Dharitri News
ରାଜ୍ୟ |

ବଳ କଷିଲେ କଂଗ୍ରେସ, ଭାଜପା

ବଳ କଷିଲେ କଂଗ୍ରେସ, ଭାଜପା ଭୁବନେଶ୍ୱର, ୨୪।୧(ବ୍ୟୁରୋ): କୁନ୍ଦୁଲି ପୀଡିତାଙ୍କ ଆତ୍ମହତ୍ୟା ଘଟଣାର ପ୍ରତିବାଦରେ ଓଡିଶା ବନ୍ଦ। ଏହି ଘଟଣାକୁ ଆଳ କରି ରାଜ୍ୟ ସରକାରଙ୍କ ବିରୋଧରେ ବିରୋଧୀ ଦଳ ଗର୍ଜିବାକୁ ପ୍ରୟାସ କରିଛି। ଓଡିଶା ବନ୍ଦ ଡାକରା ଦେଇ ଲୋକମାନେ ସେମାନଙ୍କୁ ସ୍ବତଃସ୍ଫୂର୍ତ୍ତ ଭାବରେ ସମର୍ଥନ କରିଥିବାର ଦାବି କରୁଛନ୍ତି। ହେଲେ ବନ୍ଦ ପାଳନ କାରଣରୁ ଜନଜୀବନ ଅସ୍ତବ୍ୟସ୍ତ ହୋଇଛିି। ଏହି ବନ୍ଦ ଡାକରା ପ୍ରାୟତଃ ଶାନ୍ତିପୂର୍ଣ୍ଣ ଥିବା ଦେଖିବାକୁ ମିଳିଥିଲେ ମଧ୍ୟ ରାଜ୍ୟର କେତେକ ସ୍ଥାନରେ ଏହି ଘଟଣାରେ ରାଜନୈତିକ ଫାଇଦା ଗୋଟାଇବାକୁ ଚେଷ୍ଟା କରୁଥିବା ଦୁଇ ବିରୋଧୀ ଭାଜପା ଏବଂ କଂଗ୍ରେସ କର୍ମୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି। ଆହୁରି କେତେକ ସ୍ଥାନରେ ରୋଗୀଙ୍କ ଯିବା ଆସିବାରେ ବାଧା ସୃଷ୍ଟି ହୋଇଥିବା ଜଣାପଡିଛି। ରାଜନୈତିକ ପର୍ଯ୍ୟବେକ୍ଷକମାନଙ୍କ କହିବା ଅନୁଯାୟୀ କଂଗ୍ରେସ ଏବଂ ଭାଜପା ପରସ୍ପର ମଧ୍ୟରେ ପ୍ରତିଯୋଗିତା କରୁଥିଲେ। ଭାଜପାର ହରତାଳ ଏବଂ କଂଗ୍ରେସର ବନ୍ଦ ଡାକରା ଯୋଗୁ ରାଜ୍ୟର ବିଭିନ୍ନ ସ୍ଥାନରେ ଦୋକାନବଜାର ବନ୍ଦ ରହିବା ସାଙ୍ଗକୁ ଯାତାୟାତ ମଧ୍ୟ ଠପ୍‌ ହୋଇଯାଇଥିଲା। ରାଜଧାନୀ ଭୁବନେଶ୍ୱରରେ ଦୁଇ ଚକିଆ ଯାନକୁ ଛାଡି ଦେଲେ ଅନ୍ୟ ସମସ୍ତ ବଡ ଗାଡି ଚଳାଚଳ ବନ୍ଦ ରହିଥିଲା। ଭୁବନେଶ୍ୱରର କେତେକ ସ୍ଥାନରେ ଯୁବ, ଛାତ୍ର, ମହିଳା, କୃଷକ, ଓକିଲ କଂଗ୍ରେସ କର୍ମକର୍ତ୍ତାମାନେ ରାସ୍ତା ଅବରୋଧ କରିଥିଲେ। ପ୍ରଥମେ କଂଗ୍ରେସ କର୍ମୀମାନେ ଦଳୀୟ କାର୍ଯ୍ୟାଳୟଠାରୁ ଶୋଭାଯାତ୍ରାରେ ବାହାରି ବାଣୀବିହାର ଛକ ପର୍ଯ୍ୟନ୍ତ ଯାଇଥିଲେ, ପରେ ସେଠାରୁ ଆଚାର୍ଯ୍ୟ ବିହାର ଛକଦେଇ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ପ୍ରସାଦ ହରିଚନ୍ଦନଙ୍କ ବାସଭବନଠାରେ ପହଞ୍ଚିଥିଲେ। ଏହାପରେ କଂଗ୍ରେସର କେତେଜଣ ବରିଷ୍ଠ ନେତା ଏବଂ କର୍ମୀ ରାଜମହଲ ସ୍ଥିତ ଏଜି ଛକଠାରେ ଧାରଣା ଦେଇଥିଲେ। ସେଠାରେ କର୍ମକର୍ତ୍ତାମାନେ ଏଜି ଛକଠାରେ ପିକେଟିଂ କରିଥିଲେ। ଅପରପକ୍ଷରେ ଭାଜପା ପକ୍ଷରୁ ମଧ୍ୟ ପୂର୍ବ ସୂଚନା ଅନୁଯାୟୀ ରାଜ୍ୟବ୍ୟାପୀ ହରତାଳ କରାଯାଇଥିଲା। ଭାଜପା କର୍ମୀମାନେ ମାଷ୍ଟରକ୍ୟାଣ୍ଟିନ ଛକଠାରେ ଟାୟାର ଜାଳି ରାସ୍ତା ଅବରୋଧ କରିଥିଲେ। ହରତାଳ ସମୟରେ ପାଖାପାଖି ୫୦କର୍ମୀଙ୍କୁ ଅଟକ ରଖିଥିଲା ପୋଲିସ। ଅନ୍ୟପଟେ ଆଉ କେତେକ ଭାଜପା କର୍ମୀ ସଚିବାଳୟ ଘେରାଉ କରିବାକୁ ଉଦ୍ୟମ କରିଥିବା ବେଳେ ସେମାନଙ୍କୁ ପୋଲିସ ପକ୍ଷରୁ ଅଟକା ଯାଇଥିଲା। ବନ୍ଦ ଡକରାକୁ ଦୃଷ୍ଟିରେ ରଖି ରାଜ୍ୟ ସରକାରର ସମସ୍ତ ଶିକ୍ଷାନୁଷ୍ଠାନଗୁଡିକ ଛୁଟି ଘୋଷଣା କରିଥିଲେ। କୋର୍ଟ ଏବଂ ବ୍ୟାଙ୍କ ବନ୍ଦ ରଖାଯାଇଥିଲା। ରାଜନୈତିକ ଦଳଗୁଡିକ ସକାଳ ୬ଟାରୁ ସା ୬ଟା ପର୍ଯ୍ୟନ୍ତ ୧୨ଘଣ୍ଟିଆ ବନ୍ଦ ଡାକରା ଦେଇଥିଲେ ମଧ୍ୟ ଅପରାହ୍ନ ୧ଟା ପରେ ଧୀରେ ଧୀରେ ସବୁ ସ୍ବାଭାବିକ ହୋଇଯାଇଥିଲା। ବନ୍ଦ ପାଳନ ପରେ ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ପ୍ରସାଦ ହରିଚନ୍ଦନ ଏକ ଖବରଦାତା ସମ୍ମିଳନୀ ଜରିଆରେ କହିଛନ୍ତି ଯେ, କଂଗ୍ରେସ ପକ୍ଷରୁ ଦିଆଯାଇଥିବା ଓଡିଶା ବନ୍ଦ ଡାକରା ସମ୍ପୂର୍ଣ୍ଣ ସଫଳ ହୋଇଛି। ଏହା ସମ୍ପୂର୍ଣ୍ଣ ଶାନ୍ତିପୂର୍ଣ୍ଣ ଏବଂ ସ୍ବତଃପ୍ରବୃତ୍ତ ବନ୍ଦ ଥିଲା। ଏଥିପାଇଁ ଓଡିଶାବାସୀଙ୍କୁ କୃତଜ୍ଞତା ଜ୍ଞାପନ କରୁଛି। କୁନ୍ଦୁଲି ଘଟଣା ରାଜ୍ୟବାସୀଙ୍କ ବିବେକକୁ ଦୋହଲାଇ ଦେଇଛି। ତେଣୁ ଲୋକମାନେ ଏହି ବନ୍ଦ ଡାକରାକୁ ସମର୍ଥନ କରିଛନ୍ତି। ଅନ୍ୟପଟେ ଭାଜପା ରାଜ୍ୟ ଉପସଭାପତି ସମୀର ମହାନ୍ତି କହିଛନ୍ତି, ଭାଜପା ପକ୍ଷରୁ ରାଜ୍ୟବ୍ୟାପୀ ହରତାଳ ଡାକରାକୁ ରାଜ୍ୟବାସୀ ସମ୍ପୂର୍ଣ୍ଣ ସମର୍ଥନ ଜଣାଇଛନ୍ତି। ରାଜ୍ୟବାସୀଙ୍କ ସମର୍ଥନ ପରେ ଗୋଟାଏ କଥା ସ୍ପଷ୍ଟ କରିଛି ଯେ ରାଜ୍ୟ ସରକାରଙ୍କ ପାଇଁ ଲୋକମାନଙ୍କ ମନରେ କେତେ କ୍ରୋଧ ରହିଛି। ହରତାଳକୁ ଜନସାଧାରଣଙ୍କ ସ୍ବତଃସ୍ଫୂର୍ତ୍ତ ସମର୍ଥନ ପାଇଁ ସେ ଧନ୍ୟବାଦ ଜଣାଇଛନ୍ତି।

ରାଜ୍ୟ |

ପରଲୋକରେ ପୂର୍ବତନ ବିଧାୟକ ନିତ୍ୟାନନ୍ଦ ସାମନ୍ତରାୟ

ପରଲୋକରେ ପୂର୍ବତନ ବିଧାୟକ ନିତ୍ୟାନନ୍ଦ ସାମନ୍ତରାୟ

କଟକ ଅଫିସ, ୨୩ା୨: ଜଗତ୍‌ସିଂହପୁର ଜିଲା ତିର୍ତ୍ତୋଲର ପୂର୍ବତନ ବିଧାୟକ ତଥା ଶିଳ୍ପପତି ନିତ୍ୟାନନ୍ଦ ସାମନ୍ତରାୟଙ୍କ ଶୁକ୍ରବାର ହୃଦ୍‌ଘାତରେ ପରଲୋକ ଘଟିଛି। ତାଙ୍କୁ ୮୫ ବର୍ଷ ହୋଇଥିଲା। ଅପରାହ୍ନ ସାଢେ ଗୋଟାଏ ସମୟରେ ସାମନ୍ତରାୟ କଟକ ରାଜାବଗିଚାସ୍ଥିତ ନିଜ ବାସଭବନ ପରିସରସ୍ଥ ବଗିଚାରୁ ଫେରୁଥିବା ବେଳେ ଛାତିରେ ଯନ୍ତ୍ରଣା ଅନୁଭବ କରିବା ସହିତ ଗୁରୁତର ହୋଇପଡ଼ିଥିଲେ।

ନୀରବ ମୋଦିଙ୍କ ବ୍ରାଣ୍ଡରୁ ଓହରିଲେ ପ୍ରିୟଙ୍କା

ନୀରବ ମୋଦିଙ୍କ ବ୍ରାଣ୍ଡରୁ ଓହରିଲେ ପ୍ରିୟଙ୍କା

ବମ୍ବେ,୨୩ା୨(ପି.ଟି.): ବିଲିୟନେୟାର ହୀରା ବ୍ୟବସାୟୀ ନୀରବ ମୋଦିଙ୍କ ଗହଣା ବ୍ରାଣ୍ଡ୍‌ର ବିଜ୍ଞାପନରେ ଅଭିନୟ କରି ଆସିଥିବା ବଲିଉଡ୍‌ ତଥା ହଲିଉଡ୍‌ ଅଭିନେତ୍ରୀ ପ୍ରିୟଙ୍କା ଚୋପ୍ରା କମ୍ପାନୀ ସହ କରିଥିବା ଚୁକ୍ତିରୁ ଓହରି ଯାଇଛନ୍ତି। ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍‌ବି) ସହ ନୀରବ କରିଥିବା ଜାଲିଆତି ଘଟଣା ସାମ୍ନାକୁ ଆସିବା ପରେ ପ୍ରିୟଙ୍କା ଏହା ଉପରେ ବିଚାର କରୁଥିଲେ।

ବିମାନବନ୍ଦର କର୍ମଚାରୀଙ୍କ ପାଇଁ ଏସ୍‌ମା ଲାଗୁ

ବିମାନବନ୍ଦର କର୍ମଚାରୀଙ୍କ ପାଇଁ ଏସ୍‌ମା ଲାଗୁ

ଭୁବନେଶ୍ୱର, ୨୩।୨(ବ୍ୟୁରୋ): ରାଜ୍ୟର ବିମାନ ବନ୍ଦର କର୍ମଚାରୀମାନଙ୍କ ପାଇଁ ଜରୁରୀକାଳୀନ ସେବା ଆଇନ (ଏସ୍‌ମା) ଲାଗୁ କରାଯାଇଛି। ଏନେଇ ଗୁରୁବାର ଗୃହ ବିଭାଗ(ସ୍ବତନ୍ତ୍ର) ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ବିମାନ ବନ୍ଦର ଗ୍ରାଉଣ୍ଡ ହ୍ୟାଣ୍ଡେଲିଙ୍ଗ୍‌ , ଖାଦ୍ୟପେୟ ଯୋଗାଉଥିବା କର୍ମଚାରୀ ଏବଂ ଏୟାରକ୍ରାପ୍ଟରେ ଇନ୍ଧନ ଭରୁ ଥିବା କର୍ମଚାରୀଙ୍କ ପାଇଁ ଏହା ଲାଗୁ କରାଯାଇଛି। ଏହି ନିୟମକୁ ଖିଲାଫ କଲେ ସଂପୃକ୍ତ କର୍ମଚାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣାପଡିଛି।

‘ଧନୁଷ’ କ୍ଷେପଣାସ୍ତ୍ରର ପରୀକ୍ଷଣ

‘ଧନୁଷ’ କ୍ଷେପଣାସ୍ତ୍ରର ପରୀକ୍ଷଣ

ବାଲେଶ୍ୱର ଅଫିସ,୨୩।୨: ବାଲେଶ୍ୱର ଚାନ୍ଦିପୁର ସ୍ଥିତ ପ୍ରତିରକ୍ଷା ଉନ୍ନୟନ ଗବେଷଣା ସଂସ୍ଥା(ଡିଆର୍‌ଡିଓ) ପକ୍ଷରୁ ଶୁକ୍ରବାର ସ୍ବଳ୍ପ ଦୂରଗାମୀ ବାଲାଷ୍ଟିକ୍‌ କ୍ଷେପଣାସ୍ତ୍ର ‘ଧନୁଷ’ର ପରୀକ୍ଷଣ କରାଯାଇଛି। ଚାନ୍ଦିପୁର ସ୍ଥିତ ବଙ୍ଗୋପସାଗର ମଧ୍ୟରେ ଏକ ଯୁଦ୍ଧ ଜାହାଜରୁ ପୂର୍ବାହ୍ନ ୧୦ଟା୫୨ ମିନିଟ୍‌ ସମୟରେ ଏହାକୁ ଉତ୍‌କ୍ଷେପଣ କରାଯାଇଥିଲା।

ଭୋଟ ପୂର୍ବରୁ ଫୁଟିଲା ଗୁଳି

ଭୋଟ ପୂର୍ବରୁ ଫୁଟିଲା ଗୁଳି

ବରଗଡ଼ ଅଫିସ୍‌/ସୋହେଲା/ବୁର୍ଲା,୨୩।୨: ଶନିବାର ବିଜେପୁର ଉପନିର୍ବାଚନ ପାଇଁ ମତଦାନ ହେବ। ଏହା ପୂର୍ବରୁ ଗୁରୁବାର ବିଳମ୍ବିତ ରାତିରେ ସୋହେଲା ବ୍ଲକ ଅନ୍ତର୍ଗତ ବନାବିରା ଗ୍ରାମର ହରିହରାନନ୍ଦ କ୍ରିୟାଯୋଗ ଧ୍ୟାନକେନ୍ଦ୍ର ନିକଟରେ ଗୁଳିମାଡ଼ ଓ ଗାଡ଼ି ଭଙ୍ଗାରୁଜା ଭଳି ଘଟଣା ଘଟିଛି। ଗୁଳିମାଡ଼ ଓ ଆକ୍ରମଣରେ ଶ୍ରମମନ୍ତ୍ରୀ ସୁଶାନ୍ତ ସିଂଙ୍କ ଭାଇ ସୁବ୍ରତ ସିଂ, ଚିଚିଣ୍ଡା ଗ୍ରାମର ମାଗି ଓରଫ୍‌ ଡିଲେଶ୍ୱର ସାହୁ, ଜାମପାଲି ଗ୍ରାମର ଖଗେଶ୍ୱର ମହାମଲ୍ଲିକ, ଟୁଙ୍ଗିବନ୍ଧଲି ଗ୍ରାମର ପ୍ରଭାସ କୁମାର ନାଗ ଓରଫ୍‌ କାର୍ତ୍ତିକ ଆହତ ହୋଇଛନ୍ତି। ସମସ୍ତ ଆହତଙ୍କୁ ସୋହେଲା ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ବୁର୍ଲା ମେଡିକାଲ (ଭିମ୍‌ସାର୍‌)କୁ ସ୍ଥାନାନ୍ତର କରାଯାଇଛି।

ହ୍ବାଟ୍ସଆପ୍‌ରେ ପ୍ରଶ୍ନପତ୍ର

ହ୍ବାଟ୍ସଆପ୍‌ରେ ପ୍ରଶ୍ନପତ୍ର

କଟକ ଅଫିସ, ୨୩।୨: ଶୁକ୍ରବାରଠାରୁ ଆରମ୍ଭ ହୋଇଛି ମାଟ୍ରିକ ପରୀକ୍ଷା। ହେଲେ ପ୍ରଥମ ଦିନରୁ ପରିଚାଳନାଗତ ବିଭ୍ରାଟ ପଦାରେ ପଡ଼ିଛି। ପ୍ରଥମ ଦିନ ମାତୃଭାଷା ପରୀକ୍ଷା ଶେଷ ନ ହେଉଣୁ ପ୍ରଶ୍ନପତ୍ରର ନକଲ ହ୍ବାଟ୍ସ ଆପ୍‌ ଜରିଆରେ ଭାଇରାଲ ହୋଇଥିଲା। ତେବେ ପରୀକ୍ଷାର୍ଥୀମାନେ ପୂର୍ବାହ୍ନ ସାଢ଼େ ୧୧ଟାରେ ପରୀକ୍ଷା କେନ୍ଦ୍ରରୁ ବାହାରିବା ପରେ ଘଟଣାର ସତ୍ୟତା ପ୍ରମାଣିତ ହୋଇଥିଲା। ପରୀକ୍ଷା କେନ୍ଦ୍ର ବାହାରେ ସବୁକିଛି ଠିକ୍‌ ଥିବା ବେଳେ ଭିତର ସୁରକ୍ଷା ଯେ ଢିଲା ତାହା ଏଥିରୁ ସ୍ପଷ୍ଟ ହୋଇଥିଲା। ଏଭଳି ଘଟଣାକୁ ନେଇ ପରୀକ୍ଷାର୍ଥୀ, ଅଭିଭାବକ, ଶିକ୍ଷୟିତ୍ରୀଶିକ୍ଷକମାନେ ଆଶଙ୍କିତ ହୋଇପଡ଼ିଛନ୍ତି।

ଆଜି ଭାଗ୍ୟ ପରୀକ୍ଷା

ଆଜି ଭାଗ୍ୟ ପରୀକ୍ଷା

ଭୁବନେଶ୍ୱର, ୨୩।୨(ବ୍ୟୁରୋ): ବିଜେପୁର ଉପନିର୍ବାଚନ ଲାଗି ଶନିବାର ଭୋଟଗ୍ରହଣ ଅନୁଷ୍ଠିତ ହେବ। ଏହି ନିର୍ବାଚନମଣ୍ଡଳୀର ପ୍ରାୟ ୨ ଲକ୍ଷ ୨୧ ହଜାର ୧୪୪ ଜଣ ଭୋଟର ନିଜର ମତଦାନ ଅଧିକାର ସାବ୍ୟସ୍ତ କରିବେ। ପ୍ରାକ୍‌ ନିର୍ବାଚନୀ ସମୟ ଘଟଣାବହୁଳ ହୋଇଥିବାରୁ ସୁରୁଖୁରୁରେ ନିର୍ବାଚନ ପରିଚାଳନା ପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।

ରାଜ୍ୟ ସଭା ନିର୍ବାଚନ ମାର୍ଚ୍ଚ ୨୩ : ଓଡ଼ିଶାର ୩ ସମେତ ୫୮ ଆସନ ଲାଗି ବିଜ୍ଞପ୍ତି ଜାରି

ରାଜ୍ୟ ସଭା ନିର୍ବାଚନ ମାର୍ଚ୍ଚ ୨୩ : ଓଡ଼ିଶାର ୩ ସମେତ ୫୮ ଆସନ ଲାଗି ବିଜ୍ଞପ୍ତି ଜାରି

ଭୁବନେଶ୍ୱର, ୨୩।୨(ବ୍ୟୁରୋ): ବିଜେପୁର ଉପନିର୍ବାଚନ ନେଇ ରାଜନୈତିକ ଉଷ୍ମତା ଥମିନାହିଁ। ଅନ୍ୟପଟେ ନିର୍ବାଚନ କମିଶନ(ଇସି)ରାଜ୍ୟ ସଭା ନିର୍ବାଚନ ପାଇଁ ଶୁକ୍ରବାର ବିଧିବଦ୍ଧ ବିଜ୍ଞପ୍ତି ପ୍ରକାଶ କରିଛନ୍ତି। ମାର୍ଚ୍ଚ ୨୩ରେ ଓଡ଼ିଶାର ୩ଟି ଆସନ ସମେତ ଦେଶର ୫୮ଟି ଆସନ ପାଇଁ ଭୋଟ ଗ୍ରହଣ କରାଯିବ। ସାମାଜିକ କର୍ମୀ ଏ.ଭି. ସ୍ବାମୀ, ହକି ତାରକାରୁ ରାଜନେତା ପାଲଟିଥିବା ଦିଲୀପ ତିର୍କୀ ଏବଂ ବିଜେଡି ନେତା ଏ.ୟୁ. ସିଂଦେଓଙ୍କ କାର୍ଯ୍ୟକାଳ ଏପ୍ରିଲ ୩ରେ ଶେଷ ହେଉଛି।

ବୋମା ଉପହାର

ବୋମା ଉପହାର

ବଲାଙ୍ଗୀର ଅଫିସ/ପାଟଣାଗଡ଼/ବୁର୍ଲା: ୨୩। ୨(ଡି.ଏନ୍‌.ଏ.): ଉପହାର ଭାବେ ଆସିଥିବା ଏକ ପ୍ୟାକେଟ ଖୋଲିବା ବେଳେ ଶକ୍ତିଶାଳୀ ବୋମା ବିସ୍ଫୋରଣ ହେବାରୁ ବଲାଙ୍ଗୀର ଜିଲା ପାଟଣାଗଡ଼ ସହରର ଏକ ପରିବାର ପାଇଁ ମାଡି ଆସିଛି ଦୁଃଖ। ନବବିବାହିତଙ୍କ ସହ ଜେଜେମା’ଙ୍କ ମୃତ୍ୟୁ ଘଟିଥିବା ବେଳେ ନବବିବାହିତାଙ୍କୁ ଗୁରୁତର ଅବସ୍ଥାରେ ବୁର୍ଲା ମେଡିକାଲକୁ ସ୍ଥାନାନ୍ତରଣ କରାଯାଇଛି। ଘଟଣାକୁ ନେଇ ଶୁକ୍ରବାର ପାଟଣାଗଡ଼ ସ୍ତବ୍ଧ ହୋଇଯାଇଛି।

ଟେଣ୍ଟହାଉସ୍‌ ମାଲିକଙ୍କୁ ହତ୍ୟା: ଚନ୍ଦ୍ରଶେଖରପୁର ଅଶାନ୍ତ

ଟେଣ୍ଟହାଉସ୍‌ ମାଲିକଙ୍କୁ ହତ୍ୟା: ଚନ୍ଦ୍ରଶେଖରପୁର ଅଶାନ୍ତ

ଭୁବନେଶ୍ୱର(ବ୍ୟୁରୋ)/ଚନ୍ଦ୍ରଶେଖରପୁର(ଡି.ଏନ.ଏ.),୨୩।୨- ୟୁନିଟ୍‌-୪ରେ କାଠମିସ୍ତ୍ରି ଗୋପୀନାଥ ମହାରଣା ହତ୍ୟା ଘଟଣା ଉପରୁ ପୋଲିସ ପରଦା ଉଠାଇପାରି ନ ଥିବାବେଳେ ଚନ୍ଦ୍ରଶେଖରପୁର ଥାନା ହାଉସିଂବୋର୍ଡ କଲୋନୀରେ ଆଉ ଏକ ହତ୍ୟାକାଣ୍ଡ ଘଟିଛି। ପୂର୍ବ ଶତ୍ରୁତାକୁ କେନ୍ଦ୍ରକରି କେତେଜଣ ଦୁର୍ବୃତ୍ତ ଏକ ଟେଣ୍ଟହାଉସ ମାଲିକ ଧନେଶ୍ୱର ଦାଶଙ୍କୁ ହତ୍ୟା କରିଛନ୍ତି।

କୃଷିର ଉନ୍ନତି ପାଇଁ ବ୍ରତୀ ହୁଅ: ରାଜ୍ୟପାଳ

କୃଷିର ଉନ୍ନତି ପାଇଁ ବ୍ରତୀ ହୁଅ: ରାଜ୍ୟପାଳ

ଭୁବନେଶ୍ୱର, ୨୩।୨(ବ୍ୟୁରୋ)- ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି)ର ୩୭ତମ ସମାବର୍ତ୍ତନ ଉତ୍ସବ ଶୁକ୍ରବାର ବିଶ୍ୱବିଦ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି। ଉତ୍ସବରେ ରାଜ୍ୟପାଳ ତଥା କୁଳାଧିପତି ଡ. ଏସ୍‌.ସି. ଜମିର ପୌରୋହିତ୍ୟ କରି ଓୟୁଏଟି ଜାତୀୟ ସ୍ତରରେ ଶିକ୍ଷା ଓ ଗବେଷଣା କ୍ଷେତ୍ରରେ ହାସଲ କରିଥିବା ସଫଳତାକୁ ଦୋହରାଇଥିଲେ। ଛାତ୍ରୀଛାତ୍ର ଏହି ପ୍ରଗତିର ପଥରେ ନିଜକୁ ସାମିଲ କରାଇବା ସହିତ ରାଜ୍ୟ ତଥା ଦେଶରେ କୃଷିର ଉନ୍ନତି ପାଇଁ ବ୍ରତୀ ହେବାକୁ ପରାମର୍ଶ ଦେଇଥିଲେ।

ସବୁ ବିଶ୍ୱବିଦ୍ୟାଳୟ ପାଇଁ ହେବ ଏକକ ସିବିସିଏସ୍‌ ସିଲାବସ୍‌

ସବୁ ବିଶ୍ୱବିଦ୍ୟାଳୟ ପାଇଁ ହେବ ଏକକ ସିବିସିଏସ୍‌ ସିଲାବସ୍‌

ଭୁବନେଶ୍ୱର, ୨୩।୨(ବ୍ୟୁରୋ)- ରାଜ୍ୟରେ ଥିବା ସମସ୍ତ ସରକାରୀ ବିଶ୍ୱବିଦ୍ୟାଳୟ ପାଇଁ ସିବିସିଏସ୍‌(ଚଏସ୍‌ ବେସ୍‌ଡ କ୍ରେଡିଟ୍‌ ସିଷ୍ଟମ) ପାଠ୍ୟକ୍ରମର ନୂତନ ଏକକ ସିଲାବସ୍‌ ତିଆରି ହେବ। ଏହି ସିଲାବସ୍‌କୁ ଅନୁକରଣ କରି ବିଶ୍ୱବିଦ୍ୟାଳୟ, ସ୍ବୟଂଶାସିତ କଲେଜ ଏବଂ ଡିଗ୍ରୀ କଲେଜ ଶିକ୍ଷକମାନେ ଛାତ୍ରୀଛାତ୍ରଙ୍କୁ ପାଠ ପଢାଇବେ। ସିବିସିଏସ୍‌ ସିଲାବସ୍‌ ପ୍ରସ୍ତୁତି ପୂର୍ବରୁ ଶୁକ୍ରବାର ଉଚ୍ଚଶିକ୍ଷା ବିଭାଗ ପକ୍ଷରୁ ସମସ୍ତ ସରକାରୀ ବିଶ୍ୱବିଦ୍ୟାଳୟ ବୋର୍ଡ ସଦସ୍ୟଙ୍କୁ ନେଇ ଏକ କର୍ମଶାଳା ଉତ୍କଳ ବିଶ୍ୱବିଦ୍ୟାଳୟ ସଭାକକ୍ଷରେ ଆୟୋଜିତ ହୋଇଥିଲା। ସିଲାବସ୍‌ ପ୍ରସ୍ତୁତି ଲାଗି ବ୍ୟାପକ ଆଲୋଚନା କରାଯାଇଥିବା ଉଚ୍ଚଶିକ୍ଷା ପରିଷଦ ଉପାଧ୍ୟକ୍ଷ ତଥା ଉତ୍କଳ ବିଶ୍ୱବିଦ୍ୟାଳୟର ପୂର୍ବତନ କୁଳପତି ପ୍ରଫେସର ଅଶୋକ ଦାଶ କହିଛନ୍ତି।