ମୁମ୍ବାଇ,୧୨।୮: ଶେୟାର ବଜାରରେ ଲଗାତାର ଛଅ ସପ୍ତାହର ହ୍ରାସ ପରେ ସୋମବାର ତା ୮ ଅଗଷ୍ଟରେ ଏକ ବୃହତ୍ ଉଛାଳ ଦେଖିବାକୁ ମିଳିଛି। ସେନସେକ୍ସ ୭୪୬.୨୯ ପଏଣ୍ଟ ବୃଦ୍ଧି ପାଇ ୮୦,୬୦୪.୦୮ ପଏଣ୍ଟରେ ବନ୍ଦ ହୋଇଛି, ସେହିପରି ନିଫ୍ଟି ୨୨୧.୭୫ ପଏଣ୍ଟ ବୃଦ୍ଧି ସହ ୨୪,୫୮୫.୦୫ ପଏଣ୍ଟରେ ପହଞ୍ଚିଛି।
ଏହି ବଜାର ଉଛାଳର ସବୁଠାରୁ ବଡ଼ ଲାଭ ଉଠାଇଛନ୍ତି ବ୍ୟବସାୟୀ ଗୌତମ ଆଦାନି। ମାତ୍ର ଗୋଟିଏ ଦିନରେ ତାଙ୍କ ସମ୍ପତ୍ତି ୫.୭୪ ବିଲିୟନ ଡଲାର ଅର୍ଥାତ୍ ପ୍ରାୟ ୫୦୩ କୋଟି ଟଙ୍କା ବୃଦ୍ଧି ପାଇଛି। ଏହା ସହ ତାଙ୍କର ମୋଟ ସମ୍ପତ୍ତି ୭୯.୭ ବିଲିୟନ ଡଲାରରେ ପହଞ୍ଚିଛି, ଯାହା ତାଙ୍କୁ ବ୍ଲୁମବର୍ଗ ବିଲେନିୟର୍ସ ଇଣ୍ଡେକ୍ସର ଟପ୍-୨୦ ଧନୀଙ୍କ ତାଲିକାରେ ପୁନଃ ପ୍ରବେଶ କରାଇଛି।
ଅମ୍ବାନୀଙ୍କ ସ୍ଥାନ କେଉଁଠି?
ଏହି ତାଲିକାରେ ମୁକେଶ ଅମ୍ବାନୀ ୧୮ତମ ସ୍ଥାନରେ ରହିଛନ୍ତି। ତାଙ୍କ ସମ୍ପତ୍ତି ଗୋଟିଏ ଦିନରେ ୧.୪୦ ବିଲିୟନ ଡଲାର ବୃଦ୍ଧି ପାଇଛି, ଯାହା ସହ ତାଙ୍କର ମୋଟ ସମ୍ପତ୍ତି ୯୯.୫ ବିଲିୟନ ଡଲାର ହୋଇଛି। ତେବେ ଏକ ଦିନିଆ ଆୟରେ ଅଡାନୀଙ୍କୁ କେବଳ ଏଲନ ମସ୍କ ହିଁ ଅତିକ୍ରମ କରିଛନ୍ତି। ମସ୍କଙ୍କ ସମ୍ପତ୍ତି ୬.୬୯ ବିଲିୟନ ଡଲାର ବୃଦ୍ଧି ପାଇ ସେ ଏହି ତାଲିକାରେ ପ୍ରଥମ ସ୍ଥାନରେ ରହିଛନ୍ତି।
ଅନ୍ୟପଟେ, ଓରେକଲର ପ୍ରତିଷ୍ଠାତା ଲାରୀ ଏଲିସନ ୩.୩୦ ବିଲିୟନ ଡଲାର ବୃଦ୍ଧି ସହ ଦ୍ବିତୀୟ ସ୍ଥାନରେ ରହିଛନ୍ତି, ଯାହାଙ୍କର ମୋଟ ସମ୍ପତ୍ତି ୩୦୫ ବିଲିୟନ ଡଲାର। ଫେସବୁକର ସିଇଓ ମାର୍କ ଜୁକରବର୍ଗ ୨୬୯ ବିଲିୟନ ଡଲାର ସମ୍ପତ୍ତି ସହ ତୃତୀୟ ସ୍ଥାନରେ ଥାଇ ମଧ୍ୟ ତାଙ୍କୁ ୧.୧୫ ବିଲିୟନ ଡଲାରର କ୍ଷତି ସହିବାକୁ ପଡ଼ିଛି।
ବ୍ଲୁମବର୍ଗର ଏହି ଅରବପତି ତାଲିକାରେ ଆଦାନି ଓ ଅମ୍ବାନୀ ବ୍ୟତୀତ ଅନେକ ଭାରତୀୟଙ୍କ ନାମ ରହିଛି। ଏଚସିଏଲର ପ୍ରତିଷ୍ଠାତା ଶିବ ନାଦର ୩୫.୩ ବିଲିୟନ ଡଲାର ସମ୍ପତ୍ତି ସହ ୫୬ତମ ସ୍ଥାନରେ, ଶାପୁର ମିସ୍ତ୍ରୀ ୩୨.୩ ବିଲିୟନ ଡଲାର ସହ ୬୪ତମ ଏବଂ ସାବିତ୍ରୀ ଜିନ୍ଦଳ ୩୧.୫ ବିଲିୟନ ଡଲାର ସହ ୬୫ତମ ସ୍ଥାନରେ ରହିଛନ୍ତି। ଏହା ବ୍ୟତୀତ ସୁନୀଲ ମିତ୍ତଲ, ଅଜିମ ପ୍ରେମଜୀ, ଲକ୍ଷ୍ମୀ ମିତ୍ତଲ, ଦିଲୀପ ସାଙ୍ଘଭୀ, କୁମାର ବିଡ଼ଲା ଏବଂ ରାଧାକିଶନ ଦାମାନୀ ପରି ଅନେକ ଭାରତୀୟ ବ୍ୟବସାୟୀ ମଧ୍ୟ ଏହି ତାଲିକାରେ ସ୍ଥାନ ପାଇଛନ୍ତି।ଏହି ଘଟଣା ଭାରତୀୟ ବ୍ୟବସାୟୀଙ୍କ ବିଶ୍ବ ଅର୍ଥନୀତିରେ ବୃଦ୍ଧି ପାଉଥିବା ପ୍ରଭାବକୁ ସୂଚାଇଛି।
