ଇତିଶ୍ରୀ: ଅପାରଗ ସିବିଆଇ

ପ୍ରମାଣ ଅଭାବରୁ ରାୟଗଡ଼ା ଟିକିରି ପ୍ରାଥମିକ ବିଦ୍ୟାଳୟର ଶିକ୍ଷୟିତ୍ରୀ ଇତିଶ୍ରୀ ପ୍ରଧାନ ହତ୍ୟା ମାମଲା ସୁପ୍ରିମକୋର୍ଟରେ ବନ୍ଦ ହୋଇଯିବା ଖବର ଏବେ ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି। ରାଜ୍ୟ ପୋଲିସର କ୍ରାଇମ୍‌ବ୍ରାଞ୍ଚ ବିଭାଗ ବିଫଳ ହେଲା। ଯେତେବେଳେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ଘଟଣାର ତଦନ୍ତ ଦାୟିତ୍ୱ ଦିଆଗଲା ସେତେବେଳେ ଆଶା କରାଯାଉଥିଲା ଯେ ଏକ ଗୁଣାତ୍ମକ ତଦନ୍ତ କରାଯାଇ ସତ୍ୟ ପ୍ରକାଶ ପାଇବ। ଭାତହାଣ୍ଡିରୁ ଗୋଟିଏ ଚିପିଲେ ଯେମିତି ଜଣାପଡ଼େ, ସେହିଭଳି ଓଡ଼ିଶାର ଇତିଶ୍ରୀ, ଉତ୍ତରପ୍ରଦେଶର ଆରୁଷି ଏବଂ ଦେଶର ବିଭିନ୍ନ ରାଜ୍ୟର ଏହିଭଳି ଘଟଣାର ତଦନ୍ତ ଦାୟିତ୍ୱରେ ଥିବା ସିବିଆଇର ବିଫଳତା ଆଖି ଖୋଲି ଦେଉଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶରୁ ଜଣାପଡ଼ୁଛି ଯେ ଇତିଶ୍ରୀ ମାମଲାରେ କେନ୍ଦ୍ରୀୟ ଯାଞ୍ଚ ବ୍ୟୁରୋର ତଦନ୍ତ ଦାୟିତ୍ୱରେ ଥିବା ପୋଲିସ ଅଫିସର ସମ୍ପୂର୍ଣ୍ଣ ବିଫଳ ହୋଇଛନ୍ତି। ୨୦୧୭ ନଭେମ୍ବର ୨୪ରେ ଇତିଶ୍ରୀ ମାମଲାକୁ ଇତି କରିଦିଆଯିବା ପରେ ତାଙ୍କ ପରିବାର ଓ ବନ୍ଧୁବର୍ଗ ହତାଶ ହୋଇପଡ଼ିଛନ୍ତି। ଝିଅର ମୃତ୍ୟୁରେ ମ୍ରିୟମାଣ ହୋଇପଡ଼ିଥିବା ତାଙ୍କ ମା’ କହିଛନ୍ତି ଆଇନ ଆଖିରୁ ଦୋଷୀ ମୁକୁଳି ଯାଇପାରେ, କିନ୍ତୁ ବିଶ୍ୱର ବଡ଼ ବିଚାରପତି ଜଗନ୍ନାଥ ଏହାର ବିଚାର କରିବେ। ୨୦୧୩ ଅକ୍ଟୋବର ୨୭ରେ ଦୁର୍ବୃତ୍ତମାନେ ଇତିଶ୍ରୀଙ୍କୁ କିରୋସିନ ଢାଳି ପୋଡ଼ି ଦେବା ପରେ ନଭେମ୍ବର ୧ରେ ତାଙ୍କର ମୃତ୍ୟୁ ଘଟିଥିଲା। ସେତେବେଳେ ଏହି ଘଟଣାର ଅନ୍ୟତମ ଷଡ଼ଯନ୍ତ୍ରକାରୀ ନେତ୍ରାନନ୍ଦ ଦଣ୍ଡସେନାଙ୍କଠାରୁ ଆରମ୍ଭକରି ସ୍ଥାନୀୟ ନେତା, ପୋଲିସ ଓ ପ୍ରଶାସନର କାର୍ଯ୍ୟକଳାପ ସନ୍ଦେହ ବଳୟକୁ ଆସିଥିଲା। ଜଣେ କର୍ମଜୀବୀ ମହିଳା ବାରମ୍ବାର ଉପରିସ୍ଥ ଶିକ୍ଷା ଅଧିକାରୀଙ୍କ ଦ୍ୱାରା ଶୋଷଣ ଓ ନିର୍ଯାତନାର ଶିକାର ହୋଇଥିବା ବିଷୟ ଜିଲା ପ୍ରଶାସନକୁ ଜଣାଇଥିଲେ ମଧ୍ୟ ତାହାର ସୁଫଳ ମିଳି ନ ଥିଲା। ଇତିଶ୍ରୀଙ୍କ ହତ୍ୟା ଲୋମହର୍ଷଣକାରୀ ଥିଲା ବୋଲି ଜଣାପଡ଼ିବା ପରେ ସମସ୍ତେ ଆଶା କରିଥିଲେ ଯେ ଦୋଷୀଙ୍କୁ କଠୋର ଦଣ୍ଡ ମିଳିବ। ମାତ୍ର ଦଣ୍ଡସେନାଙ୍କୁ ରାୟଗଡ଼ା ଜିଲା ଦୌରାଜଜ୍‌ ଆଜୀବନ କାରାଦଣ୍ଡାଦେଶ ଦେଇଥିଲେ ଓ ସେ ଏବେ ଜେଲରେ ଅଛନ୍ତି। ବିଦ୍ୟାଳୟ ପରିସର ଭିତରେ ଶୋଇଥିବା ବେଳେ ଇତିଶ୍ରୀଙ୍କ ଉପରକୁ ଜଣେ ଜିନ୍‌ପିନ୍ଧା ଲୋକ କିରୋସିନ ଢାଳି ନିଆଁ ଲଗାଇଥିଲେ ବୋଲି ପୀଡ଼ିତା ସେତେବେଳେ ନିଜ ମୃତ୍ୟୁକାଳୀନ ଜମାନବନ୍ଦୀରେ କହିଥିଲେ। ହେଲେ ଏପର୍ଯ୍ୟନ୍ତ ତାଙ୍କୁ ଧରା ନ ଯିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଇତିଶ୍ରୀଙ୍କ ମୃତ୍ୟୁ ପରେ ସମଗ୍ର ରାଜ୍ୟରେ ପ୍ରତିବାଦର ସ୍ବର ଉଠିଥିଲା। ୨୦୧୪ ଜାନୁୟାରୀ ୨୦ରେ ଦିଲ୍ଲୀରୁ ସିବିଆଇର ଏକ ସ୍ବତନ୍ତ୍ର ଟିମ୍‌ ରାୟଗଡ଼ା ଆସି ତଦନ୍ତ ଆରମ୍ଭ କରିଥିଲେ। ଦୀର୍ଘ ୩ ବର୍ଷ ୧୦ ମାସ ମଧ୍ୟରେ ଏହି କେନ୍ଦ୍ରୀୟ ଟିମ୍‌ ପ୍ରାୟ ୨୫ ଥର ରାୟଗଡ଼ା ଗସ୍ତ କରିବା ସହ ୧୨୦ରୁ ଊର୍ଦ୍ଧ୍ୱ ଲୋକଙ୍କୁ ଜେରା କରିଥିଲା। ୨୦୧୭ ନଭେମ୍ବର ୧୭ରେ ସୁପ୍ରିମକୋର୍ଟରେ ସିବିଆଇ ଚୂଡ଼ାନ୍ତ ରିପୋର୍ଟ ଦାଖଲ କରିଥିଲା। ସମ୍ଭବତଃ ହତ୍ୟାକାରୀଙ୍କ ବିଷୟରେ କୌଣସି ସୁରାକ୍‌ ନ ପାଇବା ରିପୋର୍ଟରେ ଉଲ୍ଲେଖ କରିବା ପରେ ସର୍ବୋଚ୍ଚ ଅଦାଲତ ଘଟଣାକୁ ବନ୍ଦ କରିଦେବାକୁ କହିଥିବା ଆଲୋଚନା ହେଉଛି। ଦେଶର ପ୍ରମୁଖ ତଦନ୍ତକାରୀ ସଂସ୍ଥା ହତ୍ୟାକାଣ୍ଡର ଗମ୍ଭୀର ଘଟଣାକ୍ରମ ବିଷୟ ଜାଣିବା ସତ୍ତ୍ୱେ କେଉଁଭଳି ରିପୋର୍ଟ ପ୍ରସ୍ତୁତ କରିଛନ୍ତି ବୁଝିବା କଷ୍ଟକର ନୁହେଁ। ଏକାଧିକ ରାଜନୈତିକ ବ୍ୟକ୍ତି, ପୋଲିସ, ପ୍ରଶାସନର ଭୂମିକାକୁ ନେଇ ପ୍ରଶ୍ନ ଉଠିଥିବାରୁ ଏହି ତଦନ୍ତକାରୀ ସଂସ୍ଥା ତଦନ୍ତର ମୋଡ଼ ବଦଳାଇଛି ବୋଲି ସମାଲୋଚନା ହେଲାଣି। ଏମିତି ଦେଖିଲେ ସିବିଆଇର କାର୍ଯ୍ୟଶୈଳୀ ଅଧିକାଂଶ ସମୟରେ ସନ୍ଦେହରେ ରହିଆସିଛି। କେନ୍ଦ୍ରରେ ଯେଉଁ ଦଳ କ୍ଷମତାସୀନ ହୋଇଥାଏ ସିବିଆଇ ତା’ର ହାତବାରିସ ପାଲଟିଥିବା ବାରମ୍ବାର ଅଭିଯୋଗ ହୁଏ। ଏପରିକି ସର୍ବୋଚ୍ଚ ନ୍ୟାୟାଳୟ ୨୦୧୩ରେ ଏକ ଘଟଣାରେ ସିବିଆଇକୁ ଭର୍ତ୍ସନା କରି ତାକୁ ‘ପଞ୍ଜୁରି ଭିତିରେ ଶୁଆ’ ଆଖ୍ୟା ଦେଇଥିଲେ। ସାମ୍ପ୍ରତିକ ପରିସ୍ଥିତିକୁ ଦେଖିଲେ ଆରୁଷି ହତ୍ୟାଠାରୁ ଆରମ୍ଭକରି ଟିକିରି ଶିକ୍ଷୟିତ୍ରୀଙ୍କୁ ପୋଡ଼ି ମାରି ଦିଆଯିବା ଯାଏ ଯେଉଁ ଘଟଣା ବାରମ୍ବାର ଲୋକଲୋଚନକୁ ଆସିଛି ତା’ର ଦୋଷୀ ପ୍ରମାଣ ଅଭାବରୁ ମୁକ୍ତ ହୋଇଛନ୍ତି ବା ମୁକୁଳିବାକୁ ଯାଉଥିବା ଦେଖିବାକୁ ମିଳୁଛି। ଗଣତାନ୍ତ୍ରିକ ରାଷ୍ଟ୍ରରେ ତଦନ୍ତକାରୀ ସଂସ୍ଥାଗୁଡ଼ିକର ନିରପେକ୍ଷତା ଉପରେ ପ୍ରଶ୍ନ ଉଠିବା ଅର୍ଥ ଏ ଦେଶରେ ଦକ୍ଷତାର ଗଭୀର ଅଭାବ ରହିଛି। ଏବକାର ପରିସ୍ଥିତି ଦେଖିଲେ ସ୍ପଷ୍ଟ ଜଣାପଡ଼ୁଛି ଯେ ସିବିଆଇ, ଆୟକର ବିଭାଗ, ଏନ୍‌ଫୋର୍ସମେଣ୍ଟ ଡିରେକ୍ଟୋରେଟ୍‌ (ଇଡି) ସବୁଥିରେ ଏହିଭଳି ଅପାରଗତା ଚେର ବାନ୍ଧି ସାରିଲାଣି। ଅନେକ ସ୍ତରର ପୋଲିସ ସଂସ୍ଥା ଗଢ଼ିବାର ଉଦ୍ୟମ ହେଉଛି। ଆୟକର ବିଭାଗ ସିଧାସଳଖ ପୋଲିସ ସଂସ୍ଥା ହୋଇ ନ ଥିଲେ ମଧ୍ୟ ତା’ର କାର୍ଯ୍ୟକଳାପ ସମ୍ପୂର୍ଣ୍ଣ ଭାବେ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ଭଳି ମନେହୁଏ। ଆମ ଦେଶରେ କ୍ଷମତାକୁ ଆସୁଥିବା ବ୍ୟକ୍ତିମାନେ ନିଜର କ୍ଷଣକ ସୁବିଧା ପାଇଁ ଅନେକ ତ୍ରୁଟିପୂର୍ଣ୍ଣ କାର୍ଯ୍ୟ କରିଯାଉଛନ୍ତି, ଯଦ୍ଦ୍ବାରା ଦେଶର ଗୁରୁତ୍ୱପୂର୍ଣ୍ଣ ଅନୁଷ୍ଠାନଗୁଡ଼ିକ ଦୁର୍ବଳ ହୋଇପଡ଼ୁଛନ୍ତି କିମ୍ବା ସମ୍ପୂର୍ଣ୍ଣ ଭାବେ ଭାଙ୍ଗିଯାଉଛନ୍ତି। ଆଜି ଯେମିତି ଥାନାରେ ଥିବା ପୋଲିସର ଦୁର୍ନୀତି ଯୋଗୁ ସାମାଜିକ ସ୍ତରରେ ଓଡ଼ିଶା ପୋଲିସ ଉପରେ ଜନସାଧାରଣଙ୍କ ବିଶ୍ୱାସ ନାହିଁ, ଅନୁରୂପ ଭାବେ ଜାତୀୟ ସ୍ତରରେ ମଧ୍ୟ ସିବିଆଇ, ଆୟକର ବିଭାଗ ଏବଂ ଇଡି ଉପରେ ଜନସାଧାରଣଙ୍କ ବିଶ୍ୱାସ ତୁଟି ସାରିଲାଣି।

The Oriya daily Dharitri was started on November 24 1974 by the Samajbadi Society from Bhubaneswar, the capital city of Orissa, India. During 1986, Dharitri started web offset printing. The real growth of Dharitri started during late eighties and early nineties. READ ABOUT US

Quick Links

STAY IN TOUCH!

Copyright © Dharitri.com 2016-2017 - All rights reserved Designed and Development by: Dharitri