ଭୁବନେଶ୍ୱର, ୩୦।୧(ବ୍ୟୁରୋ): ଭୁବନେଶ୍ୱରର ଏକ ମହାବିଦ୍ୟାଳୟ କ୍ୟାମ୍ପସରେ ଜନୈକ ଛାତ୍ରୀଙ୍କୁ ନିଶାବଟିକା ଦିଆଯାଇଥିବା କ୍ୟାପିଟାଲ ଥାନାରେ ଅଭିଯୋଗ ହୋଇଛି। ଏ ନେଇ ପୀଡ଼ିତାଙ୍କ ବାପା କ୍ୟାପିଟାଲ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ସୋମବାର ସକାଳେ ଝିଅର ପରୀକ୍ଷା ଥିବାରୁ ତାଙ୍କ ବାପା ନେଇ କଲେଜରେ ଛାଡିଥିଲେ। ଝିଅ ଘରକୁ ଫେରିବାରେ ବିଳମ୍ବ ହେବାରୁ ତାଙ୍କ ବଡ଼ ଭଉଣୀ ସ୍କୁଲକୁ ଯାଇ ତାଙ୍କୁ ଘରକୁ ଆଣିଥିଲେ। ଘରେ ପହଞ୍ଚିବା ପରେ ଛାତ୍ରୀଜଣକ ଅଚେତ ହୋଇପଡିଥିଲେ। ତୁରନ୍ତ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚେତା ଆସିବା ପରେ ସେ କହିଥିଲେ, ତାଙ୍କର ଜଣେ ସହପାଠୀ ତାଙ୍କୁ ଲାଲ ରଙ୍ଗର ୨ଟି ଚକୋଲେଟ ଖାଇବାକୁ ଦେଇଥିଲେ। ମନ୍ଦ ଉଦ୍ଦେଶ୍ୟ ରଖି ଜଣେ ଯୁବକ ମହାବିଦ୍ୟାଳୟର ଅନ୍ୟ ଛାତ୍ରୀଙ୍କୁ ହାତ କରି ଏପରି କାଣ୍ଡ ଘଟାଇଥିବା ଅଭିଯୋଗରେ ଦର୍ଶାଯାଇଛି।