ଖେଳ |

ଆଇପିଏଲ: ଉନାଡକଟ୍‌ ଦାମୀ ଭାରତୀୟ

ଆଇପିଏଲ: ଉନାଡକଟ୍‌ ଦାମୀ ଭାରତୀୟ

ବାଙ୍ଗାଲୋର, ୨୮ା୧(ପି.ଟି.)

ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ)ର ଚଳିତ ବର୍ଷ ସଂସ୍କରଣ ପାଇଁ ଦୁଇଦିନିଆ ଖେଳାଳି ନିଲାମ ପ୍ରକ୍ରିୟା ଶେଷ ହୋଇଯାଇଛି। ରବିବାର ଦ୍ୱିତୀୟ ତଥା ଅନ୍ତିମ ଦିବସରେ ବାମହାତୀ ପେସ୍‌ ବୋଲର ଜୟଦେବ ଉନାଡ୍‌କଟ୍‌ ସବୁଠାରୁ ଦାମୀ ଭାରତୀୟ ଖେଳାଳି ବିବେଚିତ ହୋଇଛନ୍ତି। ରାଜସ୍ଥାନ ରୟାଲ୍ସ ତାଙ୍କୁ ୧୧.୫ କୋଟି ଟଙ୍କାରେ କ୍ରୟ କରିଥିବାବେଳେ ଅଷ୍ଟ୍ରେଲିଆ ପେସ୍‌ ବୋଲର ଆଣ୍ଡ୍ର୍ୟୁ ଟାଇଙ୍କୁ କିଙ୍ଗ୍ସ ଇଲେଭେନ ପଞ୍ଜାବ ୭.୨ କୋଟି ଟଙ୍କାରେ ଖରିଦ କରିଛି। ଦ୍ୱିତୀୟ ଦିବସରେ ଉନାଡ୍‌କଟ ଓ ଟାଇ ସବୁଠାରୁ ଅଧିକ ମୂଲ୍ୟରେ ବିକ୍ରି ହୋଇଛନ୍ତି। ଅନ୍ୟପକ୍ଷରେ ନେପାଳର ୧୭ ବର୍ଷୀୟ ଖେଳାଳି ସନ୍ଦୀପ ଲାମିଚାନେ ପ୍ରଥମ ଥର ଆଇପିଏଲ ଖେଳିବାକୁ ଯାଉଛନ୍ତି। ଦିଲ୍ଲୀ ଡେୟାର ଡେଭିଲ୍ସ ତାଙ୍କୁ ତାଙ୍କ ବେସ୍‌ ପ୍ରାଇସ୍‌ ମୂଲ୍ୟ ୨୦ ଲକ୍ଷ ଟଙ୍କାରେ କ୍ରୟ କରିଛି। ଆଫଗାନିସ୍ତାନର ସ୍ବଳ୍ପବୟସ୍କ ସ୍ପିନ ପ୍ରତିଭା ୧୬ ବର୍ଷୀୟ ମୁଜିବ ଜାଡ୍ରାନଙ୍କୁ କିଙ୍ଗ୍ସ ଇଲେଭେନ ପଞ୍ଜାବ ୪ କୋଟି ଟଙ୍କାରେ କ୍ରୟ କରିଛି। ପୂର୍ବରୁ ଆଫଗାନିସ୍ତାନର ଅନ୍ୟ ଜଣେ ଖେଳାଳି ଲେଗ୍‌ ସ୍ପିନର ରଶିଦ ଖାଁ ୯ କୋଟି ଟଙ୍କାରେ ବିକ୍ରି ହୋଇଛନ୍ତି। ୨୦୧୬ରେ ବାଂଲାଦେଶରେ ୧୯ ବର୍ଷରୁ କମ୍‌ ବିଶ୍ୱକପ୍‌ ବେଳେ ଦ୍ୱିତୀୟ ସର୍ବାଧିକ ଉଇକେଟ ହାସଲକାରୀ ବୋଲର ବିବେଚିତ ହୋଇ ଅନ୍ୟମାନଙ୍କ ଦୃଷ୍ଟି ଆକର୍ଷଣ କରିଥିଲେ। ସେ ୬ଟି ଇନିଂସରେ ୧୭ରନ ଆଭରେଜରେ ମୋଟ ୧୪ଟି ଉଇକେଟ ଅକ୍ତିଆର କରିଥିଲେ। ତନ୍ମଧ୍ୟରେ ତାଙ୍କର ଏକ ହ୍ୟାଟ୍ରିକ ସାମିଲ ରହିଥିଲା। ତାଙ୍କର ଏହି ସଫଳତା ଅଷ୍ଟ୍ରେଲିଆର ପୂର୍ବତନ ଅଧିନାୟକ ମାଇକେଲ କ୍ଲାର୍କଙ୍କୁ ପ୍ରଭାବିତ କରିଥିଲା। ଅଷ୍ଟ୍ରେଲିଆରେ ନ୍ୟୁ ସାଉଥ୍‌ ଓ୍ବେଲ୍ସ ପ୍ରିମିୟର କ୍ରିକେଟ ସିଜନ ପାଇଁ ସେ ଏହି ଲେଗ୍‌ ସ୍ପିନରଙ୍କୁ ନିଜ ଦଳ ଓ୍ବେଷ୍ଟର୍ନ ସବ୍‌ଅର୍ବସରେ ଖେଳିବା ପାଇଁ ଆମନ୍ତ୍ରଣ କରିଥିଲେ। କ୍ରିସ୍‌ ଗେଲଙ୍କ ପ୍ରଶଂସକମାନଙ୍କୁ ଆଶ୍ୱସ୍ତି ମିଳିଛି। ଦିନର ଶେଷଭାଗରେ କିଙ୍ଗ୍ସ ଇଲେଭେନ ପଞ୍ଜାବ ତାଙ୍କୁ ତାଙ୍କ ବେସ୍‌ ପ୍ରାଇସ୍‌ ୨ କୋଟି ଟଙ୍କାରେ କ୍ରୟ କରିଛି। ଗେଲ ଦୁଇଥର ଅଲୋଡା ରହିବା ପରେ ତୃତୀୟ ଥର ବିକ୍ରି ହୋଇଥିଲେ। ଆଫଗାନିସ୍ତାନର ସ୍ବଳ୍ପବୟସ୍କ ଜାଡ୍ରାନ ଉଚ୍ଚସ୍ତରରେ ଖେଳି ସାରିଛନ୍ତି। ବର୍ତ୍ତମାନ ସେ ନ୍ୟୁଜିଲାଣ୍ଡରେ ୧୯ ବର୍ଷରୁ କମ୍‌ ବିଶ୍ୱକପ୍‌ ଦଳର ଅନ୍ୟତମ ସଦସ୍ୟ ରହିଛନ୍ତି। ତାଙ୍କ ଟିମ୍‌ମେଟ୍‌ ଜାହିର ଖାଁଙ୍କୁ ରାଜସ୍ଥାନ ରୟାଲ୍ସ ୬୦ଲକ୍ଷ ଟଙ୍କାରେ କ୍ରୟ କରିଛି। କିଙ୍ଗ୍ସ ଇଲେଭେନ ପଞ୍ଜାବ ଓ ରାଜସ୍ଥାନ ରୟାଲ୍ସ ଅଧିକ ଅର୍ଥ ସହ ନିଲାମକୁ ଓହ୍ଲାଇଥିଲେ। ଉଭୟେ ଜଣେ ଲେଖାଏଁ ଖେଳାଳିଙ୍କୁ ଦଳରେ ବଜାୟ ରଖିଥିଲେ। କିନ୍ତୁ ଦିନର ଶେଷ ଭାଗରେ କୋଲକାତା ନାଇଟ୍‌ ରାଇଡର୍ସ ଏହି ଦୁଇ ଫ୍ରାଞ୍ଚାଇଜକୁ ବ୍ୟୟ କରିବାରେ ପଛରେ ପକାଇ ଦେଇଥିଲା। କେତେଜଣ ଖେଳାଳିଙ୍କୁ କ୍ରୟ କରିବାରେ ସମସ୍ତ ୮୦କୋଟି ଟଙ୍କା ବ୍ୟୟ କରିଦେଇଥିଲା। ଚେନ୍ନାଇ ସୁପର କିଙ୍ଗ୍ସ ୬.୫ କୋଟି ଟଙ୍କା ବଳକା ରଖିଥିବାବେଳେ ଅନ୍ୟ ସମସ୍ତ ଫ୍ରାଞ୍ଚାଇଜ ସେମାନଙ୍କ ପାଣ୍ଠିକୁ ପ୍ରାୟ ଖର୍ଚ୍ଚ କରିଦେଇଥିଲେ। ରୟାଲ୍ସ ଖର୍ଚ୍ଚବେଳେ ଆଗପଛ ସବୁ ଦିଗରୁ ବିଚାର କରିଥାଏ। ଦଳ କର୍ନାଟକ ଅଫ୍‌ ସ୍ପିନର କ୍ରିଷ୍ଣାପ୍ପା ଗୋଥାମଙ୍କୁ ୬.୨କୋଟି ଟଙ୍କା ବିନିମୟରେ ଖରିଦ କରିଥିଲା।
ଦିବସରେ ଉନାଡକଟଙ୍କୁ ନେବାଲାଗି ଚେନ୍ନାଇ ସୁପର କିଙ୍ଗ୍ସ ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ତୀବ୍ର ପ୍ରତିଦ୍ୱନ୍ଦ୍ୱିତା ହୋଇଥିଲା। ମାତ୍ର ଶେଷରେ ରାଜସ୍ଥାନ ରୟାଲ୍ସ ତାଙ୍କୁ ଅଧିକ ମୂଲ୍ୟରେ କିଣି ନେଇଥିଲା। ଉନାଡକଟଙ୍କ ବେସ୍‌ ପ୍ରାଇସ୍‌ ୧.୫ କୋଟି ଟଙ୍କା ରହିଥିବାବେଳେ ସେ ୧୧.୫ କୋଟି ଟଙ୍କାରେ ବିକ୍ରି ହୋଇଥିଲେ। ଟି୨୦ ସ୍ପେଶାଲିଷ୍ଟ ଉନାଡକଟ ଏତେ ଦାମ୍‌ରେ ବିକ୍ରି ହେବା ପଛରେ ଯଥେଷ୍ଟ କାରଣ ରହିଛି। ଗତ ସିଜନରେ ସେ ରାଇଜିଂ ପୁଣେ ସୁପର ଜିଆଣ୍ଟ୍ସ ତରଫରୁ ଖେଳି ୧୩.୪୧ ଆଭରେଜରେ ୨୪ଟି ଉଇକେଟ ଅକ୍ତିଆର କରିଥିଲେ। ସେ ଆହୁରି ମଧ୍ୟ ଭାରତର ଶ୍ରୀଲଙ୍କା ବିପକ୍ଷ ଟି୨୦ ସିରିଜରେ ମ୍ୟାନ ଅଫ୍‌ ଦି ସିରିଜ ବିବେଚିତ ହୋଇଥିଲେ। ରୟାଲ୍ସ ଶନିବାର ନିଲାମିର ସବୁଠାରୁ ଦାମୀ ଖେଳାଳି ଇଂଲଣ୍ଡ ଅଲରାଉଣ୍ଡର ବେନ୍‌ ଷ୍ଟୋକ୍ସଙ୍କୁ ୧୨.୫ କୋଟି ଟଙ୍କାରେ କ୍ରୟ କରିଥିଲା। ରବିବାର ବହୁ ମୂଲ୍ୟରେ ବିକ୍ରି ହୋଇଥିବା ଅନ୍ୟ ଜଣେ ଖେଳାଳି ହେଲେ ଅଫ୍‌ ସ୍ପିନର ଗୋଥାମ। ସେ ତାଙ୍କ ବେସ୍‌ ପ୍ରାଇସ ୨୦ ଲକ୍ଷ ଟଙ୍କାର ୩୧ ଗୁଣା ଅଧିକ ମୂଲ୍ୟରେ ବିକ୍ରି ହୋଇଥିଲେ।
ଭାରତୀୟ ଖେଳାଳିଙ୍କ ପ୍ରତି ସେମାନଙ୍କ ଆଗ୍ରହ ଜାରି ରଖିଥିଲେ। ସ୍ପିନ ବୋଲିଂ ଅଲରାଉଣ୍ଡର ଓ୍ବାଶିଂଟନ ସୁନ୍ଦରଙ୍କୁ ଆରସିବି ୩.୨କୋଟି ଟଙ୍କାରେ କ୍ରୟ କରିଥିଲା। ସେହିପରି ପଞ୍ଜାବ ପେସ୍‌ ବୋଲର ସନ୍ଦୀପ ଶର୍ମାଙ୍କୁ ସନରାଇଜର୍ସ ହାଇଦ୍ରାବାଦ ୩ କୋଟି ଟଙ୍କାରେ ନେଇଥିବାବେଳେ କିଙ୍ଗ୍ସ ଏକାଦଶ ପଞ୍ଜାବ ଏହାର ରାଇଟ୍‌ ଟୁ ମ୍ୟାଚ୍‌ (ଆରଟିଏମ) ଜରିଆରେ ମୋହିତ ଶର୍ମାଙ୍କୁ ୨.୪ କୋଟି ଟଙ୍କା ବିନିମୟରେ ରଖିଥିଲା। ସେହିପରି ଝାଡ଼ଖଣ୍ଡ ସ୍ପିନର ଶାହବାଜ ନଦିମଙ୍କୁ ଦିଲ୍ଲୀ ଡେୟାର ଡେଭିଲ୍ସ ୩.୨କୋଟି ଟଙ୍କାରେ କ୍ରୟ କରିଥିବା ବେଳେ ମହମ୍ମଦ ସାଇରାଜଙ୍କୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨.୬ କୋଟି ଟଙ୍କାରେ ଖରିଦ କରିଥିଲା। ଶନିବାର ଭଳି କୋଲକାତା ନାଇଟ ରାଇଡର୍ସ ଦ୍ୱିତୀୟ ଦିବସରେ ପ୍ରତିଭା ଖେଳାଳିଙ୍କ ସନ୍ଧାନରେ ରହିଥିଲା। ପ୍ରଥମ ଦିବସରେ କମଳେଶ ନାଗରକୋଟିି ଓ ଶୁଭ ଗିଲ୍‌ଙ୍କ ପରେ ଭାରତୀୟ ୧୯ ବର୍ଷରୁ କମ୍‌ ଦଳର ଅନ୍ୟ ଜଣେ ଖେଳାଳି ଶିଭମ ମାଭିଙ୍କୁ ୩କୋଟି ଟଙ୍କାରେ ନେଇଥିଲା। ଚେନ୍ନାଇ ସୁପର କିଙ୍ଗ୍ସ ଦକ୍ଷିଣ ଆଫ୍ରିକା ପେସ୍‌ ବୋଲର ଲୁଙ୍ଗି ଏନ୍‌ଗିଡିଙ୍କୁ ତାଙ୍କ ବେସ୍‌ ପ୍ରାଇସ୍‌ ୫୦ଲକ୍ଷ ଟଙ୍କାରେ କ୍ରୟ କରିଥିଲା। ଶ୍ରୀଲଙ୍କା ଖେଳାଳିଙ୍କ ଉପରେ ଡେରିରେ ନଜର ପଡ଼ିଥିଲା। ଆକିଲା ଦନଞ୍ଜୟ ତାଙ୍କ ବେସ୍‌ ପ୍ରାଇସ୍‌ ୫୦ଲକ୍ଷ ଟଙ୍କାରେ ବିକ୍ରି ହୋଇଥିଲେ। ଦୁଷ୍ମନ୍ତ ଚାମିରାଙ୍କୁ ଦ୍ୱିତୀୟ ଶ୍ରୀଲଙ୍କା ଖେଳାଳି ଭାବେ ରୟାଲ୍ସ ୫୦ ଲକ୍ଷ ଟଙ୍କାରେ କ୍ରୟ କରିଥିଲା। ଅଷ୍ଟ୍ରେଲିଆର ପୂର୍ବତନ ପେସ୍‌ ବୋଲର ମିଚେଲ ଜନସନଙ୍କୁ କୋଲକାତା ୨ କୋଟି ଟଙ୍କାରେ ନେଇଥିଲା। ରବିବାର ଯେଉଁ କେତେଜଣ ଜଣାଶୁଣା ଅନ୍ତର୍ଜାତୀୟ ଖେଳାଳି ବିକ୍ରି ହୋଇ ପାରି ନ ଥିଲେ ସେମାନେ ହେଲେ- ଦକ୍ଷିଣ ଆଫ୍ରିକାର ଡେଲ୍‌ ଷ୍ଟେଇନ୍‌ ଓ ମର୍ନେ ମୋର୍କେଲ, ଇଂଲଣ୍ଡର ଇଅନ ମୋର୍ଗାନ, ନ୍ୟୁଜିଲାଣ୍ଡର କୋରେ ଆଣ୍ଡରସନ ଓ ମାର୍ଟିନ ଗୁପ୍‌ଟିଲ ଏବଂ ଅଷ୍ଟ୍ରେଲିଆର ଶନ୍‌ ମାର୍ଶ।

All Right Reserved By
Karnatak Exit Poll

Model This Week

ସନ୍ତୋଷ

ଖେଳ |

ଆର୍ଜେଣ୍ଟିନା ଦଳରେ ମେସି, ଆଗୁଏରୋ

ଆର୍ଜେଣ୍ଟିନା ଦଳରେ ମେସି, ଆଗୁଏରୋ

ବୁଏନ୍ସ ଏରିଜ୍‌, ୨୨।୫- ରୁଷିଆରେ ହେବାକୁ ଥିବା ଫୁଟ୍‌ବଲ ବିଶ୍ୱକପ୍‌ର ପରବର୍ତ୍ତୀ ସଂସ୍କରଣ ଲାଗି ୨ଥର ଚାମ୍ପିୟନ ଆର୍ଜେଣ୍ଟିନା ପକ୍ଷରୁ ୨୩ ଜଣିଆ ଦଳ ଘୋଷଣା କରାଯାଇଛି। ତାରକା ଖେଳାଳି ତଥା ଫରଓ୍ବାର୍ଡ ଲିଓନେଲ ମେସି, ସର୍ଜିଓ ଆଜୁଏରୋ, ପାଉଲୋ ଡେବାଲ ଓ ଗୋଞ୍ଜାଲୋ ହିଗୁଏନା ପ୍ରମୁଖଙ୍କୁ ରୁଷିଆ ଟିକେଟ୍‌ ମିଳିଛି।

ସ୍ପେନ ବିଶ୍ୱକପ୍‌ ଦଳରୁ ଆଲ୍‌ଭାରୋ ବାଦ୍‌

ସ୍ପେନ ବିଶ୍ୱକପ୍‌ ଦଳରୁ ଆଲ୍‌ଭାରୋ ବାଦ୍‌

ମାଡ୍ରିଡ୍‌, ୨୨।୫- ଫୁଟ୍‌ବଲର ମହାକୁମ୍ଭ ଫିଫା ବିଶ୍ୱକପ୍‌କୁ ଆଉ ୩ ସପ୍ତାହ ସମୟ ରହିଥିବାବେଳେ ୨୦୧୦ ଚାମ୍ପିୟନ ସ୍ପେନ ଦଳ ତା’ର ଦଳ ଘୋଷଣା କରିଛି। ମୁଖ୍ୟ ପ୍ରଶିକ୍ଷକ ଜୁଲେନା ଲୋପେଟେଗୁଇଙ୍କ ଦ୍ୱାରା ଘୋଷିତ ହୋଇଥିବା ୨୩ ଜଣିଆ ଦଳରୁ ତାରକା ଚେଲସା ଷ୍ଟ୍ରାଇକର ଆଲଭାରୋ ମୋର୍ତାଜା ବାଦ୍‌ ଦିଆଯାଇଛି।

ପ୍ରାଜନେସ୍‌ ଦ୍ୱିତୀୟ ରାଉଣ୍ଡରେ, ନାଗାଲ ରାମକୁମାର ପରାସ୍ତ

ପ୍ରାଜନେସ୍‌ ଦ୍ୱିତୀୟ ରାଉଣ୍ଡରେ, ନାଗାଲ ରାମକୁମାର ପରାସ୍ତ

ପ୍ୟାରିସ, ୨୨ା୫ (ପି.ଟି.)-ଫ୍ରେଞ୍ଚ ଓପନ୍‌ କ୍ୱାଲିଫାୟର୍ସରେ ଭାରତର ପ୍ରାଜନେସ ଗୁଣେସ୍ବେରନ ତାଙ୍କ ମୁକାବିଲାରେ ବିଜୟ ହାସଲ କରିଥିବାବେଳେ ରାମକୁମାର ରମାନାଥନ ଓ ସୁମିତ ନାଗାଲ ସେମାନଙ୍କ ପୁରୁଷ ସିଙ୍ଗଲ ଓପନିଂ ରାଉଣ୍ଡ ମ୍ୟାଚରେ ପରାସ୍ତ ହୋଇଯାଇଛନ୍ତି। ଗୁଣେସ୍ବେରନ ୬-୪, ୬-୪ ସିଧାସଳଖ ସେଟ୍‌ରେ ଇଟାଲୀର ସାଲ୍‌ଭାଟୋର କାରୁସୋଙ୍କୁ ପରାସ୍ତ କରି ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ନିକଟରେ ଚାଇନାର ଆନିଙ୍ଗଠାରେ କନ୍‌ମିଙ୍ଗ ଓପନ ଚ୍ୟାଲେଞ୍ଜର ଜିତିବା ପରେ ପ୍ରାଜନେସ (ବିଶ୍ୱର ୧୮୩ତମ)ର଼୍ୟାଙ୍କିଙ୍ଗ ତାଲିକାର ଟପ୍‌ ୨୦୦ରେ ପ୍ରବେଶ କରିଥିଲେ।

ଭୋଟର ତାଲିକାରେ ପୂର୍ବତନ ଖେଳାଳିଙ୍କୁ ନିଅ

ଭୋଟର ତାଲିକାରେ ପୂର୍ବତନ ଖେଳାଳିଙ୍କୁ ନିଅ

ନୂଆଦିଲ୍ଲୀ ୨୨ା୫ (ପି.ଟି.)-ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ପ୍ରଶାସକ କମିଟି (ସିଓଏ) ସମସ୍ତ ରାଜ୍ୟ ୟୁନିଟ୍‌ଗୁଡିକୁ ଇ-ମେଲ ଜରିଆରେ ସାନି ହୁକୁମନାମା ଜାରି କରିଛି। ରାଜ୍ୟରେ ଥିବା ସମସ୍ତ ପୂର୍ବତନ ଅନ୍ତର୍ଜାତୀୟ ଖେଳାଳି (ପୁରୁଷ ଓ ମହିଳା)ଙ୍କୁ ସଦସ୍ୟ ପଦ ସହ ଭୋଟିଂ ଅଧିକାର ପ୍ରଦାନ କରିବା ବାଧ୍ୟତାମୂଳକ କରାଯାଇଛି। ଯେଉଁ ରାଜ୍ୟ ୟୁନିଟ୍‌ରେ କ୍ଲବ ଓ ଜିଲା ୟୁନିଟ୍‌ଗୁଡ଼ିକୁ ଭୋଟିଂ ସଦସ୍ୟ ଭାବେ ଗ୍ରହଣ କରାଯାଇଛି ସେମାନେ ଏଥିରେ ଖପ୍ପା ହୋଇଛନ୍ତି। କେତେକ ରାଜ୍ୟ ୟୁନିଟ୍‌ରେ କେବଳ କ୍ଲବ ଏବଂ ଜିଲା ୟୁନିଟ୍‌ଗୁଡ଼ିକ ଭୋଟିଂ ସଦସ୍ୟ ରହିଛନ୍ତି।

କିଟ୍‌ରେ ଆଜି ଆଇପିଏଲ୍‌ ଫ୍ୟାନ୍‌ ପାର୍କ

କିଟ୍‌ରେ ଆଜି ଆଇପିଏଲ୍‌ ଫ୍ୟାନ୍‌ ପାର୍କ

ଭୁବନେଶ୍ୱର, ୨୨।୫(ସ୍ପୋଟର୍‌ସ ବ୍ୟୁରୋ)- ଇଣ୍ଡିଆନ୍‌ ପ୍ରିମିୟର ଲିଗ୍‌ (ଆଇପିଏଲ୍‌) ଏକାଦଶ ସଂସ୍କରଣ ଅନ୍ତିମ ପର୍ଯ୍ୟାୟରେ ଉପନୀତ ହୋଇଛି। ଲିଗ୍‌ ପର୍ଯ୍ୟାୟ ସମାପ୍ତ ହୋଇଥିବାବେଳେ ମଙ୍ଗଳବାରଠାରୁ କ୍ୱାଲିଫାୟର ପର୍ଯ୍ୟାୟର ଆରମ୍ଭ ହେବ। ଏହି ଅବସରରେ ଚଳିତ ସିଜନରେ ୧୯ଟି ରାଜ୍ୟର ୩୬ଟି ସହର ଭ୍ରମଣ କରିସାରିଥିବା ଭିଭୋ ଆଇପିଏଲ୍‌ ଫ୍ୟାନ୍‌ ପାର୍କ ଏବେ ରାଜଧାନୀ ଭୁବନେଶ୍ୱରରେ ଆସି ପହଞ୍ଚତ୍ଛି। ମଙ୍ଗଳବାର ଦୁଇ ଶକ୍ତିଶାଳୀ ଦଳ ସନରାଇଜର୍ସ ହାଇଦ୍ରାବାଦ୍‌ ଓ ଚେନ୍ନାଇ ସୁପର୍‌କିଙ୍ଗ୍ସ ମଧ୍ୟରେ ସନ୍ଧ୍ୟା ୭ଟାରେ ଖେଳାଯିବାକୁ ଥିବା କ୍ୱାଲିଫାୟର-୧’ର ସିଧାସଳଖ ପ୍ରସାରଣକୁ ପ୍ରଶଂସକମାନେ କିଟ୍‌ କ୍ରିକେଟ୍‌ ଗ୍ରାଉଣ୍ଡରେ ଉପଭୋଗ କରିପାରିବେ।

ତିନି ଦଶନ୍ଧି ପରେ ପ୍ରଥମ ଅନ୍ତର୍ଜାତୀୟ ଫୁଟ୍‌ବଲ ଟୁର୍ନାମେଣ୍ଟ ଆୟୋଜନ କରିବ ଇରାକ

ତିନି ଦଶନ୍ଧି ପରେ ପ୍ରଥମ ଅନ୍ତର୍ଜାତୀୟ ଫୁଟ୍‌ବଲ ଟୁର୍ନାମେଣ୍ଟ ଆୟୋଜନ କରିବ ଇରାକ

ବାଗଦାଦ୍‌, ୨୨।୫(ଏଏଫ୍‌ପି)- ଆସନ୍ତା ନଭେମ୍ବର ମାସରେ ବାସ୍ରା ସହରରେ ଓ୍ବେଷ୍ଟ ଏସିଆ ଫୁଟ୍‌ବଲ ଫେଡେରେଶନ (ଡବ୍ଲ୍ୟୁଏଏଫ୍‌ଏଫ୍‌) ଚାମ୍ପିୟନଶିପ୍‌ ପ୍ରତିଯୋଗିତା ଅନୁଷ୍ଠିତ ହେବ। ୧୯୯୦ ମସିହା ପରେ ପ୍ରଥମଥର ଲାଗି ଇରାକରେ ଏକ ଅନ୍ତର୍ଜାତୀୟ ଟୁର୍ନାମେଣ୍ଟ ଆୟୋଜିତ ହେବାକୁ ଯାଉଛି।

ଇରାନ ଦଳରୁ କାଭେଙ୍କୁ ଅଣଦେଖା

ଇରାନ ଦଳରୁ କାଭେଙ୍କୁ ଅଣଦେଖା

ତେହରାନ, ୨୨।୫(ଏଏଫ୍‌ପି)- ରୁଷିଆରେ ହେବାକୁ ଥିବା ଫିଫା ବିଶ୍ୱକପ୍‌ର ଆସନ୍ତା ସଂସ୍କରଣ ଲାଗି ଏସୀୟ ଦେଶ ଇରାନ ପକ୍ଷରୁ ୨୪ ଜଣିଆ ଦଳ ଘୋଷଣା କରାଯାଇଛି। ଆଶ୍ଚର୍ଯ୍ୟଜନକ ଭାବେ ତାରକା ଷ୍ଟ୍ରାଇକର କାଭେ ରେଜାଇଙ୍କୁ ଏହି ଦଳରୁ ବାଦ୍‌ ଦିଆଯାଇଛି। ବେଲଜିୟମର ପ୍ରଥମ ଡିଭିଜନ କ୍ଲବ ରୟାଲ ଚାର୍ଲେରୋଇ ସ୍ପୋର୍ଟିଂ କ୍ଲବ ପକ୍ଷରୁ ପ୍ରତିନିଧିତ୍ୱ କରୁଥିବା ଏହି ୨୬ ବର୍ଷୀୟ ଷ୍ଟ୍ରାଇକର ଚଳିତ ସିଜନରେ ୩୯ଟି ମ୍ୟାଚ୍‌ ଖେଳି ୧୬ଟି ଗୋଲସ୍କୋର କରିଥିଲେ ମଧ୍ୟ ଇରାନ ଚୟନକର୍ତ୍ତାଙ୍କୁ ଏହା ପ୍ରଭାବିତ କରିପାରି ନ ଥିଲା।

କ୍ଲବ ଓ୍ବାଲର୍‌ଡ କପ୍‌କୁ ଟିମ୍‌ ଓ୍ବେଲିଂଟନର ଯୋଗ୍ୟତା

କ୍ଲବ ଓ୍ବାଲର୍‌ଡ କପ୍‌କୁ ଟିମ୍‌ ଓ୍ବେଲିଂଟନର ଯୋଗ୍ୟତା

ଓ୍ବେଲିଂଟନ, ୨୨।୫(ଏଏଫ୍‌ପି)- ନ୍ୟୁଜିଲାଣ୍ଡ ରାଜଧାନୀସ୍ଥିତ ଟିମ୍‌ ଓ୍ବେଲିଂଟନ କ୍ଲବ ଫିଫା କ୍ଲବ ବିଶ୍ୱକପ୍‌କୁ ଯୋଗ୍ୟତା ହାସଲ କରିଛି। ଓସେନିଆ ଚାମ୍ପିୟନ୍ସ ଲିଗ୍‌ ଜିତିବା ପରେ ଟିମ୍‌ ଓ୍ବେଲିଂଟନ ପ୍ରଥମଥର ଲାଗି ଏହି ସମ୍ମାନଜନକ ପ୍ରତିଯୋଗିତା ଖେଳିବାର ସୌଭାଗ୍ୟ ଲାଭ କରିଛି।

କବାଡ଼ିରେ କମିଶନରେଟ ପୋଲିସର ଡବଲ ବିଜୟ

କଟକ ଅଫିସ,୨୨ା୫- ଓଏମ୍‌ପି ସ୍ଥିତ ଓଏସ୍‌ଏପି ୬ଷ୍ଠ ବାଟାଲିୟନରେ ଚାଲିଥିବା ୭୫ତମ ରାଜ୍ୟ ପୋଲିସ କବାଡ଼ି ଓ ୭ମ ହ୍ୟାଣ୍ଡବଲ ଚାମ୍ପିୟନଶିପ୍‌ର ୪ର୍ଥ ଦିନର ଖେଳ ଶେଷ ହୋଇଛି । ୪ର୍ଥ ଦିବସରେ ଅନୁଷ୍ଠିତ କବାଡ଼ି ପ୍ରତିଯୋଗିତାରେ କଳିଙ୍ଗନଗର ୩ୟ ଆଇଆର ବାଟାଲିୟନ ୩୫-୨୫ ପଏଣ୍ଟରେ ଝାରସୁଗୁଡ଼ା ୨ୟ ବାଟାଲିୟନକୁ ପରାସ୍ତ କରିଥିବା ବେଳେ ସମ୍ବଲପୁର ଜିଲା ୫୦-୨୦ ପଏଣ୍ଟରେ ଛତ୍ରପୁର ଓଏସ୍‌ଏପି ୮ମ ବାଟାଲିୟନକୁ, କମିଶନରେଟ ପୋଲିସ-ଏ ୪୦-୧୬ ପଏଣ୍ଟରେ ରାଉରକେଲା ଜିଲାକୁ, କମିଶନରେଟ ପୋଲିସ-ବି ୩୨-୧୬ ପଏଣ୍ଟରେ ଭଞ୍ଜନଗର ୮ମ ସ୍ବତନ୍ତ୍ର ଆଇଆର ବାଟାଲିୟନକୁ, ଓଡ଼ିଶା ଫାୟାର ସର୍ଭିସ ୨୬-୧୦ ପଏଣ୍ଟରେ ଖୋର୍ଦ୍ଧା ୬ଷ୍ଠ ଆଇଆର ବାଟାଲିୟନକୁ, ଦେବଗଡ଼ ୪ର୍ଥ ଆଇଆର ବାଟାଲିୟନ ୨୫-୭ ପଏଣ୍ଟରେ ଢ଼େଙ୍କାନାଳ ଜିଲାକୁ, ରାଉରକେଲା ଓଏସ୍‌ଏପି ୪ର୍ଥ ଆଇଆର ବାଟାଲିୟନ ୪୬-୨୯ ପଏଣ୍ଟରେ କେନ୍ଦୁଝର ୨ୟ ଏସ୍‌ଏସ୍‌ ବାଟାଲିୟନକୁ, କଳିଙ୍ଗନଗର ୩ୟ ଆଇଆର ବାଟାଲିୟନ ୪୦-୧୧ ପଏଣ୍ଟରେ ବାରିପଦା ଓଏସ୍‌ଏପି ବାରିପଦା ଓଏସ୍‌ଏପି ୫ମ ବାଟାଲିୟନକୁ, କୋରାପୁଟ ୧ମ ଆଇଆର ବାଟାଲିୟନ ୩୩-୧୭ ପଏଣ୍ଟରେ କମିଶନରେଟ ପୋଲିସ-ଏକୁ, କଟକ ଓଏସ୍‌ଏପି ୬ଷ୍ଠ ବାଟାଲିୟନ ୩୬-୧୦ ପଏଣ୍ଟରେ ଭଞ୍ଜନଗର ୮ମ ସ୍ବତନ୍ତ୍ର ଆଇଆର ବାଟାଲିୟନକୁ ହରାଇଥିଲା ।

କଳାହାଣ୍ଡି କପ୍‌ ଚୟନ ଶିବିର ୨୪ରେ

କଳାହାଣ୍ଡି କପ୍‌ ଚୟନ ଶିବିର ୨୪ରେ

କଟକ ଅଫିସ,୨୨ା୫- କଟକ ଜିଲା କ୍ରୀଡ଼ା ସଂସଦ ଆନୁକୂଲ୍ୟରେ ଓସିଏ କ୍ରିକେଟ ଏକାଡେମୀରେ କଳାହାଣ୍ଡି କପ୍‌ ଓ ୨୩ବର୍ଷରୁ କମ୍‌ ଟୁର୍ନାମେଣ୍ଟ ନିମନ୍ତେ ଖେଳାଳି ଚୟନ ଶିବିର ଆସନ୍ତା ୨୪ରେ ଅନୁଷ୍ଠିତ ହେବ । ଏହି ଶିବିରରେ କଳାହାଣ୍ଡି କପ୍‌ର କଟକ-ଏ ଓ କଟକ-ବି ଦଳ ସମେତ ୨୩ବର୍ଷରୁ କମ୍‌ ଟୁର୍ନାମେଣ୍ଟ ନିମନ୍ତେ କଟକ ଜିଲା ଦଳ ବଛାଯିବ।

କ୍ୱାର୍ଟର ଫାଇନାଲରେ ପାରାମାଉଣ୍ଟ

କ୍ୱାର୍ଟର ଫାଇନାଲରେ ପାରାମାଉଣ୍ଟ

ଭୁବନେଶ୍ୱର, ୨୨।୫(କ୍ରୀଡ଼ା ପ୍ରତିନିଧି)- ପାରାମାଉଣ୍ଟ ସ୍ପୋର୍ଟିଂ ପୁରୁଣା ଭୁବନେଶ୍ୱରସ୍ଥିତ ବିଏମ ହାଇସ୍କୁଲ ପଡ଼ିଆରେ ଚାଲିଥିବା ଦ୍ୱିତୀୟ ରାମେଶ୍ୱର କପ୍‌ ୧୯ ବର୍ଷରୁ କମ୍‌ ଜୁନିୟର କ୍ରିକେଟ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛି। ସୋମବାର ଅନୁଷ୍ଠିତ ପୁଲ୍‌‘ବି’ ପ୍ରି-କ୍ୱାର୍ଟର ଫାଇନାଲରେ ପାରାମାଉଣ୍ଟ ୬ ଉଇକେଟରେ ଜାଗୃତି କ୍ରିକେଟ ଏକାଡେମୀକୁ ପରାସ୍ତ କରିଛି।

ଓଡ଼ିଶାର ସ୍ବର୍ଣ୍ଣଲତାଙ୍କ ମାଉଣ୍ଟ ଏଭରେଷ୍ଟ ଆରୋହଣ

ଓଡ଼ିଶାର ସ୍ବର୍ଣ୍ଣଲତାଙ୍କ ମାଉଣ୍ଟ ଏଭରେଷ୍ଟ ଆରୋହଣ

ଭୁବନେଶ୍ୱର, ୨୨।୫(କ୍ରୀଡ଼ା ପ୍ରତିନିଧି)- ଦୁଃସାହସିକ କ୍ରୀଡ଼ା ପ୍ରତି ଓଡ଼ିଶାରେ ଆଗ୍ରହ ବୃଦ୍ଧି ପାଉଛି। ଏହାକୁ ଏକ ପାଦ ଆଗକୁ ନେଇଛନ୍ତି ଓଡ଼ିଆ ଝିଅ ସ୍ବର୍ଣ୍ଣଲତା ଦଳେଇ। ଯାଜପୁର ଜିଲା କଳିଙ୍ଗନଗରର ୨୦ ବର୍ଷୀୟା ସ୍ବର୍ଣ୍ଣଲତା ସୋମବାର ସକାଳେ ସଫଳତାର ସହ ମାଉଣ୍ଟ ଏଭରେଷ୍ଟ ଆରୋହଣ କରିଛନ୍ତି। ନିଜର ସାଥୀ ପର୍ବତାରୋହୀ ପୁନମ୍‌ ଓ ସନ୍ଦୀପ ତୋଲିୟାଙ୍କ ସହିତ ମିଶି ସେ ଏହି ସଫଳତା ପାଇଛନ୍ତି। ଏହି ମିଶନକୁ ଟାଟା ଷ୍ଟିଲ୍‌ ପ୍ରାୟୋଜିତ କରିଥିଲା ଓ ଏହାକୁ ଟାଟା ଷ୍ଟିଲ୍‌ ଆଡ୍‌ଭେଞ୍ଚର ଫାଉଣ୍ଡେଶନ (ଟିଏସ୍‌ଏଏଫ୍‌) ପକ୍ଷରୁ ଆୟୋଜନ କରାଯାଇଥିଲା।