ଖେଳ |

ବୃହତ୍‌ ଟି୨୦ ବିଜୟ

 ବୃହତ୍‌ ଟି୨୦ ବିଜୟ
କଟକ, ୨୦।୧୨(ତପନ ସ୍ବାଇଁ)- ଓଡ଼ିଶା କ୍ରିକେଟର ମକ୍କାଭାବେ ପରିଚିତ ଐତିହାସିକ ବାରବାଟୀ ଷ୍ଟାଡିୟମ ପୁଣିଥରେ ଭାରତ ପାଇଁ ଶୁଭ ସାବ୍ୟସ୍ତ ହୋଇଛି। ବୁଧବାର ଖଚାଖଚ ଦର୍ଶକରେ ଭରା ଟି୨୦ କ୍ରିକେଟ ମ୍ୟାଚରେ ଭାରତ ୯୩ ରନରେ ଶ୍ରୀଲଙ୍କାକୁ ହରାଇ ୩ ମ୍ୟାଚ ବିଶିଷ୍ଟ ସିରିଜରେ ୧-୦ରେ ଅଗ୍ରଣୀଲାଭ କରିଛି। ଭାରତ ପକ୍ଷରୁ ଧାର୍ଯ୍ୟ ୧୮୧ ରନ ବିଜୟ ଲକ୍ଷ୍ୟର ପିଛା କରି ଶ୍ରୀଲଙ୍କା ୧୬ ଓଭରରେ ୮୭ ରନକରି ଅଲଆଉଟ ହୋଇ ଯାଇଥିଲା। ଲୋକେଶ ରାହୁଲ, ମହେନ୍ଦ୍ର ସିଂ ଧୋନୀ ଓ ମନୀଷ ପାଣ୍ଡେଙ୍କ ଦ୍ରୁତ ଇନିଂସ ପରେ ୟୁଜବେନ୍ଦ୍ର ଚହଲଙ୍କ ବୋଲିଂ ଯାଦୁରେ ବଶୀଭୂତ ହୋଇଥିଲା ଶ୍ରୀଲଙ୍କା। ଭାରତୀୟ ସ୍ପିନରଙ୍କୁ ଖେଳିବାରେ ଶ୍ରୀଲଙ୍କା ଅସମର୍ଥ ହେବାରୁ ମ୍ୟାଚ ଏକପାଖିଆ ହୋଇ ଯାଇଥିଲା। ବାରବାଟୀରେ ଭାରତର ଏହାଥିଲା ୧୪(୧୨ ଦିନିକିଆ, ୧ ଟେଷ୍ଟ, ୧ ଟି୨୦)ତମ ବିଜୟ। ଏହା ବ୍ୟତୀତ ଏଠାରେ ଅନୁଷ୍ଠିତ ପ୍ରଥମ ଟି୨୦ରେ ଦକ୍ଷିଣ ଆଫ୍ରିକା ନିକଟରୁ ଲଜ୍ଜାଜନକ ପରାଜୟ ଏଠାରେ ଭରଣା ସହ ମଧୁର ସ୍ମୃତି ନେଇ ବାରବାଟୀରୁ ବିଦାୟ ନେଇଛି ଟିମ୍‌ ଇଣ୍ଡିଆ। ୟୁଜବେନ୍ଦ୍ରଙ୍କ କମାଲ ହାର୍ଦ୍ଦିକ ପାଣ୍ଡ୍ୟାଙ୍କ ପ୍ରଥମ ଓଭରରୁ ୧୧ ରନ ନେଇ ଭଲ ଆରମ୍ଭ କରିଥିଲେ ହେଁ ଶ୍ରୀଲଙ୍କା ଦ୍ୱିତୀୟ ଓଭରର ୪ର୍ଥ ବଲ୍‌ରେ ନିରୋଶାନ ଡିକ୍‌ୱେଲା(୧୩)ଙ୍କ ଉଇକେଟ ହରାଇ ଝଟ୍‌କା ଖାଇଥିଲା। ଜୟଦେବ ଉନାଡକଟ୍‌ ଭାରତକୁ ପ୍ରଥମ ବ୍ରେକ୍‌ ଥ୍ରୁ ଦେଇଥିଲେ। ମ୍ୟାଚର ୫ମ ଓଭରରେ ୟୁଜବେନ୍ଦ୍ର ଚହଲଙ୍କ ବଲ୍‌ରେ ଛକା ଓ ଚୌକା ମାରି ଫର୍ମରେଥିବା ଉପୁଲ ଥରଙ୍ଗା ଇନିଂସକୁ ଆଗକୁ ବଢ଼ାଇଥିଲେ। ମାତ୍ର ସେହି ଓଭରର ୫ମ ବଲ୍‌ରେ ଥରଙ୍ଗା(୨୩)ଙ୍କୁ ଧୋନୀଙ୍କ ହାତରେ କ୍ୟାଚ କରାଇ ଚହଲ ବଡ଼ ସଫଳତା ପାଇଥିଲେ। ୩୯ ରନରେ ୨ଟି ଉଇକେଟ ପଡ଼ିଯିବାରୁ କୁସାଲ ପେରେରା ଓ ଆଞ୍ଜେଲୋ ମାଥ୍ୟୁସଙ୍କ ଉପରେ ଅନେକ କିଛି ନିର୍ଭର କରୁଥିଲା। ମାତ୍ର ୮ମ ଓଭରର ଦ୍ୱିତୀୟ ବଲ୍‌ରେ ମାଥ୍ୟୁସ(୧)ଙ୍କୁ କଟ୍‌ ଆଣ୍ଡ ବୋଲ୍ଡ କରି ଶ୍ରୀଲଙ୍କାକୁ ବ୍ୟାକ୍‌ଫୁଟ୍‌କୁ ଠେଲି ଦେଇଥିଲେ ଚହଲ। କେବଳ ସେତିକି ନୁହେଁ ସେ ଅସେଲା ଗୁଣରତ୍ନେ(୪)ଙ୍କୁ ଧୋନୀଙ୍କ ହାତରେ ଷ୍ଟମ୍ପିଂ କରାଇ ଭାରତ ସ୍ଥିତିକୁ ଦୃଢ଼ କରିଦେଇଥିଲେ। ୧୦ ଓଭର ଶେଷ ବେଳକୁ ଶ୍ରୀଲଙ୍କା ୪ ଉଇକେଟ ହରାଇ ୫୭ ରନ କରିଥିଲା। ୧୧ତମ ଓଭରର ଦ୍ୱିତୀୟ ବଲ୍‌ରେ ଦସୁନ ସନକା(୧) ଆଉଟ ହେବାରୁ ମ୍ୟାଚ ଏକପାଖିଆ ହୋଇ ଯାଇଥିଲା। ଚମତ୍କାର ବୋଲିଂ କରିଥିଲେ ଚହଲ। ସେ ନିଜ ଶେଷ ଓଭରର ପ୍ରଥମ ବଲ୍‌ରେ ଅଧିନାୟକ ଥିସାରା ପେରେରାଙ୍କୁ ଆଉଟ କରି ୪ର୍ଥ ଉଇକେଟ ସଫଳତା ପାଇଥିଲେ। ସେ ନିଜ ୪ ଓଭର ସ୍ପେଲରେ ୨୩ ରନ ଦେଇଥିଲେ। ପରେ କୁଶାଲ ପେରେରା ଓ ଅକିଲା ଦନଞ୍ଜୟ ଯଥାକ୍ରମେ ୧୯ ଓ ୭ ରନ କରି ଆଉଟ ହେବାରୁ ୭୬ ରନରେ ଦଳର ୮ମ ଉଇକେଟ ପତନ ଘଟିଥିଲା। ପରବର୍ତ୍ତୀ ଖେଳ କେବଳ ଔପଚାରିକତା ହୋଇ ରହି ଯାଇଥିଲା। ୧୬ ଓଭରରେ ମାତ୍ର ୮୭ ରନରେ ସୀମିତ ହୋଇ ରହିଯାଇଥିଲା ଶ୍ରୀଲଙ୍କା। ଭାରତ ପକ୍ଷରୁ ୟୁଜବେନ୍ଦ୍ର ଚହଲ ୪ଟି, ହାର୍ଦ୍ଦିକ ପାଣ୍ଡ୍ୟା ୩ଟି, କୁଲଦୀପ ଯାଦବ ୨ଟି ଓ ଜୟଦେବ ଉନାଡକଟ୍‌ ଗୋଟିଏ ଉଇକେଟ ନେଇଥିଲେ। ନିରାଶ କଲେ ରୋହିତ ଟସ୍‌ ଜିତି ପ୍ରଥମେ ଫିଲ୍ଡିଂ ନିଷ୍ପତ୍ତି ନେଇଥିଲେ ଶ୍ରୀଲଙ୍କା ଅଧିନାୟକ ଥିସିରା ପେରେରା। ପଦାର୍ପଣ ଟି୨୦ ମ୍ୟାଚ ଖେଳିଥିବା ବିଶ୍ୱ ଫର୍ନାଣ୍ଡୋଙ୍କୁ ସେ ବୋଲିଂ ଓପନ ଭାର ଦେଇଥିଲେ। ପ୍ରଥମ ଓଭରର ଦ୍ୱିତୀୟ ବଲକୁ ଚୌକାରେ ପରିଣତ କରି ଆକ୍ରମଣାତ୍ମକ ଆଭିମୁଖ୍ୟ ସ୍ପଷ୍ଟ କରିଥିଲେ ଟିମ୍‌ ଇଣ୍ଡିଆ ଅଧିନାୟକ ରୋହିତ ଶର୍ମା। ଲୋକେଶ ରାହୁଲଙ୍କ ସହ ମିଶି ସେ ଦ୍ରୁତ ହାରରେ ସେ ରନ ସଂଗ୍ରହ କରିଥିଲେ। ୫ ଓଭରରେ ଦଳୀୟ ସ୍କୋର ୩୮ ହୋଇଥିବାବେଳେ ରୋହିତ ମିଡ୍‌ଅନ୍‌ ଉପରେ ମାରିବାକୁ ଯାଇ ଦୁଷ୍ମନ୍ଥ ଚାମିରାଙ୍କ ହାତରେ ଧରା ପଡ଼ିଥିଲେ॥ ଚାମିରା ଆଗକୁ ଡାଇଭ୍‌ ମାରି ଚମତ୍କାର ଭାବେ କ୍ୟାଚଟି ନେଇଥିଲେ। ୧୩ଟି ବଲ୍‌ର ସମ୍ମୁଖୀନ ହୋଇଥିବା ରୋହିତ ୨ ଚୌକା ସହାୟତାରେ ୧୭ ରନ କରି ପ୍ୟାଭିଲିୟନ ଫେରିଥିଲେ। ରୋହିତଙ୍କ ବଡ଼ ଇନିଂସ ଦେଖିବାକୁ ଆଶା କରିଥିବା ବାରବାଟୀ ଦର୍ଶକ ନିରାଶ ହୋଇଥିଲେ। ଲୋକେଶଙ୍କ ରିଭ୍ୟୁ ସଫଳ, ଅର୍ଦ୍ଧଶତକ ରୋହିତଙ୍କ ସ୍ଥାନରେ ଶ୍ରେୟାସ ଆୟାର କ୍ରିଜରେ ଯୋଗ ଦେବାପରେ ଦାୟିତ୍ୱ ନିଜ ଉପରକୁ ନେଇଥିଲେ ଲୋକେଶ। ୬ ଓଭରରେ ଦଳୀୟ ସ୍କୋର ୫୦ ପୂରଣ ହୋଇଥିଲା। ୭ମ ଓଭରର ଆଞ୍ଜେଲୋ ମାଥ୍ୟୁସଙ୍କ ପ୍ରଥମ ବଲ୍‌ରେ ଲୋକେଶ ରାହୁଲଙ୍କୁ ଏଲବିଡବଲ୍ୟୁ ଦେଇଥିଲେ ଅମ୍ପାୟର ନୀତୀନ ମେନନ। ଅସନ୍ତୁଷ୍ଟ ରାହୁଲ ରିଭ୍ୟୁ ମାଗିଥିଲେ। ମାତ୍ର ବଲ୍‌ ଟ୍ରାକିଂରେ ବଲ୍‌ ଷ୍ଟମ୍ପ ଉପରେ ଯାଉଥିବା ରିପ୍ଲେରେ ସ୍ପଷ୍ଟ ହୋଇଥିଲା। ଅମ୍ପାୟର ନିଷ୍ପତ୍ତିରେ ପରିବର୍ତ୍ତନ କରି ନଟ୍‌ଆଉଟ ଘୋଷଣା କରିଥିଲେ। ସେତେବେଳକୁ ରାହୁଲ ୨୩ ରନ କରିଥିଲେ। ୩୪ ବଲ୍‌ରୁ କ୍ୟାରିୟରର ଦ୍ୱିତୀୟ ଟି୨୦ ଅର୍ଦ୍ଧଶତକ ପୂରଣ କରିଥିଲେ ରାହୁଲ। ଏଥିରେ ସାମିଲଥିଲା ୬ ଚୌକା, ୧ ଛକା।୯ ଓଭରର ୫ମ ବଲ୍‌ରେ ସେ ଇନିଂସର ପ୍ରଥମ ଛକା ମାରିଥିଲେ। ୧୦ ଓଭର ବେଳକୁ ଭାରତ ୧ ଉଇକେଟ ହରାଇ ୮୪ ରନ ସଂଗ୍ରହ କରି ନେଇଥିଲା। ଦ୍ୱିତୀୟ ଉଇକେଟ ଭାଗୀଦାରିରେ ୪୬ ବଲ୍‌ରୁ ୬୩ ରନ ଯୋଗ ପରେ ଶ୍ରୀଲଙ୍କାକୁ ପ୍ରତିକ୍ଷିିତ ବ୍ରେକ୍‌ ଥ୍ରୁ ଦେଇଥିଲେ ନୂଆନ ପ୍ରଦୀପ। ପ୍ରଥମ ସ୍ପେଲରେ ୧ ଓଭରରେ ୯ ରନ ଦେଇଥିବା ପ୍ରଦୀପ ନିଜ ଦ୍ୱିତୀୟ ଓଭରର ୪ର୍ଥ ବଲ୍‌ରେ ଆୟାରଙ୍କୁ ଉଇକେଟ କିପର ଡିକ୍‌ୱେଲାଙ୍କ ହାତରେ କ୍ୟାଚ କରାଇ ପ୍ୟାଭିଲିୟନ ଫେରାଇଥିଲେ। ୨୦ଟି ବଲ୍‌ର ସମ୍ମୁଖୀନ ହୋଇଥିବା ଆୟାର ୩ ଚୌକା ସହାୟତାରେ ୨୪ ରନ କରିବାକୁ ସକ୍ଷମ ହୋଇଥିଲେ। ଧୋନୀ ଧ୍ୱନୀରେ କମ୍ପିିଲା ଷ୍ଟାଡିୟମ ମହେନ୍ଦ୍ର ସିଂ ଧୋନୀ କ୍ରିଜକୁ ଆସିବାବେଳେ ଷ୍ଟାଡିୟମ ପ୍ରକମ୍ପିତ ହୋଇଥିଲା। ବାରବାଟୀ ଦର୍ଶକ ଧୋନୀ, ଧୋନୀ ଚିତ୍କାର କରି ମାହିଙ୍କୁ ସ୍ବାଗତ କରିଥିଲେ। ପାଦରେ ଯନ୍ତ୍ରଣା ଅନୁଭବ କରି ଫିଜିଓଙ୍କଦ୍ୱାରା ଚିକିତ୍ସା କରାଇଥିବା ଲୋକେଶ ଅଧିକ ସମୟ ତିଷ୍ଠିପାରି ନ ଥିଲେ। ବ୍ୟକ୍ତିଗତ ୬୧ ରନ କରି ସେ ୧୫ତମ ଓଭରର ତୃତୀୟ ବଲ୍‌ରେ ଥିସାରା ପେରେରାଙ୍କଦ୍ୱାରା କ୍ଲିନ ବୋଲ୍ଡ ହୋଇ ଯାଇଥିଲେ। ୪୮ଟି ବଲ୍‌ର ସମ୍ମୁଖୀନ ହୋଇଥିବା ଲୋକେଶ ନିଜ ଇନିଂସ ମଧ୍ୟରେ ୭ ଚୌକା ୧ ଛକା ମାରିଥିଲେ। ୧୬ତମ ଓଭରରେ ନୂଆନ ପ୍ରଦୀପ ମାତ୍ର ୫ ରନ ଦେଇଥିଲେ। ୧୭ତମ ଓଭରରେ ବିସ୍ଫୋରକ ବ୍ୟାଟିଂ କରିଥିଲେ ମନୀଷ ପାଣ୍ଡେ। ଧୋନୀ ଓ ମନୀଶ ଏହି ଓଭରରୁ ୧୯ ରନ ସଂଗ୍ରହ କରିଥିଲେ। ପେରେରାଙ୍କ ୧୮ତମ ଓଭରରୁ ୯ ରନ ଆସିଥିଲା। ୧୯ତମ ଓଭରରୁ ଧୋନୀ-ପାଣ୍ଡେ ୨୧ ରନ ସଂଗ୍ରହ କରି ଭାରତକୁ ସମ୍ମାନଜନକ ସ୍ଥିତିରେ ପହଞ୍ଚାଇ ଦେଇଥିଲେ। ୨୦ତମ ଓଭରରେ ବୋଲିଂ କରିଥିବା ପେରେରାଙ୍କ ପ୍ରଥମ ୫ ବଲ୍‌ରୁ ମାତ୍ର ୬ ରନ ସଂଗ୍ରହ ହୋଇଥିଲା। ଶେଷ ବଲ୍‌ ବେଳକୁ ଷ୍ଟ୍ରାଇକ୍‌ରେ ଥିଲେ ଧେନୀ। ଦର୍ଶକଙ୍କ ଛକା ଛକା ଧ୍ୱନୀରେ ଉତ୍ସାହିତ ହୋଇଥିଲେ ମାହି। ସେ ଶେଷ ବଲ୍‌କୁ ଛକା ମାରି ମିଡ୍‌ ଉଇକେଟ ଉପରେ ବିଶାଳ ଛକା ମାରି ଇନିଂସର ପରିସମାପ୍ତି ଘଟାଇଥିଲେ। ଭାରତ ୨୦ ଓଭରରେ ୩ ଉଇକେଟ ହରାଇ ୧୮୦ ରନ ସଂଗ୍ରହ କରିଥିଲା। ମନୀଶ ପାଣ୍ଡେ ୧୮ ବଲ୍‌ରୁ ୨ଚୌକା ଓ ୨ ଛକା ସହାୟତାରେ ୩୨ ଏବଂ ଧୋନୀ ୨୨ ବଲ୍‌ରୁ ୪ ଚୌକା ୧ ଛକା ସହିତ ୩୯ ରନରେ ଅପରାଜିତ ରହିଥିଲେ। ଅସମାପ୍ତ ୪ର୍ଥ ଉଇକେଟ ଯୋଡ଼ିରେ ଏ ଦୁହେଁ ୩୪ ବଲ୍‌ରୁ ୬୮ ରନ ସଂଗ୍ରହ କରିଥିଲେ। ଶେଷ ୪ ଓଭରରେ ଭାରତ କୌଣସି ଉଇକେଟ ନ ହରାଇ ୬୧ ରନ ସଂଗ୍ରହ କରିଥିଲା। ଶ୍ରୀଲଙ୍କା ବୋଲରଙ୍କ ମଧ୍ୟରେ ଆଞ୍ଜେଲୋ ମାଥ୍ୟୁସ, ଥିସାରା ପେରେରା ଓ ନୂଆନ ପ୍ରଦୀପ ଗୋଟିଏ ଲେଖାଏ ଉଇକେଟ ନେଇଥିଲେ।
All Right Reserved By

ଖେଳ |

ବିଜୟ ହଜାରେ ଟ୍ରଫି  ଫାଇନାଲରେ ମୁମ୍ବାଇ-ଦିଲ୍ଲୀ

ବିଜୟ ହଜାରେ ଟ୍ରଫି ଫାଇନାଲରେ ମୁମ୍ବାଇ-ଦିଲ୍ଲୀ

ବେଙ୍ଗାଲୁରୁ,୧୮।୧୦- ଚଳିତ ବିଜୟ ହଜାରେ ଟ୍ରଫି ଦିନିକିଆ ଟୁର୍ନାମେଣ୍ଟର ଟାଇଟଲ ମୁକାବିଲା ସ୍ପଷ୍ଟ ହୋଇଯାଇଛି। ଏଥିରେ ଗରୋଇ କ୍ରିକେଟର ଦୁଇ ଶକ୍ତିଶାଳୀ ଦଳ ଭେଟାଭେଟି ହେବେ। 

ମୁମ୍ବାଇ ସିଟି ଦଳରୁ ଦାବିନ୍ଦର ବାଦ୍‌

ମୁମ୍ବାଇ,୧୮।୧୦(ପି.ଟି.)- ମୁମ୍ବାଇ ସିଟି ଏଫ୍‌ସି ଡିଫେଣ୍ଡର ଦାବିନ୍ଦର ସିଂ ଚଳିତ ଇଣ୍ଡିଆନ ସୁପର ସିଜନରେ ଆହତ ହୋଇଛନ୍ତି। ଫଳରେ ସେ ଚଳିତ ସିଜନର ଅବଶିଷ୍ଟାଂଶ ମ୍ୟାଚ୍‌ରୁ ବାଦ୍‌ ପଡ଼ଛନ୍ତି।

ଦେଓଧର ଟ୍ରଫିରେ ଖେଳିବେ ଅଶ୍ୱିନ ଓ ରାହାନେ

ଦେଓଧର ଟ୍ରଫିରେ ଖେଳିବେ ଅଶ୍ୱିନ ଓ ରାହାନେ

ନୂଆଦିଲ୍ଲୀ,୧୮।୧୦(ପି.ଟି.)- ରବିଚନ୍ଦ୍ରନ ଅଶ୍ୱିନ ଓ ଅଜିଙ୍କ୍ୟ ରାହାନେ ଦେଓଧର ଟ୍ରଫି ପାଇଁ ଘୋଷିତ ଦଳରେ ସ୍ଥାନ ପାଇଛନ୍ତି। ଆସନ୍ତା ୨୩ ତାରିଖଠାରୁ ଆରମ୍ଭ ହେବାକୁ ଥିବା ଟୁର୍ନାମେଣ୍ଟ ଫର୍ମାଟରେ ପରିବର୍ତ୍ତନ କରାଯାଇଛି। 

ଫିକ୍ସିଂ କରିଥିବା ସ୍ବୀକାର କଲେ କାନେରିଆ

ଫିକ୍ସିଂ କରିଥିବା ସ୍ବୀକାର କଲେ କାନେରିଆ

କରାଚୀ,୧୮।୧୦(ପି.ଟି.)- ଦୀର୍ଘ ୬ ବର୍ଷ ପରେ ପାକିସ୍ତାନର ପୂବତନ ସ୍ପିନର ଦାନେଶ କାନେରିଆ ଶେଷରେ ମ୍ୟାଚ୍‌ ଫିକ୍ସିଂ କରିଥିବା ସ୍ବୀକାର କରିଛନ୍ତି। 

୪ ବର୍ଷ ପରେ ୟାମାଗୁଚିଙ୍କୁ ହରାଇଲେ ସାଇନା

୪ ବର୍ଷ ପରେ ୟାମାଗୁଚିଙ୍କୁ ହରାଇଲେ ସାଇନା

ଓଡେନ୍‌ସେ(ଡନମାର୍କ),୧୮।୧୦(ପି.ଟି.)- ଭାରତୀୟ ବ୍ୟାଡ୍‌ମିଣ୍ଟନ ଖେଳାଳି ସାଇନା ନେହ୍ବାଲ ଦୀର୍ଘ ୪ ବର୍ଷ ପରେ ଜାପାନର ଆକାନେ ୟାମାଗୁଚିଙ୍କୁ ହରାଇଛନ୍ତି। ଏହି ବିଜୟ ଯୋଗୁ ଚଳିତ ଡେନମାର୍କ ଓପନରେ ସେ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। 

କଂଗ୍ରେସରେ ଯୋଗଦଲେ ସାମିଙ୍କ ପତ୍ନୀ ଜାହାନ

କଂଗ୍ରେସରେ ଯୋଗଦଲେ ସାମିଙ୍କ ପତ୍ନୀ ଜାହାନ

ମୁମ୍ବାଇ,୧୮।୧୦- ଭାରତୀୟ ପେସର ମହମ୍ମଦ ସାମିଙ୍କ ପତ୍ନୀ ହସିନ ଜାହାନ ଏବେ ରାଜନୀତିରେ ପାଦ ଦେଇଛନ୍ତି। ସେ ଇଣ୍ଡିଆନ ନ୍ୟାଶନାଲ କଂଗ୍ରେସ (ଆଇଏନ୍‌ସି) ପାର୍ଟିରେ ଯୋଗଦେଇଛନ୍ତି। 

ବିସିସିଆଇ ମାଗିଲା ବିଦା ହେବାକୁ ଥିବା ଖେଳାଳିଙ୍କ ତାଲିକା

ବିସିସିଆଇ ମାଗିଲା ବିଦା ହେବାକୁ ଥିବା ଖେଳାଳିଙ୍କ ତାଲିକା

ମୁମ୍ବାଇ,୧୮।୧୦- ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ) ଫ୍ରାଞ୍ଚାଇଜ୍‌ମାନଙ୍କୁ ଦଳରୁ ବିଦା ହେବାକୁ ଥିବା ଖେଳାଳିଙ୍କ ତାଲିକା ମାଗିଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)। 

ମାଲ୍‌ଟା କ୍ଲବ ପ୍ରସ୍ତାବକୁ ବୋଲ୍ଟଙ୍କ ପ୍ରତ୍ୟାଖ୍ୟାନ

ମାଲ୍‌ଟା କ୍ଲବ ପ୍ରସ୍ତାବକୁ ବୋଲ୍ଟଙ୍କ ପ୍ରତ୍ୟାଖ୍ୟାନ

ସିଡ୍‌ନୀ,୧୮।୧୦- ସ୍ପ୍ରିଣ୍ଟ ସୁପରଷ୍ଟାର ଉସେନ ବୋଲ୍ଟଙ୍କୁ  ମାଲ୍‌ଟସେ ଚାମ୍ପିୟନ ଭାଲେଟ୍ଟା କ୍ଲବ ପକ୍ଷରୁ ଦିଆଯାଇଥିବା ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି। ସେ ଅଷ୍ଟ୍ରେଲିଆରେ ପେସାଦାର ଫୁଟ୍‌ବଲର ହେବାର ସ୍ବପ୍ନ ପୂରା କରିବେ ବୋଲି ଗୁରୁବାର ବୋଲ୍ଟଙ୍କ ଏଜେଣ୍ଟ କହିଛନ୍ତି। 

ଧୋନୀ, ତେନ୍ଦୁଲକରଙ୍କ କ୍ଲବରେ ସାମିଲ ହେବେ କୋହଲି

ଧୋନୀ, ତେନ୍ଦୁଲକରଙ୍କ କ୍ଲବରେ ସାମିଲ ହେବେ କୋହଲି

ନୂଆଦିଲ୍ଲୀ,୧୮।୧୦- ଭାରତୀୟ ଅଧିନାୟକ ବିରାଟ କୋହଲି ତାଙ୍କ କ୍ୟାରିୟରରେ ଆଉ ଏକ ମାଇଲଷ୍ଟୋନ ସ୍ପର୍ଶ କରିବାକୁ ଯାଉଛନ୍ତି। ବିଶ୍ୱର ଶ୍ରେଷ୍ଠ ବ୍ୟାଟ୍ସମ୍ୟାନ ଭାବେ ବିବେଚିତ ହେଉଥିବା କୋହଲି ମୋଟ ଉପରେ ୧୩ତମ ଓ ୫ମ ଭାରତୀୟ ଭାବେ ଦିନିକିଆ କ୍ରିକେଟରେ ୧୦ ହଜାର ରନ୍‌ ପୂରଣ କରିବାକୁ ଯାଉଛନ୍ତି।

ୟୁଥ ଅଲିମ୍ପିକ୍ସ: କୃଷକଙ୍କ ପୁଅ ଆକାଶ ଜିତିଲେ ରୌପ୍ୟ

ୟୁଥ ଅଲିମ୍ପିକ୍ସ: କୃଷକଙ୍କ ପୁଅ ଆକାଶ ଜିତିଲେ ରୌପ୍ୟ

ବୁଏନ୍ସ ଏରିଜ,୧୮।୧୦- ଚଳିତ ୟୁଥ ଅଲିମ୍ପିକ୍ସରେ ପ୍ରଥମ ଭାରତୀୟ ତୀରନ୍ଦାଜ ଭବେ ଆକାଶ ମଲିକ ରୌପ୍ୟ ପଦକ ଜିତିଛନ୍ତି। କୃଷକଙ୍କ ୧୫ ବର୍ଷୀୟ ପୁଅ ଏକତରଫା ଫାଇନାଲରେ ଆମେରିକାର ଟ୍ରେଣ୍ଟୋନ କୋଓ୍ବଲେସଙ୍କଠାରୁ ୦-୬ ବ୍ୟବଧାନରେ ହାରି ଯାଇଛନ୍ତି।

ଜାତୀୟ ସବ୍‌ଜୁନିୟର ଟେନିସ୍‌ କ୍ରିକେଟ: ଓଡ଼ିଶା ରନର୍ସଅପ୍‌

ଜାତୀୟ ସବ୍‌ଜୁନିୟର ଟେନିସ୍‌ କ୍ରିକେଟ: ଓଡ଼ିଶା ରନର୍ସଅପ୍‌

ଭୁବନେଶ୍ୱର, ୧୮।୧୦(କ୍ରୀଡ଼ା ପ୍ରତିନିଧି)- ନାସିକରେ ଅନୁଷ୍ଠିତ ଜାତୀୟ ସବ୍‌ଜୁନିୟର ଟେନିସ୍‌ କ୍ରିକେଟ ଚାମ୍ପିୟନଶିପ୍‌ରେ ଓଡ଼ିଶା ରନର୍ସଅପ୍‌ ହୋଇଛି। ବୁଧବାର ଖେଳାଯାଇଥିବା ଫାଇନାଲ ମ୍ୟାଚ୍‌ରେ ଓଡ଼ିଶା ଉତ୍ତରପ୍ରଦେଶଠାରୁ ହାରି ଦ୍ୱିତୀୟ ସ୍ଥାନ ଅଧିକାର କରିଛି। 

ଶ୍ରଦ୍ଧାଞ୍ଜଳି ଖେଲୋ ଇଣ୍ଡିଆ ଚୟନକର୍ତ୍ତା

ଶ୍ରଦ୍ଧାଞ୍ଜଳି ଖେଲୋ ଇଣ୍ଡିଆ ଚୟନକର୍ତ୍ତା

ଭୁବନେଶ୍ୱର, ୧୮।୧୦(କ୍ରୀଡ଼ା ପ୍ରତିନିଧି)- ଅନ୍ତର୍ଜାତୀୟ ଖ୍ୟାତିସମ୍ପନ୍ନ ମହିଳା ଫୁଟ୍‌ବଲ ଖେଳାଳି ଓଡ଼ିଶାର ଶ୍ରଦ୍ଧାଞ୍ଜଳି ସାମନ୍ତରାୟ ଏବେ ଆଉ ଏକ ଗୁରୁଦାୟିତ୍ୱ ତୁଲାଇବାକୁ ଯାଉଛନ୍ତି। ରାଜ୍ୟର ପ୍ରଥମ ଖେଳାଳି ଭାବେ ଭାରତୀୟ ମହିଳା ଫୁଟ୍‌ବଲ ଦଳର ନେତୃତ୍ୱ ନେଇଥିବା ଶ୍ରଦ୍ଧାଞ୍ଜଳି ବିଭିନ୍ନ ବୟସ ବର୍ଗରେ ଜାତୀୟ ମହିଳା ଫୁଟ୍‌ବଲ ଦଳର କୋଚ୍‌ ଓ ଚୟନକର୍ତ୍ତା ଦାୟିତ୍ୱ ସଫଳତାର ସହିତ ତୁଲାଇଥିବାବେଳେ ଏବେ ତାଙ୍କୁ ଖେଲୋ ଇଣ୍ଡିଆର ଚୟନକର୍ତ୍ତା ଭାବେ ନିଯୁକ୍ତ କରାଯାଇଛି।