଇନ୍‌ରେ ଆଡ୍‌ମିଟ୍‌ କାର୍ଡ

କଟକ ଅଫିସ,୧୭।୨- ନବମ ଶ୍ରେଣୀ ଧନ୍ଦାମୂଳକ ଥିଓରି ପରୀକ୍ଷା ଆସନ୍ତା ମାର୍ଚ୍ଚ ୭ରେ ଅନୁଷ୍ଠିତ ହେବ। ସକାଳ ୯ଟାରୁ ୧୦ଟା ପର୍ଯ୍ୟନ୍ତ ମୋଟ ୬ଟି ଟ୍ରେଡ୍‌ରେ ପରୀକ୍ଷା ହେବ। ସେଗୁଡ଼ିକ ହେଲା ଟ୍ରାଭେଲ ଆଣ୍ଡ୍‌ ଟୁରିଜମ୍‌, ଇନ୍‌ଫରମେଶନ ଟେକ୍ନୋଲୋଜି ଏନାବ୍‌ଲଡ୍‌ ସର୍ଭିସ, ରିଟେଲ ଟ୍ରେଡ୍‌, ବ୍ୟାଙ୍କିଂ ଫାଇନାନ୍‌ସିଆଲ ସର୍ଭିସ ଆଣ୍ଡ୍‌ ଇନ୍‌ସ୍ୟୁରାନ୍ସ, ହେଲ୍‌ଥ କେୟାର, ବିଉଟି ଆଣ୍ଡ୍‌ ୱେଲନେସ୍‌। ରାଜ୍ୟର ୩୧୩ଟି ହାଇସ୍କୁଲର ଛାତ୍ରୀଛାତ୍ର ୩୧୧ଟି କେନ୍ଦ୍ରରେ ପରୀକ୍ଷା ଦେବେ। ସେହିପରି ପ୍ରାକ୍ଟିକାଲ ପରୀକ୍ଷା ଏପ୍ରିଲ ଦ୍ୱିତୀୟ ସପ୍ତାହରେ ହେବ। ଏଥିପାଇଁ ପରୀକ୍ଷାର୍ଥୀଙ୍କ ଆଡ୍‌ମିଟ୍‌ କାର୍ଡ ଶନିବାରଠାରୁ ଅନ୍‌ଲାଇନ୍‌ରେ ଉପଲବ୍ଧ ହୋଇଛି। ମାଧ୍ୟମିକ ଶିକ୍ଷା ପରିଷଦ (ବୋର୍ଡ)ର ୱେବ୍‌ସାଇଟ୍‌ (www.bseodisha.ac.in)ରେ ହାଇସ୍କୁଲ ମୁଖ୍ୟମାନେ ସ୍କୁଲ କୋଡ୍‌ ଓ ପାସ୍‌ୱାର୍ଡ ପ୍ରଦାନ କରି ପରୀକ୍ଷାର୍ଥୀଙ୍କ ଆଡ୍‌ମିଟ୍‌ କାର୍ଡ ଡାଉନଲୋଡ୍‌ କରିପାରିବେ ବୋଲି ବୋର୍ଡର ପରୀକ୍ଷା ନିୟନ୍ତ୍ରକ ଡ. ନୀହାର ରଞ୍ଜନ ମହାନ୍ତି ସୂଚନା ଦେଇଛନ୍ତି।

ସାରଥିଙ୍କ ବିରୋଧରେ ଇଡ଼ିର ମାମଲା: ଆଗୁଆ ଜାମିନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ

ସାରଥିଙ୍କ ବିରୋଧରେ ଇଡ଼ିର ମାମଲା: ଆଗୁଆ ଜାମିନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ

କଟକ ଅଫିସ, ୧୭।୨- ସାରଥି ଓରଫ ସନ୍ତୋଷ ରାଉଳଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ପକ୍ଷରୁ ଏକ ମାମଲା ରୁଜୁ କରାଯାଇଛି। ଏହି ମାମଲାରେ ଆଗୁଆ ଜାମିନ ପାଇଁ ସାରଥି ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।

ସରକାରୀ ଅର୍ଥ ହେରଫେର: ପୂର୍ବତନ ବିଡିଓଙ୍କ ସମେତ ୩ ଦଣ୍ଡିତ

କଟକ ଅଫିସ, ୧୭।୨-ସରକାରୀ ଅର୍ଥ ହେରଫେର ମାମଲାରେ ଭିଜିଲାନ୍ସ ଅଦାଲତରେ ଦଣ୍ଡିତ ହୋଇଛନ୍ତି ନୂଆପଡା ଜିଲା ସିନାପାଲି ବ୍ଲକର ପୂର୍ବତନ ବିଡିଓ ସୁନୀଲ କୁମାର ସାହୁ। ଉକ୍ତ ମାମଲାରେ ବିଡିଓ ସାହୁଙ୍କ ସମେତ ବ୍ଲକର ତତ୍କାଳୀନ କିରାଣୀ ଦିବାକର ଦୁର୍ଗା ଓ ଖରିଆରରୋଡଠାରେ ଥିବା ଏକ ଘରୋଇ ସଂସ୍ଥାର ମାଲିକ ତାରା ଚାନ୍ଦ ଅଗ୍ରୱାଲଙ୍କୁ ମଧ୍ୟ ଦଣ୍ଡିତ କରାଯାଇଛି।

ମୁଖ୍ୟମନ୍ତ୍ରୀଙ୍କୁ ଭେଟିଲେ ଜାତିସଂଘ ପ୍ରତିନିଧି

ମୁଖ୍ୟମନ୍ତ୍ରୀଙ୍କୁ ଭେଟିଲେ ଜାତିସଂଘ ପ୍ରତିନିଧି

ଭୁବନେଶ୍ୱର,୧୭।୨(ବ୍ୟୁରୋ)ଜାତିସଂଘ(ୟୁଏନ୍‌)ର ଏକାଧିକ ମହାବିଦ୍ୟାଳୟର ପ୍ରତିନିଧିଗଣ ଶନିବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସଚିବାଳୟରେ ଭେଟିଛନ୍ତି। ଏମାନଙ୍କ ମଧ୍ୟରେ ଥିଲେ ପାଟ୍ରିକ୍‌ ଭାନ୍‌ ୱିରେଲ୍ଟ , ସିମୋନା ସ, ନିସ୍ଥା ସତ୍ୟମ, ଦୀପା ପ୍ରସାଦ । ପ୍ରତିନିଧିମାନଙ୍କ ସହ ମୁଖ୍ୟମନ୍ତ୍ରୀଙ୍କ ବୈଠକରେ ରାଜ୍ୟ ସରକାରଙ୍କ ଦ୍ୱାରା କରାଯାଉଥିବା ବିଭିନ୍ନ ସାମାଜିକ କାର୍ଯ୍ୟକ୍ରମ ସମ୍ପର୍କରେ ଆଲୋନା କରାଯାଇଥିଲା। କିପରି ଭାବେ ମହିଳା ସଶକ୍ତୀକରଣ ଦ୍ୱାରା ନିରନ୍ତର ବିକାଶ ସମ୍ଭବ ହୋଇପାରିଛି, ସେ ସମ୍ପର୍କରେ ଆଲୋନା ହୋଇଥିଲା। ଆଗାମୀ ଦିନରେ ରାଜ୍ୟ ସରକାର ଏବଂ ଜାତିସଂଘ ସହଭାଗିତା ନିରନ୍ତର ବିକାଶ ଲକ୍ଷ୍ୟ ହାସଲ ଦିଗରେ ସହାୟକ ହେବ ବୋଲି ଉଭୟେ ଆଶାବାଦୀ ଅଛନ୍ତି।