ବରଗଡ଼,୨୯।୧୦(ପ୍ରେମାନନ୍ଦ ଖମାରୀ):ବରଗଡ଼ ସହର ଉପକଣ୍ଠ ବାନ୍ଦେନଟିକ୍ରାରେ ଟ୍ରକ୍ ପାର୍କିଂକୁ ନେଇ ଗତ କିଛିଦିନ ତଳେ ଉତ୍ତେଜନା ପ୍ରକାଶ ପାଇଥିଲା। ମଙ୍ଗଳବାର ଏଭଳି ଟ୍ରକ ପାର୍କିଂକୁ ନେଇ ବରଗଡ଼ ବ୍ଲକ ତୋରା ଗ୍ରାମରେ ଉତ୍ତେଜନା ଦେଖାଯାଇଥିଲା। ଗ୍ରାମର ରାସ୍ତା ପାଶର୍ବରେ ଟ୍ରକ୍ଗୁଡ଼ିକ ଧାଡ଼ି ବାନ୍ଧି ରହୁଥିବା ଦେଖି ଗ୍ରାମବାସୀମାନେ ସେଠାକୁ ଧାଇଁଥିଲେ। ତେବେ ସେହି ସ୍ଥାନକୁ ଟ୍ରକ୍ ପାର୍କିଂ ଭାବେ ବ୍ୟବହାର କରାଯାଉଥିବା ଜାଣି ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ତେଜି ଉଠିଥିଲା। ଗ୍ରାମର ମହିଳା, ପୁରୁଷ ଏକତ୍ରିତ ହୋଇ ସେଠାରେ ଟ୍ରକ୍ ପାର୍କିଂକୁ ବିରୋଧ କରିଥିଲେ। ଖବର ପାଇ ତହସିଲଦାର ସୋନାଲି ପଟ୍ଟନାୟକ ଏବଂ ଗ୍ରାମାଞ୍ଚଳ ଥାନା ପୋଲିସ ସେଠାକୁ ପହଞ୍ଚି ଥିଲେ ଏବଂ ଗ୍ରାମବାସୀଙ୍କ ସହିତ ଆଲୋଚନା କରିଥିଲେ। ସେଠାରେ କୌଣସି ଟ୍ରକ୍ ପାର୍କିଂ କରି ଦିଆଯିବ ନାହିଁ ବୋଲି ଗ୍ରାମବାସୀ ରୋକଠୋକ ଶୁଣାଇ ଦେଇଥିଲେ। ଆଲୋଚନା ପରେ ପରିସ୍ଥିତି ଶାନ୍ତ ପଡ଼ିଥିଲା। ତେବେ ଏ ସମ୍ପର୍କରେ ଅଞ୍ଚଳବାସୀ ମାଧବ ସୁନା କହିଛନ୍ତି, ତୋରା ପଞ୍ଚାୟତ ଅନେକ ଗ୍ରାମକୁ ନେଇ ଗଠିତ। ପାଖରେ ରେଳ ଷ୍ଟେଶନ ଥିବାବେଳେ ଅନେକ ସ୍କୁଲ, କଲେଜ ଛାତ୍ରୀଛାତ୍ର ରାସ୍ତାରେ ନିୟମିତ ଯିବା ଆସିବା କରୁଛନ୍ତି। ଟ୍ରକ୍ ପାର୍କିଂ କରାଗଲେ ଦୁର୍ଘଟଣା ଆଶଙ୍କା ରହିଛି। ଫଳରେ ସେଠାରେ ଟ୍ରକ୍ ପାର୍କିଂ କରାଗଲେ ଆଗକୁ ବିରୋଧ ଆହୁରି ତୀବ୍ର ହେବ ବୋଲି ସୁନା ଚେତାବନୀ ଦେଇଛନ୍ତି। ସେହିପରି ସ୍ଥାନୀୟ ଅନ୍ୟଜଣେ ମହିଳା ସନ୍ତୋଷିନୀ ସାହୁ କହିଛନ୍ତି, ଟ୍ରକ୍ ପାର୍କିଂ ହେଲେ ଅଞ୍ଚଳବାସୀ ଆଦୌ ସୁରକ୍ଷିତ ରହିବେ ନାହିଁ। ଟ୍ରକ୍ ପାର୍କିଂ ବଦଳରେ କଳକାରଖାନା କରାଗଲେ ସ୍ଥାନୀୟ ଲୋକେ ରୋଜଗାର ପାଇ ପାରିବେ ବୋଲି ସାହୁ ମତପ୍ରକାଶ କରିଛନ୍ତି। ଫଳରେ ସରକାର ସେ ଦିଗରେ ପଦକ୍ଷେପ ନେବାକୁ ସେ ନିବେଦନ କରିଛନ୍ତି। ଅନ୍ୟପକ୍ଷରେ ଟ୍ରକ୍ ପାର୍କିଂକୁ ନେଇ ଏବେ ମଧ୍ୟ ଅଞ୍ଚଳରେ ଚାପା ଉତ୍ତେଜନା ଲାଗି ରହିଛି।
